Vakatekivu 4 - AI VOLA TABU

Sa sucu ko Keni kei Epeli, 1, 2. A nodraui soro, 3-7. Sa vakamatei Epeli ko Keni, 8. Sa tarogi koya ko Jiova, ka cudruva, 9-15. A kawa i Keni, 16-18. Sa veikaruani ko Lemeki, 19-24. Sa sucu ko Seci, 25.

¹ ASA kilai Ivi na watina ko Atama; a sa kunekune ko koya, a sa vakasucumi Keni, a sa kaya, Au sa rawata e dua na tagane maivei Jiova.

² A sa vakasucu tale, ka vakasucumi Epeli na tacina. Ia ko Epeli sa dauvakania na sipi; a sa daucaka were ko Keni.

³ Ia ni sa oti na bogi e so, sa kauta mai ko Keni e so na vuata ni vanua mei madrali vei Jiova.

⁴ O Epeli talega, sa kauta mai ko koya e so na ulumatua e na nona sipi, kei na so na kedra uro. A sa vakadonui Epeli ko Jiova, kei na nonai madrali:

⁵ ia ka sa sega ni vakadonui Keni ko koya, kei na nonai madrali. A sa cudru vakalevu ko Keni, a sa vakaveveku mata.

⁶ A sa kaya vei Keni ko Jiova, A cava ko sa cudru kina? ka cava ko sa vakaveveku mata kina?

⁷ kevaka ko sa caka vinaka, ko na sega li ni vinakati? ia kevaka ko sa sega ni caka vinaka, sa koto nai valavala ca mai na katuba. Ia ena qaravi iko ko koya, ko na lewai koya talega.

⁸ A sa kaya vei Epeli na tacina ko Keni, Daru lako ki na were; ia ni rau a tiko e na were, sa qai tu cake ko Keni vei Epeli na tacina, ka vakamatei koya.

⁹ A sa kaya ko Jiova vei Keni, Sa evei na tacimu ko Epeli? A sa kaya ko koya, Au sa sega ni kila: oi au beka nai vakatawa kei taciqu?

¹⁰ A sa kaya ko koya, A cava ko a sa cakava? a domo ni dra kei tacimu sa qoqolou vei au mai na qele:

¹¹ ia o qo, ko sa qai cudruvi e na vanua o qo, o koya ka dalaga na gusuna me kauta tani na dra kei tacimu mai na ligamu:

¹² ni ko sa wereca na vanua, ena sega tiko ni kau-kauwa me vua vei iko; o na dauveidroyaki ka tiko sese e vuravura.

¹³ A sa kaya vei Jiova ko Keni, Ai sau ni noqui valavala ca sa levu sara, au sega ni vosota rawa:

¹⁴ raica, ko sa vakasevi au edaidai mai na dela ni vanua o qo; kaʼu na vuni talega mai na matamu; au na dauveidroyaki ka tiko sese e vuravura; ia, ena yaco, ko ira kecega sa kunei au ena vakamatei au.

¹⁵ A sa kaya vua ko Jiova, O koya o qo, o koya sa vakamatei Keni, ena saumi vakavitu. A sa solia vei Keni ko Jiova e dua nai vakatakilakila, ni na sega ni mokuti koya e dua ni sa kunea.

¹⁶ A sa lako tani mai na mata i Jiova ko Keni, ka laʼki tiko mai na vanua ko Noti, kivaka ki cake mai Iteni.

¹⁷ A sa kila na watina ko Keni; a sa kunekune ko koya, a sa vakasucumi Inoki: a sa tara e dua na koro ko koya, ka vakatoka na koro e na yaca ni luvena ko Inoki.

¹⁸ A sa sucu vei Inoki ko Irati: a sa sucu vei Irati ko Mebujeeli: a sa sucu vei Mebujeeli ko Mecuseeli: a sa sucu vei Mecuseeli ko Lemeki.

¹⁹ A sa kauta vua ko Lemeki e rua na watina: a yacana e dua ko Ata, a yacana nai kadua ko Sila.

²⁰ A sa vakasucumi Jepali ko Ata: o koya na tamadra sa dau-tiko e na vale gatu, kei ira era dauvakana manumanu e yavai va.

²¹ Ia na yaca i tacina ko Jupali: o koya na tamadra kecega era taura na api kei na kove.

²² O Sila talega, sa vakasucumi Tupali-keni, a nodrai vakavuvuli kecega na matai e na parasa kei na aironi: ia na gane i Tupali-keni ko Neama.

²³ A sa kaya ko Lemeki vei rau na watina, I Ata kei Sila, drau rogoca na domoqu; oi kemudrau na wati i Lemeki, drau vakarorogo ki na noqu vosa: niʼu sa vakamatea e dua na tamata kaʼu sa vuetaki kina, kei na tamata cauravou kaʼu sa lauti kina:

²⁴ kevaka sa vakavitu nai sau e na vuku i Keni, ena vakavitusagavulu ka vitu vakaidina e na vuku i Lemeki.

²⁵ A sa kila tale na watina ko Atama; a sa vakasucuma ko koya e dua na luvena tagane, a sa vakatoka na yacana ko Seci: ni sa kaya, Sa solia mai vei au na Kalou e dua na kawa mei sosomi kei Epeli, ni ka vakamatea ko Keni.

²⁶ A sa sucu talega vei Seci e dua na luvena tagane; a sa vakatoka na yacana ko Inosi: e na gauna ko ya, era qai vakatekivu kina na tamata me vakatokai ira e na yaca i Jiova.