Vakatekivu 49 - AI VOLA TABU

Sa vosavakalougatataki ira yadua na luvena ko Jekope, 1-28. Sa kaya me bulu vata kei Eparaama, a sa qai mate, 29-33.

¹ A SA kacivi ira na luvena ko Jekope, a sa kaya, Dou soqoni vata, meʼu tukuna vei kemudou na ka ena yacovi kemudou e na gauna maimuri:

² dou soqoni vata mai, ka vakarorogo, na luve i Jekope; ia dou rogoci Isireli na tamamudou.

³ I Rupeni, o iko na noqu ulumatua, na noqu qaqa, kei nai vakatekivu ni noqu kaukauwa, sa uasivi e na vakaturaga, ka uasivi e na kaukauwa:

⁴ sa tawa tarovi e vaka na wai, ka ko na tawa uasivi cake; e na vuku ni ko a cabeta nai mocemoce i tamamu; o a qai vakasisilataka:— sa cabeta ko koya na noqui davodavo.

⁵ Erau veitacini ko Simioni kei Levi; ai yaragi ni veivakasaurarataki na nodraui yalayala:

⁶ na yaloqu, mo kakua ni curuma na nodrau vere vuni; na yamequ, mo kakua ni dua vata kei na nodraui soqo-soqo: ni rau a vakamatea na tamata e na nodrau cudru, ka vakalokilokitaka na karavau e na nodrau lomaqa:

⁷ me cudruvi na nodrau cudru, ni sa kaukauwa; kei na nodrau cudru waqawaqa, ni sa dauveituri-sautaki: au na tawasei rau e Jekope, ka dui biubiuti rau e Isireli.

⁸ I Juta, o iko era na vakavinavinaka kina na veitacini: a ligamu ena boboka na domodra na nomu meca; era na cuva vei iko na luve i tamamu.

⁹ A luve ni laioni ko Juta; o sa lako cake, na luvequ, ni ko rawa na kemu:— sa lako roko ko koya, sa koto me vaka na laioni, ia ka vaka na laioni qase; o cei me vakacudruya?

¹⁰ Ena sega ni lako tani vei Juta nai titoko vakaturaga, se na turaga ni lewa maivei ira na nona kawa, ka me lako mada mai ko Silo, ko koya era na talai-rawarawa kina na veimataqali.

¹¹ Ena nokata ko koya na nona asa ki na vaini, kei na nona luve ni asa ki na vaini talei; ena vuya na nonai tutuvi e na waini, kei na nonai sulu e na dra ni vua-ni-vaini:

¹² ena damudamu na matana e na waini, ka vulavula na batina e na wai-ni-sucu.

¹³ O Sepuloni, ena tiko mai na toba mai waitui: ia ena tiko ko koya mai na toba ni waqa; ia ena yacori Saitoni na nonai yalayala.

¹⁴ O Isakari, na asa kaukauwa, sa koto sobu e na maliwa ni ka colati e rua:

¹⁵ a sa kunea ko koya ni sa vinaka na vakacegu, ka ni sa ka me marautaki na vanua; a sa solia na tabana me colacola, a sa dau-qarava nai vakacavacava.

¹⁶ O Tani, ena lewai ira na nona tamata, me vaka e dua vei ira na mataqali i Isireli.

¹⁷ O Tani ena gata e na bati ni sala, a gata daukata e na bati ni salatu, a ya sa katia na bukubuku-ni-yava ni ose, a sa lutu kimuri kina ko koya sa vodoka.

¹⁸ Au sa waraka oti na bula maivei iko, i Jiova!

¹⁹ O Kata, ena gumatua vua e dua na matai valu: ia ni sa oti, ena qai gumatua ko koya.

²⁰ O Aseri, ena uro na magiti mai nona, ena vuataka talega ko koya na kakana talei vaka turaga.

²¹ O Nafitali, sa koti kila sa taseri; sa vuataka ko koya na vosa me marautaki.

²² O Josefa, sa taba ni kau dauvua, io na taba ni kau dauvua e na bati ni mata-ni-wai; sa salava na dela ni bai-vatu na tabana.

²³ A ra sa dauvakararawataki koya na dauvavana, ka vana, ka cati koya:

²⁴ ia sa kaukauwa tiko ga na nona dakai, a sa vakaukauwataki na taba ni ligana, e na ligana na Kaukauwa i Jekope. Maikina, mai nai Vakatawa, na Uluvatu i Isireli;

²⁵ mai na Kalou i tamamu, o koya ena vukei iko; o koya sa Kaukauwa talega, o koya ena vakalougatataki iko; me yaco na ka veivakalougatataki mai lomalagi ecake, na ka veivakalougatataki mai na titobu sa koto era, kei na ka veivakalougatataki ni sucu kei na kete:

²⁶ na vosavakalougatataka i tamamu sa levu cake e na ka veivakalougatataki mai na veiulu-ni-vanua tawa mudu; ka yacova na ka domoni mai na veiulu-ni-vanua e tawa oti rawa: ena tauca na ulu i Josefa, kei na buradelana ka tawase maivei ira na tuakana.

²⁷ O Penijamini, ena daukata me vaka na wolifa: ena kania e na sabogibogi na kena sa rawa, ka vota e na yakavi nai toki.

²⁸ O ira kecega o qo na mataqali i Isireli e tinikarua: ia o qo na ka sa vosataka vei ira ko tamadra, ni sa vosavakalougatataki ira; sa vosavakalougatataki ira yadua me vaka na ka era dui kalougata kina.

²⁹ A sa vakaroti ira, ka kaya vei ira, Au sa na soqoni vata kei ira na kai noqu: dou buluti au kei ira na tamaqu e na qara-vatu mai na tiki-ni-vanua i Efironi na luve i Eci;

³⁰ e na qara-vatu a ya e na tiki-ni-vanua ko Makipila, a ya sa donui Mamire, mai na vanua ko Kenani, ko ya sa volia ko Eparaama, kei na tiki-ni-vanua, vei Efironi na luve i Eci, me nona vanua me mara.

³¹ Era a buluti Eparaama kina, kei Sera na watina; era a buluti Aisake kina, kei Repeka na watina; kaʼu a buluti Lia talega kina:

³² a tiki-ni-vanua ko ya, kei na qara-vatu sa koto kina, sa voli maivei ira na luve i Eci.

³³ Ia ni sa vakaotia ko Jekope na vakaroti ira na luvena, sa yavia cake na yavana ki nai mocemoce, ka ciba yani, a sa soqoni vata vei ira na kai nona.