Vakatekivu 47 - AI VOLA TABU

Sa kauta e so na tuakana vei Fero ko Josefa, a sa lomani ira ko Fero, 1-6. Sa qai kauti tamana cei Fero, 7-10. Sa vakatikori ira e na yasana vinaka ko Josefa, 11, 12. A lewa i Josefa e na yabaki dausiga, 13-26. Sa malumalumu ko: Jekope, 27-31.

¹ A sa lako ko Josefa ka tukuna vei Fero, ka kaya, Ko tamaqu, kei ira na veitacini, kei na nodra sipi, kei na nodra karavau, kei na nodra kecega, sa lako mai na vanua ko Kenani; ka, raica, era sa tiko mai na vanua ko Koseni.

² A sa kauta e so vei ira na veitacini, eratou tamata lewe lima, a sa kauti iratou me ratou tu e na mata i Fero.

³ A sa kaya ko Fero vei iratou na veitacini, A cava dou sa daukitaka? A ratou sa kaya vei Fero, A nomuni tamata era dauvakana sipi, koi keitou, ko ira talega na neitou qase.

⁴ Eratou sa kaya talega vei Fero, Keitou sa lako mai me keitou tiko vulagi e na vanua o qo: ni sa sega na kedra na nodratou sipi na nomu tamata; ni sa bibi na dausiga e na vanua ko Kenani: ia o qo, me ratou tiko mada na nomu tamata e na vanua ko Koseni.

⁵ A sa vosa vei Josefa ko Fero, ka kaya, Era sa lako mai vei iko na tamamu kei na veitacini:

⁶ sa tiko e matamu na vanua ko Ijipita: e na yasana vinaka ni vanua mo vakatikora na tamamu kei na veitacini; me ra tiko e na yasana ko Koseni: ia kevaka ko sa kila e so vei ira e tamata gumatua, mo lesi iratou me ratou lewa na noqu manumanu.

⁷ A sa kauti Jekope na tamana ko Josefa, me tu e na mata i Fero: a sa vosavakalougatataki Fero ko Jekope.

⁸ A sa kaya vei Jekope ko Fero, E vica na yabaki ni nomu bula?

⁹ A sa kaya vei Fero ko Jekope, A yabaki ni noqu vulagi sa dua na drau ka tolusagavulu na yabaki: sa lailai ka ca na yabaki ni noqu bula, a sa tawa yacova na yabaki ni nodra bula na noqu qase e na gauna ni nodra vulagi.

¹⁰ A sa vosavakalougatataki Fero ko Jekope, ka lako tani e na mata i Fero.

¹¹ Ia sa vakatikora na tamana kei na veitacini ko Josefa, ka solia vei ira me rai taukei e na vanua ko Ijipita, io e na vinaka ni vanua, e na yasana ko Ramisesi, me vaka ka vakarota ko Fero.

¹² A sa vakania na tamana kei na veitacini, kei na mataqali kecega i tamana, ko Josefa, e na kakana me vaka na yavusa yadua.

¹³ A sa sega na kakana e na vanua kecega ko ya: ni sa bibi sara na dausiga, a sa malumalumu na vanua ko Ijipita, kei na vanua ko Kenani, e na vuku ni dausiga.

¹⁴ A sa kumuna vata ko Josefa nai lavo kecega sa kune mai na vanua ko Ijipita, kei na vanua ko Kenani, e na vuku ni sila era volia: a sa kauta nai lavo ko Josefa ki na vale i Fero.

¹⁵ Ia ni sa oti nai lavo mai na vanua ko Ijipita, kei na vanua ko Kenani, era sa qai lako kecega mai vei Josefa na kai Ijipita, ka ra kaya, Mo ni solia vei keimami na kakana: a cava keimami na mate kina e matamu, e na vuku ni sa oti nai lavo?

¹⁶ A sa kaya ko Josefa, Dou solia na nomudou manumanu; ia kaʼu na solia vei kemudou e na vuku ni nomudou manumanu, kevaka sa oti nai lavo.

¹⁷ A ra sa kauta mai vei Josefa na nodra manumanu: a sa solia vei ira na kakana ko Josefa ai voli ni ose, kei na qele ni sipi, kei na qele ni karavau, kei na asa: a sa vakani ira e na kakana e na yabaki ko ya ai voli ni nodra manumanu kecega.

¹⁸ Ia ni sa oti na yabaki ko ya, era sa lako mai vei koya e na kenai karua ni yabaki, a ra sa kaya vua, Keimami na sega ni vunia vua na noqu turaga, ni sa oti na neimami lavo; a sa nona na noqu turaga na neimami qele ni manumanu; sa sega na ka sa vo e mata ni noqu turaga, a yago i keimami ga, kei na neimami vanua:

¹⁹ me keimami mate vakacava e matamu, koi keimami, kei na neimami vanua? mo ni voli keimami kei na neimami vanua e na kakana, keimami na tamata i Fero kina, kei na neimami vanua; ia mo ni solia na sila-tei, me keimami bula, ka kua ni mate, ia me kakua ni lala na vanua.

²⁰ A sa volia ko Josefa na vanua kecega mai Ijipita me nei Fero; ni ra sa volitaka na kai Ijipita na tamata yadua na nona were, ni sa gumatua vei ira na dausiga: a sa nei Fero kina na vanua.

²¹ Ia ko ira na tamata, sa toki ira ko koya ki na veikoro, mai na yalayala kei Ijipita e dua, ka yacova na kenai kadua.

²² A nodra vanua ga na bete sa tawa volia ko koya; ni sa vota ko Fero e dua na kedrai votavota na bete, a ra sa kania tiko nai votavota ka vota vei ira ko Fero: o koya era tawa volitaka kina na nodra vanua.

²³ A sa kaya vei ira na tamata ko Josefa, Raica, au sa voli kemudou edaidai, kei na nomudou vanua, me nei Fero: raica, na sila-tei vei kemudou, dou na tea kina na vanua.

²⁴ Ia ni sa vua, dou na solia na kenai kalima vei Fero; ia ena nomudou e va, me tei kina na veiwere, me kemudou kakana talega, kei na kedra na lewe ni nomudou veivale, kei na kedra na nomudou lalai.

²⁵ A ra sa kaya, O sa vakabulai keimami: me keimami kune loloma mada e mata ni noqu turaga, keimami na qai tamata i Fero.

²⁶ A sa cakava ko ya ko Josefa mei lesilesi tiko e na vanua ko Ijipita, ka yacova na gauna o qo, ka me nei Fero na kenai kalima; ia na nodra vanua ga na bete, sa sega ni yaco me nei Fero.

²⁷ A sa tiko ko Isireli e na vanua ko Ijipita, e na yasana ko Koseni; a ra sai taukei kina, ka ra tubu, ka lewe vuqa sara mai.

²⁸ A sa bula ko Jekope ka yabaki e tinikavitu e na vanua ko Ijipita: ia na yabaki kecega sa bula kina ko Jekope sa dua na drau ka vasagavulu ka vitu na yabaki.

²⁹ A sa toro mai na gauna me mate kina ko Isireli: a sa kacivi Josefa na luvena, a sa kaya vua, Kevaka kaʼu sa kune loloma e matamu, mo daramaka mada na ligamu ki ruku ni sagaqu, ka cakacaka vakayalololoma ka vakayalodina vei au; mo kakua mada ni buluti au e Ijipita:

³⁰ au na koto ga kei ira na noqu qase, ia mo kauti au tani e Ijipita, ka buluti au e na nodrai bulubulu. A sa kaya ko koya, Au na cakava me vaka na nomu vosa.

³¹ A sa kaya ko koya, Mo vosavavakini vei au. A sa vosavavakini vua. A sa cuva ko Isireli e na ulu ni mocemoce.