Vakatekivu 42 - AI VOLA TABU

Sa lako ki Ijipita na tuaka i Josefa me voli kakana, 1-28. Era tukutuku vei Jekope, 29-34. Sa rarawa ko Jekope e na vuku ni luvena sa yali, 35-38.

¹ IA ni sa raica ko Jekope ni sa tiko na sila mai Ijipita, sa kaya ko Jekope vei ira na luvena, A cava dou sa veiraici tu kina?

² Sa kaya talega ko koya, Raica, kaʼu sa rogoca ni sa tiko na sila mai Ijipita dou lako sobu kina, ka volia na keda maikea: me da bula ka tawa mate kina.

³ A ra sa lako sobu na tuaka i Josefa e tini, me voli sila mai Ijipita.

⁴ Ia ko Penijamini, na taci i Josefa, sa tawa tala vata kei na tuakana ko Jekope; ni sa kaya, De yacovi koya e dua na ca.

⁵ A ra sa lako vata na luve i Isireli kei ira sa lako: ni sa dausiga na vanua ko Kenani.

⁶ Ia ko Josefa sa lewa na vanua, ia sai koya ga sa volitaki sila vei ira kecega na lewe ni vanua: a ra sa lako mai na tuaka i Josefa, ka cuva vua ki na qele.

⁷ A sa raici ira na tuakana ko Josefa, a sa kilai ira, a sa valavala vakatani vei ira, ka vosa vakaukauwa vei ira; ka kaya vei ira, Dou sa lako maivei? A ra sa kaya, Mai na vanua ko Kenani, me voli kakana.

⁸ A sa kilai ira na tuakana ko Josefa, a ra sa sega ni kilai koya.

⁹ A sa nanuma ko Josefa na tadra ka tadrai ira kina ko koya, a sa kaya vei ira, Kemudou na yamata; dou sa lako mai me raica na dravudravua ni vanua.

¹⁰ A ra sa kaya vua, E segai, noqu turaga; era sa lako mai na nomu tamata me voli kakana ga:

¹¹ oi keitou kece na luvena na tamata e lewe dua; keitou sa dina; era sega ni yamata na nomu tamata.

¹² A sa kaya vei ira ko koya, E segai; dou sa lako ga mai me raica na dravudravua ni vanua.

¹³ A ra sa kaya, A nomu tamata, era lewe tinikarua na veitacini; keitou na luvena e dua na tamata mai na vanua ko Kenani: ka, raica, ko koya sa gone sa tiko edaidai kei na tama i keitou, ka dua sa yali.

¹⁴ A sa kaya vei ira ko Josefa, Sai koya ga kaʼu a vosa kina vei kemudou, ka kaya, Kemudou na yamata:

¹⁵ kemudou na vakatovolei e na ka o qo; Me vaka sa bula ko Fero, dou na tawa lako tani eke, kevaka sa tawa lako mai kike na tacimudou sa gone:

¹⁶ dou tala e dua vei kemudou, me kauta mai na tacimudou, ia koi kemudou, dou na vesuki, me vakatovolei kina na nomudou vosa, se kemudou dina, se segai: ia kevaka e segai, sa qai dina ni kemudou sa yamata, me vaka sa bula ko Fero.

¹⁷ A sa vakacurumi ira vata me ra sogoti kina ka me bogi tolu mada.

¹⁸ Ia e na kenai katolu ni siga, sa qai kaya vei ira ko Josefa, Dou cakava na ka o qo, mo dou bula; (au sa rere vaka na Kalou:)

¹⁹ Kevaka kemudou sa dina, me dua vei kemudou na veitacini me vesuki tiko e na vale kemudou sa sogoti kina: ia koi kemudou, dou laʼki kauta na sila ni ra dausiga na lewe ni nomudou veivale:

²⁰ ia dou kauta ga mai vei au na tacimudou sa gone; ena qai vakadinadinataki na nomudou vosa, ia dou na tawa mate kina. A ra sa kitaka vakakina.

²¹ A ra sa veikayaki vakai ira, Eda sa cala vakaidina e na vuku ni tacida, ni da a raica na rarawa ni yalona, ni ka vakamasuti keda, ia eda a tawa vakarogoca; o koya o qo sa yacovi keda kina na rarawa o qo.

²² A sa vosa vei ira ko Rupeni, ka kaya, Au a sega beka ni vosa vei kemudou, ka kaya, Dou kakua ni caka ca vua na gone? ia dou a tawa rogoca: raica, sa tarogi talega kina na kena dra.

²³ A ra sa tawa kila ni sa kila ko Josefa; ni sa tiko vei ira na tamata veisaui vosa.

²⁴ A sa lako tani vei ira ko koya, ka tagi; a sa lesu vei ira, ka veivosaki kei ira, a sa kauti Simioni tani vei ira, ka vauca e matadra.

²⁵ A sa vakarota ko Josefa me vakasinaiti na nodra taga e na sila, ka vakasukai na nonai lavo na tamata yadua ki na nona taga, ka soli vei ira nai vaqa ni gau-ni-sala: a sa cakacaka vakaoqo vei ira ko koya.

²⁶ A ra sa vakavodoka na nodra sila ki na nodra asa, ka lako tani maikea.

²⁷ Ia e dua sa sereka na nona taga e na bure me vakania, na nona asa, a sa kunea na nonai lavo; ka, raica, sa tiko e na gusu ni nona taga.

²⁸ A sa kaya vei ira na veitacini, A noqui lavo sa vakasukai; ka, raica, sa tiko e na gusu ni noqu taga. A sa waicala na yalodra, a ra sa rere vata, ka kaya, A ka cava o qo sa cakava vei keda na Kalou?

²⁹ A ra sa lako mai vei Jekope na tamadra ki na vanua ko Kenani, ka tukuna vua na ka kecega ka yacovi ira; ka kaya,

³⁰ O koya na tamata sa turaga ni vanua, sa vosa vakaukauwa vei keitou, ka kaya ni keitou sa yamata na vanua:

³¹ ia keitou a kaya vua, Keitou sa dina; keitou sa sega ni yamata:

³² oi keitou na veitacini e lewe tinikarua, na luvena na tama i keitou: e dua sa yali, ia ko koya sa gone sa tiko edaidai kei na tama i keitou, e na vanua ko Kenani.

³³ A sa kaya vei keitou na tamata, ko koya sa turaga ni vanua, A ka o qo kaʼu na kila kina ni dou sa dina; dou laiva e dua vei kemudou na veitacini me tiko kei au, ia koi kemudou, dou kauta na kedra na lewe ni nomudou veivale e na dausiga, dou qai ia na lako:

³⁴ ia dou kauti koya mai na tacimudou sa gone: au na qai kila ni dou sa sega ni yamata, ni dou sa dina ga: au na qai solia vei kemudou na tacimudou, ia dou na qai mai dauveivoli e na vanua.

³⁵ Ia ni ra sa vakalalataka na nodra taga, raica, sa tiko na nonai wolowolo lavo na tamata yadua e na nona taga: ia ni ra sa raica kei tamadra nai wolowolo lavo, era sa rere.

³⁶ A sa kaya vei ira ko Jekope na tamadra, Dou sa vakayali iratou na luvequ: sa yali ko Josefa, ka sa yali ko Simioni, ia dou na kauti Penijamini: sa meca vei au na ka kecega o qo.

³⁷ A sa vosa vei tamana ko Rupeni, ka kaya, Mo vakamatei rau na luvequ, kevaka kaʼu sa sega ni kauti koya mai vei iko: mo laiva vei au, kaʼu na kauti koya tale mai vei iko.

³⁸ A sa kaya ko koya, Ena tawa lako sobu kei kemudou na luvequ; ni sa mate na tuakana, a sa vo duaduaga ko koya: kevaka sa yacovi koya na ca e na sala dou sa lako kina, dou na qai vakayacora e na rarawa na noqu sika ki nai bulubulu.