Vakatekivu 44 - AI VOLA TABU

Era sa talai tale, a sa vauci ira ko koya na tamata i Josefa, ka kauti ira tale ki na koro me vaka na bobula, 1-13. A vakamamasu i Juta, 14-34.

¹ A sa vakarota ko Josefa na tamata ka lewa na nona vale, ka vaka, Mo vakasinaita na nodra taga na tamata e na kakana, me vaka na ka era kauta rawa, ka viria na nonai lavo na tamata yadua ki na gusu ni nona taga:

² kei na mequ bilo, na bilo siliva, mo viria ki na gusu ni nona taga sa gone, kei nai lavo ni nona sila. A sa cakava ko koya me vaka na vosa ka vosataka ko Josefa.

³ Ni sa kida na mataka, era sa talai yani na tamata, ko ira kei na nodra asa.

⁴ Ni ra sa lako tani e na koro, ka sa sega ni vakayawa, sa kaya ko Josefa vua na tamata ka lewa na nona vale, Mo ia, mo muri ira na tamata; ia ni ko sa yacovi ira, mo qai kaya vei ira, A cava kemudou sa caka ca kina mei sau ni vinaka?

⁵ sa sega beka o qo sa gunu maikina na noqu turaga, kei na ka sa kila-ka kina? dou sa caka ca e na ka dou sa cakava.

⁶ A sa yacovi ira ko koya, ka vosataka vei ira na vosa o qo.

⁷ A ra sa kaya vua, A cava sa vosataka na vosa vakaoqo kina na noqu turaga? me yawa sara vei ira na nomu tamata me kitaka na ka vakaoqori:

⁸ raica, nai lavo keitou a kunea e na gusu ni neitou taga, keitou a kauta tale mai kivei iko mai na vanua ko Kenani: keitou na qai butakoca vakacava na siliva se na koula mai na vale ni nomu turaga?

⁹ o koya vei ira na nomu tamata sa kune kaya, me mate ko koya; ia koi keitou, keitou na nona bobula na noqu turaga.

¹⁰ A sa kaya ko koya, Me vaka mada ga na nomudou vosa: o koya sa kune vua ena noqu bobula; ia koi kemudou, dou na tawa cala ga.

¹¹ A ra sa kusarawa, ka tauca sobu ki na qele na tamata yadua na nona taga, ka sereka yadua na nona taga.

¹² A sa vakasaqara ko koya, sa vakatekivu vei koya sa qase, ka vakaotia vei koya sa gone: a sa kune na bilo e na taga i Penijamini.

¹³ A ra sa dresuka na nodrai sulu, ka vakavodoka na tamata yadua na nona taga ki na nona asa, ka lesu ki na koro.

¹⁴ A ra sa lako mai ko Juta kei na veitacini ki na vale i Josefa; ni sa tikotiko ga kina ko koya: a ra sa bale ki na soso e matana.

¹⁵ A sa kaya vei ira ko Josefa, A cakacaka cava o qo dou sa cakava? dou sa lecava beka ni sa rawarawa sara ki na tamata sa vakai au me kila-ka?

¹⁶ A sa kaya ko Juta, A cava keitou na kaya vua na noqu turaga? a cava me keitou vosataka? se keitou na vakadonui keitou vakacava? sa kunea na Kalou na nodra cala na nomu tamata: raica, koi keitou na nona tamata na noqu turaga, koi keitou, kei koya sa kune e ligana na bilo.

¹⁷ A sa kaya ko koya, Me yawa sara vei au meʼu cakacaka vakaoqori; a tamata sa kune e ligana na bilo, o koya ga ena noqu tamata; ia koi kemudou, dou lako vakacegu vua na tamamudou.

¹⁸ Sa qai toro vua ko Juta, ka kaya, Noqu turaga, laiva mada na nomu tamata me vosataka e dua na vosa e daligana na noqu turaga, ia me kakua ni waqa na nomu cudru vua na nomu tamata: ni ko sa vakataki Fero.

¹⁹ A noqu turaga sa tarogi ira na nona tamata eliu, ka vaka, Sa dua li na tamamudou, se na tacimudou?

²⁰ Ia keitou a kaya vua na noqu turaga, Sa dua na tama i keitou, a qase, a sa dua sa luvena ni sa qase, a gone; a sa mate na tuakana, ia ko koya duaduaga i tinana sa vo, a sa lomani koya ko tamana.

²¹ Ia ko a kaya vei ira na nomu tamata, Dou kauti koya sobu mai vei au, me dikevi koya na mataqu.

²² Ia keitou a kaya vua na noqu turaga, E dredre ni lako tani vei tamana na gone: ni na mate ko tamana, kevaka sa lako tani vua.

²³ O a qai kaya vei ira na nomu tamata, Kevaka sa sega ni lako sobu mai kei kemudou na tacimudou sa gone, dou na tawa raica tale na mataqu.

²⁴ Ia sa yaco ni keitou a lako vua na nomu tamata na tamaqu, keitou sa qai tukuna vua na nona vosa na noqu turaga.

²⁵ A sa kaya na tama i keitou, Dou lako tale, volia vakalailai na keda.

²⁶ Keitou sa qai vaka, E dredre na neitou lako sobu; kevaka sa tiko kei keitou na taci i keitou sa gone, keitou na qai lako sobu: ni sa tabu ni keitou raica na matana na tamata, kevaka sa sega ni tiko kei keitou na taci i keitou sa gone.

²⁷ A sa kaya vei keitou na nomu tamata na tamaqu, Dou sa kila ni ka vakasucuma vei au ko watiqu e rua:

²⁸ e dua sa lako tani vei au, kaʼu a kaya, Sa basuki vakaidina ko koya; ia kaʼu sa tawa raica ka yacova na gauna o qo:

²⁹ ia kevaka kemudou kauta o qo talega yani vei au, a sa yacovi koya na ca, dou na qai vakayacora na noqu sika ki nai bulubulu e na rarawa.

³⁰ Ia o qo, niʼu sa lako vua na nomu tamata na tamaqu, a sa sega ni tiko kei keitou na gone; (e na vuku ni sa vauci vata na nodrau bula;)

³¹ io ena yaco, ni sa raica ni sa yali na gone, ena qai ciba ko koya: ia ena vakayacora kina ko ira na nomu tamata na nona sika na nomu tamata na tama i keitou ki nai bulubulu e na rarawa:

³² ni sa yaco na nomu tamata mei koya me taroga na tamaqu e na vuku ni gone ke sa yali, ka kaya, Kevaka kaʼu sa tawa kauti koya mai vei iko, meʼu qai cala vei iko na tamaqu, ka tawa mudu.

³³ Ia o qo, me tiko mada na nomu tamata mei sau ni gone, me nona bobula na noqu turaga; ia me lako cake na gone kei ira na tuakana.

³⁴ Niʼu na lako cake vakacava vei tamaqu, ni sa tawa tiko kei au na gone? deʼu raica na ca ena yacovi tamaqu.