Vakatekivu 48 - AI VOLA TABU

Sa lako ko Josefa kei rau na luvena me raici tamana, ni sa kolai mate; a sa vosavakalougatataki rau ko Jekope.

¹ A sa oti na ka o qori, sa kainaki vei Josefa emuri, Raica, sa tauvi mate ko tamamu: a sa kauta kaya na luvena tagane e rua, ko Manase kei Ifireimi.

² A sa tukuni vei Jekope, ka vaka, Raica, sa lako mai vei iko ko Josefa na luvemu: a sa vakaukauwataki koya ko Isireli, ka duri e nai mocemoce.

³ A sa kaya vei Josefa ko Jekope, Na Kalou Kaukauwa sa rairai vei au mai Lusa mai na vanua ko Kenani, a sa vosavakalougatataki au,

⁴ a sa kaya vei au, Raica, kaʼu na cakavi iko mo vakaluveni, kaʼu na vakavuqataki iko, ka cakavi iko mo tamata lewe vuqa sara; kaʼu na solia talega na vanua o qo vei ira na nomu kawa sa muri iko, me ra taukena ka tawa mudu.

⁵ Ia o qo, na luvemu e rua, erau a sucu vei iko eliu e na vanua ko Ijipita, niʼu sa tawa lako mai vei iko ki Ijipita, erau sa noqu; ko Ifireimi kei Manase, me vakai Rupeni kei Simioni, erau na noqu:

⁶ ia na luvemu era na sucu vei iko emuri, era na nomu; era na vakatokai e na yaca ni tuakadra, e na vanua era taukena:

⁷ ia koi au, niʼu a lako mai Petani, sa mate e tikiqu e gau-ni-sala ko Rejeli e na vanua ko Kenani, ni sa lekaleka na sala me yaco ki Efiraca: ia kaʼu a buluta maikea mai na sala ki Efiraca; ko ya ko Pecileema.

⁸ A sa raici rau na luve i Josefa ko Isireli, a sa kaya, O cei koi rau o qo?

⁹ A sa kaya vei tamana ko Josefa, Erau sa luvequ, sa solia vei au na Kalou eke. A sa kaya ko koya, Mo kauti rau mada mai kivei au, meʼu vosavakalougatataki rau.

¹⁰ A sa rai vakaca na mata i Isireli ni sa qase, sa sega ni rai vinaka rawa. A rau sa kauti voleka vua; a sa reguci rau ko koya, ka mokoti rau.

¹¹ A sa kaya vei Josefa ko Isireli, Au a tawa namaka me raica na matamu; ka, raica, sa vakaraitaka na nomu kawa vei au na Kalou.

¹² A sa kauti rau ko Josefa mai na maliwa ni duruna, a sa vakacuva na matana ki na soso.

¹³ A sa tuberi rau ruarua ko Josefa, ko Ifireimi e na ligana i matau me donuya na liga i mawi: i Isireli, kei Manase e na ligana i mawi me: donuya na liga i matau i Isireli, ka kauta voleka vua.

¹⁴ A sa dodoka na ligana i matau ko Isireli, ka virino ki na ulu i Ifireimi, o koya ka gone, kei na ligana i mawi ki na ulu i Manase; ia sa sega ni dodoka vakailoa na ligana; ni sa ulumatua ko Manase.

¹⁵ A sa vosavakalougatataki Josefa, ka kaya, Na Kalou, o koya erau daulako voli e matana na tamaqu, ko Eparaama kei Aisake, na Kalou ka vakani au niʼu a gone ka yacova na siga o qo,

¹⁶ na Agilose ka vakabulai au mai na ca kecega, me vakalougatataki rau na gone; ia me vakatokai vei rau na yacaqu, kei na yacadrau na tamaqu, ko Eparaama kei Aisake; me rau tubu talega me rau lewe vuqa sara e na loma i vuravura.

¹⁷ Ia ni sa raica ko Josefa ni sa virikotora na ligana i matau ki na ulu i Ifireimi, sa sega ni vinakata: a sa laveta na liga i tamana, me kauta mai na ulu i Ifireimi ki na ulu i Manase.

¹⁸ A sa kaya vei tamana ko Josefa, Me kakua ni vakakoya, na tamaqu: ni sa ulumatua ko koya o qo; mo virikotora na ligamu i matau ki na uluna.

¹⁹ A sa bese ko tamana, ka kaya, Au kila, na luvequ, au kila: ena yaco talega ko koya me yavusa, ka na levu ko koya talega; ia sa dina ena levu cake vua ko na tacina sa gone, ni na yaco na nona kawa me matanitu e vuqa.

²⁰ A sa vosavakalougatataki rau e na siga ko ya, ka kaya, Ena cavuti kemudrau yadua ko ira na Isireli ni ra ia na vosa veivakalougatataki, a ra na kaya, Me cakavi iko na Kalou me tautauvata kei Ifireimi ka vakataki Manase: a sa cakavi Ifireimi ko koya me liu vei Manase.

²¹ A sa kaya vei Josefa ko Isireli, Raica, kaʼu mate; ia na Kalou ena tiko kei kemudou, ka kauti kemudou tale ki na nodra vanua na nomudou qase:

²² ia koi au, kaʼu sa solia e dua na tiki-ni-vanua vei iko, e levu cake e na nodra na veitacini, a ya kaʼu a rawata mai vua na luve i Amori e na noqui seleiwau kei na noqu dakai.