Vakatekivu 41 - AI VOLA TABU

Sa tadra vakarua ko Fero, 1-24. Sa vakaibatebaletaka ko Josefa, 25-36. Sa laveti ko Josefa me turaga mai Ijipita, 37-45. E vitu na yabaki ni sautu, 46-52. A veiyabaki dausiga, 53-57.

¹ A SA yaco ni sa oti vinaka e rua na yabaki, sa qai tadra ko Fero: ka, raica, sa tu mai na uciwai.

² Ka, raica, sa lako cake mai na uciwai e vitu na kou, sa vatukai vinaka, ka sa uro na lewedra; a ra sa kana tiko e veico:

³ ka, raica, sa muri ira cake mai e vitu na kou tani mai na uciwai, sa rairai ca, ka sa yali na lewedra; a ra sa tu vata kei ira na kou e na bati ni uciwai:

⁴ ia na kou sa rairai ca ka yali na lewedra, era sa kania na kou e vitu sa rairai vinaka ka uro. A sa yadra mai ko Fero.

⁵ A sa moce ka tadra tale: ka, raica, sa tubu cake e na tolo ni sila e dua e vitu na kena sola, sa tolo levu, ka vinaka:

⁶ ka, raica, sa vitu na sola ca, ka todra e na cagi mai cake, sa tubu cake emuri:

⁷ ia na sola e vitu sa ca sa tiloma na sola e vitu sa tolo levu ka sinai. A sa yadra mai ko Fero ka, raica, sa tadra ga.

⁸ Ia e na sabogibogi sa kidroa na lomana: a sa talaki ka kacivi ira kece mai na daucaka-mana mai Ijipita, kei na tamata vuku kecega sa tiko kina: a sa tukuna vei ira ko Fero na nona tadra; a sa sega me vakaibalebaletaka vei Fero.

⁹ Sa qai vosa vei Fero ko koya sa turaga vei ira sa daucaka mena, ka kaya, Au sa nanuma edaidai na noqu cala:

¹⁰ sa cudru ko Fero vei rau na nona tamata, ka soli au meʼu sogoti e nona vale na turaga ni valui vakatawa, ko keirau kei na nodra turaga na dauvavavi:

¹¹ ia keirau a tadrataka e dua na tadra e na bogi e dua, koi au kei koya; keirau a tadra na tamata yadua me vaka nai balebale ni nona tadra:

¹² a sa tiko maikea e dua na cauravou, na Iperiu, a sa qarava na turaga ni valui vakatawa ko koya; ia keirau a tukuna vua, a sa vakaibalebaletaka vei keirau na neirau tadra; sa vakaibalebaletaka vei keirau yadua me vaka na neirau tadra:

¹³ ia me vaka sa vakaibalebaletaka vei keirau, sa yaco vakakina; sa vakalesui au ko koya ki na noqu cakacaka, a sa vakalilici koya.

¹⁴ Sa qai talaki ko Fero me kacivi Josefa mai, a ra sa kauti koya vakasauri mai na vale butobuto: a sa tasi koya, ka suluma nai sulu tani, ka lako kivei Fero.

¹⁵ A sa kaya vei Josefa ko Fero, Au sa tadrataka e dua na tadra, a sa sega me vakaibalebaletaka: ia kaʼu sa rogoci iko ni ko sa daurogoca na tadra ka mo vakaibalebaletaka.

¹⁶ A sa vosa vei Fero ko Josefa, ka kaya, Sa sega vei au: a Kalou ga e vosa vinaka rawa vei Fero.

¹⁷ A sa kaya vei Josefa ko Fero, E na noqu tadra, raica, kaʼu a tu mai na bati ni uciwai:

¹⁸ ka, raica, sa lako cake mai na uciwai e vitu na kou, sa uro na lewedra, ka vatukai vinaka; a ra sa kana voli e na veico:

¹⁹ ka, raica, e vitu na kou tani sa muri ira cake mai, sa suivotu, ka vatukai ca sara, ka yali na lewedra; kaʼu sa sega ni raica sa ca vakakina e na vanua kece ko Ijipita:

²⁰ ia na kou sa suivotu ka yagoca sa kania na kou e vitu eliu sa uro:

²¹ ia ni sa kania oti, sa dredre ni kilai ni sa kani ira; ni ra sa rairai vakaca tiko, me vaka eliu, Kaʼu a qai yadra.

²² Ia kaʼu a qai kunea e na noqu tadra, ka, raica, sa tubu e vitu na sola e na tolo ni sila e dua, sa sinai ka vinaka:

²³ ka, raica, sa tubu cake emuri e vitu na sola, sa matai ka lalai, e todra e na cagi mai cake:

²⁴ ia na sola sa lalai sa tiloma na sola vinaka e vitu: ia kaʼu a tukuna na ka o qo vei ira na daucaka-mana; a sa sega e dua sa tukuna rawa vei au.

²⁵ A sa kaya vei Fero ko Josefa, A tadra i Fero sa dua ga: sa tukuna vei Fero na Kalou na ka sa voleka ni cakava ko koya.

²⁶ A kou vinaka e vitu sa yabaki e vitu; kei na sola vinaka e vitu sa yabaki e vitu: sa dua ga na tadra:

²⁷ ia na kou e vitu sa suivotu ka yagoca sa muri ira cake mai, sa yabaki e vitu; kei na sola e vitu sa lala e todra e na cagi mai cake, ena yabaki dausiga e vitu.

²⁸ O qo na ka kaʼu sa kaya vei Fero: na ka sa voleka ni cakava na Kalou sa vakatakila vei Fero.

²⁹ Raica, ena lako mai e vitu na yabaki vakalewe sara e na vanua kece ko Ijipita:

³⁰ ia ena qai yaco emuri e vitu na yabaki dausiga; ia na sautu kece ena guilecavi e na vanua ko Ijipita; ni na kania na vanua na dausiga;

³¹ ia ena tawa kilai na sautu e na vanua, e na vuku ni dausiga ko ya sa muri mai; ni na ka rerevaki sara.

³² Ia ni sa vakania vei Fero na tadra, ka ni sa vakataudeitaka na Kalou, ia sa tawa dede ena qai vakayacora na Kalou.

³³ O koya o qo me qara mada ko Fero e dua na tamata yalomatua ka vuku, ka lesia me lewa na vanua ko Ijipita.

³⁴ Me ia ko Fero, ka lesia e so na matanivanua me lewa na vanua, ka kumuna nai kalima e na vanua ko Ijipita e na veiyabaki vakalewe e vitu:

³⁵ ia me ra kumuna vata na kakana kecega e na veiyabaki vinaka ena lako mai, ka binia na sila me lewa ko Fero, me ra maroroya talega na kakana e na veikoro.

³⁶ Ia na kakana ko ya ena maninitaki me kena na vanua e na veiyabaki dausiga e vitu, a ya ena yaco e na vanua ko Ijipita; a me kakua ni kawaboko na vanua e na dausiga.

³⁷ A sa vinaka na ka o qo vei Fero, kei ira na nona tamata kecega.

³⁸ A sa kaya ko Fero vei ira na nona tamata, Eda na kunea li e dua vakaoqo, a tamata sa tiko vua na yalo ni Kalou?

³⁹ A sa kaya vei Josefa ko Fero, E na vuku ni sa vakatakila vei iko na Kalou na ka kecega o qo, sa sega e dua sa yalomatua ka vuku me vakataki iko:

⁴⁰ ko na turaga e na noqu vale, ia era na lewai na noqu tamata kecega e na nomu vosa: e nai tikotiko-vakaturaga duaduaga kaʼu na levu cake vei iko.

⁴¹ Sa kaya tale vei Josefa ko Fero, Raica, kaʼu sa lesi iko mo lewa na vanua kecega ko Ijipita.

⁴² A sa luvata mai na nona mama ko Fero mai na ligana, ka daramaka kina na liga i Josefa, ka vakaisulutaki koya e na malo matailalai, ka vakataubena e na sinucodo koula;

⁴³ a sa vakavodoka me lako e nai karua ni nona vale-vodoki; a ra sa kacivaka lako e matana, Mai cuva: a sa lesi koya me lewa na vanua kecega ko Ijipita.

⁴⁴ A sa kaya vei Josefa ko Fero, Oi au ko Fero, ia ena sega na tamata me laveta na ligana se na yavana e na vanua kecega ko Ijipita, ka e na nomu lewa ga.

⁴⁵ A sa vakatoka na yaca i Josefa ko Fero ko Safinaci-pianea; a sa soli Asenaca vua me watina, o koya na luve i Poti-fera na bete mai Oni. A sa lako voli yani ko Josefa e na veiyasana kecega mai Ijipita.

⁴⁶ A SA tolusagavulu na yabaki i Josefa, ni sa tu e na mata i Fero na tui Ijipita. A sa lako tani e na mata i Fero ko Josefa, ka lako voli yani e na veiyasana kecega mai Ijipita.

⁴⁷ Ia e na yabaki vakalewe e vitu sa vuavua na vanua ka sinai kina na liga.

⁴⁸ A sa kumuna vata na kakana kecega e na yabaki e vitu, sa yaco e na vanua ko Ijipita, ka binia na kakana e na veikoro: na kakana ni veiwere sa volita e dua na koro, sa binia kina ko koya.

⁴⁹ A sa binia na sila ko Josefa me vaka na nuku mai na matasawa, na ka levu sara, ka qai tawa wilika tiko; ni sa tawa wili rawa.

⁵⁰ A sa sucu vei Josefa e rua na luvena tagane ni sa tawa yaco na veiyabaki dausiga; a ya ka vakasucuma vua ko Asenaca, na luve i Poti-fera na bete mai Oni.

⁵¹ A sa vakatoka ko Josefa na yaca ni ulumatua ko Manase; ka kaya, Ni sa cakavi au na Kalou meʼu guilecava na noqu oca kecega, kei na lewe-ni-vale kece i tamaqu.

⁵² A sa vakatoka na yacana nai karua ko Ifireimi; ka kaya, Ni sa cakavi au na Kalou me vakaivakawa e na vanua ni noqu rarawa.

⁵³ A sa oti na yabaki vakalewe e vitu e na vanua ko Ijipita.

⁵⁴ A sa vakatekivu me yaco na veiyabaki dausiga, me vaka ka kaya ko Josefa: a sa kania na vanua kecega na dausiga; a sa tiko na kakana e na vanua kecega ko Ijipita.

⁵⁵ Ia ni sa viakana sara na vanua kecega ko Ijipita, era sa qai tagi vei Fero na tamata me soli kedra: a sa kaya ko Fero vei ira na kai Ijipita kecega, Dou lako vei Josefa; a ka sa kaya vei kemudou, dou cakava.

⁵⁶ A sa tiko na dausiga e na dela ni vanua kecega: a sa dolava na lololo kecega ko Josefa, ka volitaki sila vei ira na kai Ijipita; a sa gumatua mai na dausiga e na vanua ko Ijipita.

⁵⁷ A sa lako mai ki Ijipita vei Josefa na lewe ni vanua kecega me voli sila; e na vuku ni sa gumatua na dausiga e na vanua kecega.