Vosavakaibalebale 30 - AI VOLA TABU

Sa tukuna ko Akari na ka e vakabauta, 1-6, kei na nona masu, 7-9. Nai tabatamata ca e va, kei na ka e va sa tawa mamau rawa, 10-16. Sa tabu ni beci na qase, 17. Na ka e ca e dredre ni kilai, 18-20; ka va sa dredre ni vosoti, ka va sa vuku, 21-28; ka va sa matavinaka, 29-31. Me cegu na veicudruvi kei na veileti, 32, 33.

¹ A VOSA i Akuri, na luve i Yake, na parofisai ka vosataka ko koya vei Icieli, io vei rau ko Icieli kei Ukali.

² E dina niʼu sa lialia ka ra yalomatua na tamata kecega, a sa sega vei au na vuku vakatamata:

³ au a sega ni vakavulici, ia na nodra vuku na yalosavasava kaʼu sa lecava.

⁴ O cei sa cabe cake ki lomalagi, se lako sobu mai? o cei sa kumuna na cagi ki ligana? o cei sa vauca na wai e nai sulu? o cei sa lesia kecega nai yalayala kei vuravura? o cei na yacana, o cei talega na yaca i koya na luvena, kevaka ko kila?

⁵ A nona vosa kecega na Kalou sa savasava: nai sasabai ko koya vei ira kecega era vakararavi vua:

⁶ mo kakua ni kuria na nona vosa, de vunauci iko ko koya, ka ko sa kune kina me lasu.

⁷ E rua na ka kaʼu sa kerea vei iko; kakua ni ko bureitaka vei au niʼu sa bula tiko:

⁸ mo kauta vakayawa tani vei au na ka lasu kei na vosa lasu: mo kakua ni soli au meʼu dravudravua se vutuniyau; vakani au e na kakana sa ganiti au:

⁹ deʼu mamau, ka lasutaki iko, ka kaya, O cei ko Jiova? se deʼu dravudravua, ka butako, ka cavuta wale na yaca ni noqu Kalou.

¹⁰ Kakua ni beitaka na tamata e na ca vua na nona turaga, de rukaki iko ko koya, ka ko sa vakacalai kina.

¹¹ Sa dua na mataqali sa rukaka na tamadra, ka sega ni vosavakalougatataka na tinadra.

¹² Sa dua na mataqali sa nanumi ira me savasava, a sa sega ni sava tani na nodra dukadukali.

¹³ Sa dua na mataqali, a ka vakaidina na nodra mata viavialevu! a sa cecere na dakudaku-ni-matadra.

¹⁴ Sa dua na mataqali sai seleiwau na batidra, kai sele na bati ni galegaledra, me kani ira laivi kina na yalomalumalumu mai na dela i vuravura, kei ira na dravudravua maivei ira na tamata.

¹⁵ Sa rua na luvena alewa na aluka, a rau dautagi, Soli au, soli au. E tolu na ka sa sega ni mamau rawa, io, e va sa sega ni kaya, Kua soti:

¹⁶ nai bulubulu; kei na kete yava; na qele sa sega ni mamau e na wai; kei na buka sa sega ni kaya, Kua soti.

¹⁷ A mata sa vakalialiai tamana, a sa beca ni talairawarawa vei tinana, ena co-vuta na reveni ni uciwai, ka kania na luve ni ikeli.

¹⁸ E tolu na ka e veivakidacalataki vei au, io, e va kaʼu sa sega ni kila:

¹⁹ na kenai vukavuka na ikeli mai lomalagi; na kenai lakolako na gata e na dela ni vatu; na we ni waqa e loma ni wasawasa; kei nai valavala ni tagane vua na gonealewa.

²⁰ Sa vakaoqo na nonai valavala na alewa dauyatagane; sa kana, ka qusia na gusuna, ka kaya, Au sa sega ni kitaka na ka ca.

²¹ E tolu na ka sa yavavala kina ko vuravura, io, e va e sa sega ni rawata:

²² na tamata wale ni sa buli me turaga; kei na tamata lialia ni sa mamau e na kakana;

²³ na alewa vakasisila ni sa vakawati; kei na vada sa veitaravi kei na nona marama.

²⁴ E va na ka e vuravura sa lalai, ka sa vuku vakalevu sara:

²⁵ a kadi na yavusa sa tawa kaukauwa, ia ka sa vakarautaka na kedra e na vula i katakata;

²⁶ a kalavo na yavusa sa tawa kaukauwa so, ia ka sa cakava ga na nodra vale e na vatu;

²⁷ sa sega na nodra tui na vodre, a sa lako kece yani ga vakamataivalu;

²⁸ a tina-ni-viritalawa sa tara ka e ligana, a sa tiko e na nodra vale na tui.

²⁹ E tolu na ka sa lako vakavinaka, io, e va sa lako vakamatavinaka:

³⁰ na laioni, o qori sa kaukauwa e na manumanu, a sa sega ni lesu tani e na vuku ni dua;

³¹ na koli vula; kei na koti tagane; kei na tui, sa sega ni yaga ni vorata.

³² Kevaka ko sa caka vakalialia ni ko sa vakalevulevui iko, se ko sa nanuma na ka ca, mo tabonaka na gusumu e na ligamu:

³³ ni sa tubu na uro ni wai-ni-sucu ni sa vakayavala wai-ni-sucu, a sa tubu na dra ni sa loba ucu: a sa tubu na veileti ni sa kere cudru.