Vakatekivu 7 - AI VOLA TABU

Sa curuma na waqa ko Noa, kei na nona mata-qali, kei na manumanu e so, ka bula, ni sa waluvu ko vuravura.

¹ A sa kaya vei Noa ko Jiova, Mo curu ki na waqa, ko iko kei na nomu lewe-ni-vale kecega; niʼu sa kunei iko ni ko sa yalododonu e mataqu e nai tabatamata o qo.

² Mo kauta vei iko na manumanu e yavai va sa savasava me yavitu, mai na yavusa kecega, na tagane kei na nona afewa; kei na manumanu e yavai va sa tawa savasava me yarua, mai na yavusa kecega, na tagane kei na nona alewa;

³ a manumanu talega ni lomalagi me yavitu, mai na yavusa kecega, na tagane kei na alewa; me vakabula na nodra kawa e na dela i vuravura:

⁴ ni sa vo walega na bogi e vitu, kaʼu na qai vakatauca tiko na uca ki vuravura me vasagavulu na siga ka vasagavulu na bogi; ia kaʼu na vakawabokotaka mai dela i vuravura na ka bula kecega kaʼu a cakava.

⁵ A sa kitaka ko Noa me vaka na ka kecega sa vunautaka vua ko Jiova.

⁶ A sa ono na drau na yabaki i Noa, ni sa ubia na vuravura na waluvu ni wai.

⁷ A sa curuma na waqa ko Noa, kei iratou vata kaya na luvena tagane, kei na watina, kei na watidratou na luvena, e na vuku ni wai ni waluvu.

⁸ A manumanu e yavai va sa savasava, kei na manumanu e yavai va sa tawa savasava, kei na manumanu vuka, kei na ka kecega sa qasi e dela i vuravura, e na nodra yavusa kecega,

⁹ era sa curu ka yarua ki na waqa kivei Noa, na tagane kei na alewa, me vaka ka vunautaka vei Noa na Kalou.

¹⁰ Ia ni sa oti na bogi e vitu, sa qai yaco na wai ni waluvu e dela i vuravura.

¹¹ E na kenai kaono na drau ni yabaki ni bula i Noa, e na kenai karua ni vula, e na kenai katinikavitu ni siga ni vula, io, e na siga dina ko ya, sa basuki mai kina na vurevure kecega ni wai titobu, a sa tadola nai sogo kei lomalagi.

¹² A sa tiko na uca e dela i vuravura ka vasagavulu na siga kei na bogi e vasagavulu.

¹³ E na siga dina ko ya sa curuma na waqa ko Noa, kei Semi, kei Hami, kei Jefeca, na luve i Noa, kei na wati i Noa, kei iratou vata kei iratou na lewe tolu na watidratou na luvena.

¹⁴ Ko iratou, kei na manumanu tawa lasa kecega e na nodra yavusa, kei na manumanu e yavai va kecega e na nodra yavusa, kei na ka kecega sa qasi e na nodra yavusa, a ya sa dauqasi e dela i vuravura, kei na manumanu vuka kecega e na nodra yavusa, io, na manumanu vuka e na yavusa kecega.

¹⁵ A ra sa curu vei Noa ki na waqa ka yarua e na yavusa manumanu kecega, sa tiko kina na cegu me bula kina.

¹⁶ Ia ko ira era curu kina era sa dua na tagane ka dua na alewa, e na yavusa manumanu kecega, ni ra curu kina, me vaka ka vunautaka vua eliu na Kalou: a sa sogota vua na waqa ko Jiova.

¹⁷ A sa vasagavulu na siga ni sa tiko e dela i vuravura na waluvu; a sa vakalevutaki tiko na wai, a sa nawaca na waqa, a sa laveti cake mai dela i vuravura:

¹⁸ a sa gumatua na wai, a sa vakalevutaki vakalevu e dela i vuravura; a sa lako voli e dela ni wai na waqa.

¹⁹ A sa gumatua vakalevu sara na wai e dela i vuravura; a sa ubi na veiulu-ni-vanua cecere kecega sa tiko e ruku i lomalagi kecega.

²⁰ Sa gumatua na wai; a sa lako cake ka tolusagavulu na caga, ni sa ubi oti na veiulu-ni-vanua.

²¹ A sa ciba na manumanu kecega sa yavala rawa e dela i vuravura, io na manumanu vuka, kei na manumanu e yavai va, kei na manumanu tawa lasa, kei na ka kecega sa qasi a ya sa dauqasi e vuravura, kei na tamata kecega:

²² a ka kecega sa tiko e ucuna na cegu sa bula kina, kei na ka kecega sa tiko e na vanua mamaca, sa mate.

²³ Io sa rusa na ka bula kecega sa tiko e dela ni vanua, na tamata, kei na manumanu e yavai va, kei na ka sa qasi, kei na manumanu kei lomalagi, io sa rusa laivi mai na vuravura: a sa vo ko Noa duaduaga, kei ira era tiko vata kaya e na waqa.

²⁴ A sa gumatua tiko na wai e na dela i vuravura, ka dua na drau ka limasagavulu na bogi.