Vakatekivu 45 - AI VOLA TABU

Sa vakatakilai koya vei ira na veitacini ko Josefa, ka veivosaki kei ira, 1-15. Era sa talai me kauti tamadra mai, kei na nodra lewe-ni-vale kecega, 16-24. A marau i Jekope ni sa rogo mai ko Josefa, 25-28.

¹ Sa qai sega ni kinoca rawa tiko ko Josefa e na matadra era tu vata kaya; a sa kaci, Me lako tani vei au na tamata kecega kitautuba. A sa sega na tamata sa tu vata kaya, ni sa tukuni koya ko Josefa vei ira na veitacini.

² A sa tabalaka na tagi ko koya: a ra sa rogoca na kai Ijipita, ka sa rogoca na lewe-ni-vale i Fero.

³ A sa kaya ko Josefa vei ira na veitacini, Oi au ko Josefa; sa bula tiko ko tamaqu, se segai? A ra sa sega ni vosa rawa vua na tuakana; ni ra sa taqaya e matana.

⁴ A sa kaya ko Josefa vei ira na veitacini, Dou toro mada mai vei au. A ra sa toro: a sa kaya ko koya, Oi au ko Josefa na tacimudou, o koya dou a volitaka ki Ijipita:

⁵ ia o qo, mo dou kakua ni rarawa, se vei-cudruvi vakai kemudou, ni dou a volitaki au kike: ni sa talai au na Kalou me liutaki kemudou, me ia na veivakabulai:

⁶ ni sa rua na yabaki sa dausiga kina na vanua; a sa vo e lima na yabaki, ena sega kina na laulau se na tamusuki sila:

⁷ a sa talai au na Kalou me liutaki kemudou, me maroroi na nomudou kawa e vuravura, ka vakabulai kemudou e na veivakabulai levu:

⁸ ia o qo, sa sega ni kemudou sa talai au kike, na Kalou ga: a sa cakavi au ko koya meʼu tamana ko Fero, ka turaga vei ira kecega na nona lewe-ni-vale, ka lewa e na vanua kecega ko Ijipita.

⁹ Dou kusarawa, ka lako cake vei tamaqu, ka kaya vua, Sa vakaoqo ko Josefa na luvemu, Sa cakavi au na Kalou me turaga mai Ijipita kecega: mo lako sobu mai vei au, mo kakua ni berabera:

¹⁰ ia ko na tiko mai na vanua ko Koseni, mo voleka kina vei au, ko iko, kei ira na luvemu, kei na luvedra na luvemu, kei na nomu sipi, kei na nomu karavau, kei na nomu ka kecega:

¹¹ kaʼu na vakani iko maikea, de ko dravudravua mai, kei na nomu lewe-ni-vale, kei na nomu ka kecega; ni sa vo e lima na yabaki dausiga.

¹² Ka, raica, sa kunea na matamudou, kei na mata i Penijamini na taciqu, ni sa gusuqu ga sa vosa vei kemudou:

¹³ ia dou tukuna vua na tamaqu na noqui ukuuku kecega e Ijipita, kei na ka kecega kemudou sa raica; ia dou kusarawa, ka kauti tamaqu sobu mai kike.

¹⁴ A sa baleta na domo i Penijamini na tacina, ka tagi; a sa tagi ko Penijamini e domona.

¹⁵ A sa reguci ira na tuakana kecega, ka tagicaki ira; a sa oti, era sa qai veivosaki kaya na veitacini.

¹⁶ A sa rogo ki na vale i Fero na rorogo, a sa kainaki, Era sa lako mai na veitacini i Josefa: a sa vinaka vei Fero, kei ira na nona tamata.

¹⁷ A sa kaya vei Josefa ko Fero, Mo kaya vei ira na wekamu, Mo dou kitaka o qo: dou vakavodoka na ka ki na nomudou manumanu, ka laʼki lako ki na vanua ko Kenani;

¹⁸ ka kauti koya na tamamudou, kei na lewe ni nomudou veivale, ka lako mai vei au: kaʼu na solia vei kemudou na vinaka ni vanua ko Ijipita, ia dou na kania na uro ni vanua:

¹⁹ a sa vakaroti, dou cakava o qo; dou kauta vei kemudou e so na vale-vakayavana mai na vanua ko Ijipita, e na vukudra na nomudou lalai, kei na watimudou, ka kauti ko va na tamamudou, ka lako mai:

²⁰ ia dou kakua ni nanuma na nomudoui yaya; ni na nomudou na vinaka ni vanua kecega ko Ijipita.

²¹ A ra kitaka vakakina na luve i Isireli: a sa solia vei ira e so na vale-vakayavana ko Josefa, me vaka na vosa i Fero, ka solia vei ira nai vaqa ni gau-ni-sala.

²² Sa solia ko koya vei ira kecega na tamata yadua nai sulu me ganita vakarua; ia vei Penijamini sa solia ko koya e tolu na drau na siliva, kei nai sulu me ganita vakalima.

²³ Ia vei tamana sa vakauta vakaoqo; e tini na asa sa colata e so na vinaka mai Ijipita, ka tini na asa alewa sa colata na sila kei na madrai kei na kakana me kei tamana e gau-ni-sala.

²⁴ A sa talai ira yani na veitacini, a ra sa lako: a sa kaya vei ira ko koya, Dou kakua ni veileti e na sala.

²⁵ A ra sa lako cake mai Ijipita, ka yaco ki na vanua ko Kenani kivei Jekope na tamadra,

²⁶ ka tukuna vua, ka vaka, Sa bula tiko ko Josefa, a sa lewa ko koya na vanua kecega ko Ijipita. A sa ceguoca na lomana, ni sa tawa vakabauti ira.

²⁷ A ra sa tukuna vua na vosa kecega i Josefa, a ya ka vosataka vei ira: ia ni sa raica ko koya na veivale-vakayavana ka vakatala ko Josefa me kauti koya, sa qai kaukauwa mai na yalo i Jekope na tamadra:

²⁸ a sa kaya ko Isireli, Sa levu; sa bula tiko ko Josefa na luvequ: au na laʼki raici koya niʼu sa bula tiko.