Vakatekivu 40 - AI VOLA TABU

E rua na tamata i Fero sa vakacurumi ki na vale ni veivesu, 1-4. Erau tadra, a sa vakatoka a ko Josefa nai balebale ni nodrau tadra, 5-19. Sa yaco na ka sa tukuna vei rau ko Josefa, 20-23.

¹ A SA oti na ka o qori, sa qai cudruvi rau na nodrau turaga na tui Ijipita, o koya sa daucaka mena vua na tui Ijipita, kei koya sa dauvavavi.

² A sa cudru ko Fero vei rau e lewe rua na nona matanivanua, vei koya sa turaga vei ira sa daucaka mena, kei koya sa turaga vei ira sa dauvavavi.

³ A sa soli rau me rau sogoti e nona vale na turaga ni valui vakatawa, e na vale ni veivesu, na yasana sa vesuki tu kina ko Josefa.

⁴ Ia na turaga ni valui vakatawa sa lesi Josefa me tiko vei rau, a sa qaravi rau ko koya: a sa dede ni ratou sa sogoti tiko.

⁵ A rau a tadrataka na tadra koi rau ruarua, na tamata yadua na nona tadra e na bogi e dua, na tamata yadua me vaka nai balebale ni nona tadra, ko koya ka daucaka mena, kei koya ka dauvavavi, vua na tui Ijipita, erau sa vesuki e na vale ni veivesu.

⁶ A sa curu vei rau e na sabogibogi ko Josefa, ka raici rau, ka, raica, erau sa ki-droa:

⁷ a sa tarogi rau na matanivanua i Fero eratou sa sogoti kaya tiko e na vale ni nona turaga, a sa kaya, A cava drau sa vakaveveku mata kina edaidai?

⁸ A rau a kaya vua, Keirau sa tadrataka na tadra, ka sa sega me vakaibalebaletaka. A sa kaya vei rau ko Josefa, Sa sega beka ni nona na Kalou me vakaibalebaletaka na ka? drau tukuna mada mai vei au na nomu-draui tadra.

⁹ A sa tukuna vei Josefa na nona tadra ko koya ka turaga vei ira sa daucaka ka-gunuvi, a sa kaya vua, E na noqu tadra, raica, sa dua na vaini e mataqu;

¹⁰ a sa tolu na tabana na vaini: ia ni sa kubu mai, sa seraka na sena, sa vuataka na vua dreu na kena yawa:

¹¹ ia e ligaqu na bilo i Fero: ia kaʼu a vetia na vua-ni-vaini, ka lobaka ki na bilo i Fero, kaʼu a qai solia na bilo ki na liga i Fero.

¹² A sa kaya vua ko Josefa, O qo na kenai balebale: A tabana e tolu sa siga e tolu:

¹³ sa vo ga na bogi e tolu, ena qai vueta na ulumu ko Fero, ka vakalesui iko ki na nomu cakacaka: ia ko na solia na bilo i Fero ki na ligana, me vaka nai valavala eliu ni ko a daucaka mena:

¹⁴ ia mo nanumi au ni ko na tiko vinaka, ka lomani au mada, ka tukuni au vei Fero, ka kauti au tani e na vale o qo:

¹⁵ niʼu a butakoci vakaidina mai na nodra vanua na Iperiu; eke talega, sa sega na ka kaʼu sa cakava, me ra biuti au kina ki na vale butobuto.

¹⁶ Ia ni sa raica na turaga ni vavavi ni sa vinaka na kenai balebale, sa kaya vei i Josefa, Au a tadra talega, ka, raica, sa tolu; na kato vulavula e uluqu:

¹⁷ ia e na kato sa toka ecake e so na kakana kecega sa dauvavavi me kei Fero; a ra sa mai kania na manumanu mai na kato, mai na uluqu.

¹⁸ A sa vosa ko Josefa, ka kaya, O qo na kenai balebale: A kato e tolu sa siga e tolu:

¹⁹ sa vo ga na bogi e tolu, ena qai vueta na ulumu mai delamu ko Fero, ka vakalilici iko e na kau, a ra na kania na lewemu mai na yagomu na manumanu.

²⁰ A sa yaco e na kenai katolu ni siga, a ya na siga ni sucu i Fero, ni sa cakava ko koya e dua na solevu vei ira kecega na nona tamata: a sa vueta na uluna na turaga vei ira sa daucaka mena, kei na uluna na turaga vei ira sa dauvavavi, e maliwa ni nona tamata.

²¹ A sa vakalesuya na turaga vei ira sa daucaka mena ki na nona caka mena; a sa solia ko koya na bilo ki na liga i Fero:

²² ia ka sa vakalilica na turaga vei ira sa dauvavavi: me vaka ka vakaibalebaletaka vei rau ko Josefa.

²³ Ia na turaga vei ira sa daucaka ka-gunuvi sa sega ni nanumi Josefa, sa guile-cavi koya ga.