Vakatekivu 5 - AI VOLA TABU

Ai tukutuku ni nodra yabaki na qase ka yacova na waluvu, 1-32; a kei Inoki, 21-24.

¹ OQO nai vola ni kawa i Atama. E na siga sa bulia kina na tamata na Kalou, sa cakavi koya me ucuya na Kalou;

² sa cakavi rau me dua na tagane ka dua na alewa; a sa vosavakalougatataki rau, ka vakatoka na yacadrau na Tamata, e na siga sa buli rau kina.

³ A sa bula ko Atama ka dua na drau ka tolusagavulu na yabaki, a sa qai sucu vua e dua na luvena, a sa ucui koya kai tovo vata kaya, a sa vakatoka na yacana ko Seci;

⁴ ia na gauna i Atama, ni sa sucu oti vua ko Seci, sa walu na drau na yabaki: a sa sucu tiko vua na luvena tagane kei na luvena alewa:

⁵ ia na siga kecega ka bula kina ko Atama, e ciwa na drau ka tolusagavulu na yabaki: a sa qai ciba.

⁶ A sa bula ko Seci ka dua na drau ka lima na yabaki, a sa qai sucu vua ko Inosi:

⁷ a sa bula tiko ko Seci, ni sa sucu oti vua ko Inosi, e walu na drau ka vitu na yabaki, a sa sucu tiko vua na luvena tagane kei na luvena alewa:

⁸ ia na siga kecega i Seci e ciwa na drau ka tinikarua na yabaki: a sa qai ciba.

⁹ A sa bula ko Inosi ka yabaki e ciwasa-gavulu, a sa qai sucu vua ko Keinana:

¹⁰ a sa bula tiko ko Inosi, ni sa sucu oti vua ko Keinana, na yabaki e walu na drau ka tini-kalima, a sa sucu tiko vua na luvena tagane kei na luvena alewa:

¹¹ ia na siga kecega i Inosi e ciwa na drau ka lima na yabaki: a sa qai ciba.

¹² A sa bula ko Keinana ka yabaki e vitu-sagavulu, a sa qai sucu vua ko Mebelelieli:

¹³ a sa bula tiko ko Keinana, ni sa sucu oti vua ko Mebelelieli, ka yabaki e walu na drau ka vasagavulu, a sa sucu tiko vua na luvena tagane kei na luvena alewa:

¹⁴ ia na siga kecega i Keinana e ciwa na drau ka tini na yabaki: a sa qai ciba.

¹⁵ A sa bula ko Mebelelieli ka yabaki e onosagavulu ka lima, a sa qai sucu vua ko Jereti:

¹⁶ a sa bula tiko ko Mebelelieli, ni sa sucu oti vua ko Jereti, ka yabaki e walu na drau ka tolusagavulu, a sa sucu tiko vua na luvena tagane kei na luvena alewa:

¹⁷ ia na siga kecega i Mebelelieli e walu na drau ka ciwasagavulu ka lima na yabaki: a sa qai ciba.

¹⁸ A sa bula ko Jereti ka yabaki e dua na drau ka onosagavulu ka rua, a sa qai sucu vua ko Inoki:

¹⁹ a sa bula tiko ko Jereti, ni sa sucu oti ko Inoki, ka yabaki e walu na drau, a sa sucu tiko vua na luvena tagane kei na luvena alewa:

²⁰ ia na siga kecega i Jereti e ciwa na drau ka onosagavulu ka rua na yabaki; a sa qai ciba.

²¹ A sa bula ko Inoki ka yabaki e onosagavulu ka lima, a sa qai sucu vua ko Mecusela:

²² a rau a daulako kei na Kalou ko Inoki, ni sa sucu oti vua ko Mecusela, ka yabaki e tolu na drau, a sa sucu tiko vua na luvena tagane kei na luvena alewa:

²³ ia na siga kecega i Inoki e tolu na drau ka onosagavulu ka lima na yabaki:

²⁴ a rau a daulako kei na Kalou ko Inoki: a sa yali: e na vuku ni sa kauti koya tani na Kalou.

²⁵ A sa bula ko Mecusela ka dua na drau ka walusagavulu kavitu na yabaki, a sa qai sucu vua ko Lemeki:

²⁶ a sa bula tiko ko Mecusela, ni sa sucu oti vua ko Lemeki, ka yabaki e vitu na drau ka walusagavulu ka rua, a sa sucu tiko vua na luvena tagane kei na luvena alewa:

²⁷ ia na siga kecega i Mecusela e ciwa na drau ka onosagavulu ka ciwa na yabaki: a sa qai ciba.

²⁸ A sa bula ko Lemeki ka yabaki e dua na drau ka walusagavulu ka rua, a sa sucu vua e dua na luvena tagane:

²⁹ a sa vakatoka na yacana ko Noa, ni sa kaya, O koya o qo ena vakalecataki keda e na noda oca kei na cakacaka ni ligada, e na vuku ni qele sa vakacudruva ko Jiova.

³⁰ A sa bula ko Lemeki, ni sa sucu oti vua ko Noa, e lima na drau ka ciwasagavulu ka lima na yabaki, a sa sucu tiko vua na luvena tagane kei na luvena alewa:

³¹ ia na siga kecega i Lemeki e vitu na drau ka vitusagavulu ka vitu na yabaki: a sa qai ciba.

³² A sa lima na drau na yabaki i Noa, a sa sucu vei Noa ko Semi, ko Hami, kei Jefeci.