Vunau ni Soro 7 - AI VOLA TABU

A vunau ni soro ni caka cala, 1-10; kei nai madrali e na veivinakati, 11-21. Sa tabu ni kania na uro kei na dra, 22-27. Ai madrali e na veivinakati kei nai sigana ni bete, 28-38.

¹ Ia o qo na vunau ni soro ni caka cala: O qo sa ka tabu sara:

² e na yasana era sa vakamatea kina nai soro kama, me ra vakamatea kina nai soro ni caka cala: ia na kena dra me kureitaki voli ki nai cabocabo-ni-soro.

³ Ia me cabora ko koya na kena uro kecega; na buina uro, kei na uro sa ubia na wa wa,

⁴ kei na ivi e rua, kei na uro sa tu kina, a ya sa tu mai na sarisarina, kei nai latikoso sa toka ecake ka toka era na yate, kei na ivi; o qo me kauti tani:

⁵ ia me vakama o qo na bete e na dela ni cabocabo-ni-soro, me ka sa cabori e na buka waqa vei Jiova: o qo nai soro ni caka cala.

⁶ O ira kecega na tagane vei ira na bete ena kania: me kani e na yasana tabu: a ka tabu sara.

⁷ Me vaka nai soro ni valavala ca sa vakakina nai soro ni caka cala: sa dua ga na kedrau vunau: na bete sa ia kina na veibuluti, ena nona ga.

⁸ Ia na bete sa cabora na nonai soro ni valavala ca na tamata e dua, io me nona na bete ko ya na kuli ni soro kama sa cabora ko koya.

⁹ Kei nai madrali laukana kecega sa vavi e na lovo, kei na ka kece sa tavu e nai tavuteki, se na kaukamea raraba, ena nona na bete sa vakacabora.

¹⁰ Kei nai madrali laukana kecega, sa waki vata kei na waiwai, se mamaca, ena nodra kecega na luve i Eroni, me ra duivota tautauvata.

¹¹ Ia o qo na vunau ni madrali e na veivinakati, a ya ena cabora ko koya vei Jiova:

¹² Kevaka sa cabora mei madrali ni vakavinavinaka, me cabora vata kei nai soro ni vakavinavinaka nai buli madrai sa tawa vakalevenitaki sa waki vata kei na waiwai, kei na buli madrai mamare sa wali e na waiwai, kei nai buli madrai sa waki vata kei na waiwai, sa caka e na madrai droka, ka tavuteki.

¹³ Mei kuri ni buli madrai, me cabora talega me nonai madrali na madrai sa vakalevenitaki, mei kuri ni soro ni vakavinavinaka mai na nonai madrali e na veivinakati.

¹⁴ Ia me cabora e dua ko koya, mai nai madrali taucoko, mei soro e lavelaveti vei Jiova; o qo ena nona na bete sa kureitaka na dra ni madrali e na veivinakati.

¹⁵ Ia na lewe sai soro ni vakavinavinaka mai na nonai madrali e na veivinakati ena kani e na siga sa vakacabori kina; me kakua ni laiva ko koya e so me yacova na sabogibogi.

¹⁶ Ia kevaka sa ka ni vosa vavakini na nonai madrali, sei soro sa lomana ga me cabora, me kani e na siga sa cabora kina ko koya na nonai soro: ia me kani talega e na sabogibogi na cauna:

¹⁷ ia na tiki ni lewe sai soro sa vo tu e na kenai katolu ni siga, me vakamai e na buka:

¹⁸ ia kevaka sa kani e na kenai katolu ni siga e dua na tiki ni lewe ni nonai madrali sa cabo e na veivinakati, ena sega ni donu, ena sega ni yaga vua sa cabora: ena ka vakasisilataka ia na tamata sa kana kina ena cudruvi e na nona caka ca.

¹⁹ Ia na lewena sa tara e dua na ka tawa savasava, me kakua ni laukana; me vakamai e na buka: ia na lewena sa vo, me ra kana kina ko ira kece sa savasava.

²⁰ Ia na tamata sa kania na lewe ni madrali sa cabo e na veivinakati, a ya sa nona ko Jiova, ni sa tawa savasava ko koya, ena muduki tani na tamata ko ya vei ira na kai nona.

²¹ A tamata talega sa tara e dua na ka tawa savasava, e dua na ka tawa savasava e na tamata, se manumanu tawa savasava, se dua na ka tawa savasava e vakasisilataka ka sa kania ga na lewe ni madrali sa cabo e na veivinakati, a ya sa nona ko Jiova, ena muduki tani na tamata ko ya vei ira na kai nona.

²² Sa vosa talega vei Mosese ko Jiova, ka kaya,

²³ Mo vosa vei ira na luve i Isireli, ka kaya, Dou na kakua ni kania e dua na uro, mai na karavau, se sipi, se koti.

²⁴ Ia na uro ni manumanu sa mate loa, kei na uro ni manumanu sa dresulaki, e tara me caka kina na ka kecega: ia dou kakua sara ni kania.

²⁵ Ia ko ira kece sa kania na uro ni manumanu, sa dauca-bori maikina na ka sa cabori e na buka waqa vei Jiova, io na tamata sa kania ena muduki tani vei ira na kai nona.

²⁶ Ia mo ni kakua talega ni kania e dua na dra e na nomuni tikotiko kecega, mai na manumanu vuka, se mai na manumanu e yavai va.

²⁷ A tamata kecega sa kania e dua na dra, ena muduki tani na tamata ko ya vei ira na kai nona.

²⁸ Sa vosa talega vei Mosese ko Jiova, ka kaya,

²⁹ Mo vosa vei ira na luve i Isireli, ka kaya, O koya sa vakacabora vei Jiova na nonai madrali sa cabo e na veivinakati, me kauta mai vei Jiova na nonai madrali, mai na nonai madrali sa cabo e na veivinakati.

³⁰ Me kauta na ligana ga na ka me cabo e na buka waqa vei Jiova; me kauta na uro kei na serena, me yalovaki na serena mei soro e yalovaki e na mata i Jiova.

³¹ Ia me vakama na uro e na dela ni cabocabo-ni-soro na bete; ia na serena sa nei Eroni kei iratou na luvena.

³² Ta na tabana i matau mo ni solia vua na bete mei soro e lavelaveti, mai na nomuni madrali sa cabo e na veivinakati.

³³ O koya vei iratou na luve i Eroni sa cabora na dra ni madrali e na veivinakati, kei na uro, ena nonai votavota na tabana i matau.

³⁴ Niʼu sa taura na serena sa yalovaki kei na tabana sa lavelaveti maivei ira na luve i Isireli, mai na nodrai madrali sa cabo e na veivinakati, ka solia vei Eroni na bete kei iratou na luvena, e na vunau me tawa mudu, maivei ira na luve i Isireli.

³⁵ O qo na nei Eroni kei iratou na luvena e na vuku ni nodratou veilumuti, mai na ka sa cabo e na buka waqa vei Jiova, e na siga sa kauti iratou kina ko koya me ratou bete vei Jiova;

³⁶ o koya sa vakarota ko Jiova me ra solia vei iratou ko ira na luve i Isireli, e na siga sa lumuti iratou kina, e na vunau me tawa mudu e na nodra veitabatamata.

³⁷ Sa vakaoqo na vunau ni soro kama, ni madrali laukana, kei nai soro ni valavala ca, kei nai soro ni caka cala, kei na veibuli, kei nai madrali me cabo e na veivinakati;

³⁸ o koya sa vunautaka vei Mosese ko Jiova mai na ulu-ni-vanua ko Sinei, e na siga sa vakaroti ira kina na luve i Isireli me cabora na nodrai madrali vei Jiova e na lekutu mai Sinei.