Vakatekivu 39 - AI VOLA TABU

Sa tamata yaco mai Ijipita ko Josefa, 1-6. Sa dauveretaki koya na nona marama, ka qai lasutaki koya, 7-18. Sa cudruvi koya na nona turaga, ka vakacuruma ki na vale ni veivesu, 19, 20. A sa tiko kaya ko Jiova, 21-23.

¹ A SA kauti sobu ki Ijipita ko Josefa; ia ko Potifari, na matanivanua i Fero, ka turaga ni valui vakatawa, a kai Ijipita, sa voli koya vei ira na luve i Isimeeli, era sa kauti koya sobu mai.

² A sa tiko vei Josefa ko Jiova, a sa tamata yaco ko koya; a sa tiko e na vale ni nona turaga na kai Ijipita.

³ A sa raica na nona turaga ni sa tiko vua ko Jiova, ka vakayacora vua ko Jiova na ka kecega sa cakava ko koya:

⁴ a sa lomani Josefa, a sa qaravi koya ko Josefa; a sa lesi koya me veitaliataka na nona vale, ka solia ki na ligana na ka kecega sa tu vua.

⁵ Ia mai na siga sa lesi koya kina me veitaliataka na nona vale, kei na nona ka kecega, sa vakalougatataka na nona vale na kai Ijipita ko Jiova e na vuku i Josefa; ia sa vakalougatataka ko Jiova na nona ka kecega e na vale, kei na were.

⁶ A sa laiva na nona ka kecega me lewa ko Josefa; ka sega ni kila ko koya e dua na ka sa tu vua, na kakana ga sa kania ko koya. A sa yagovinaka ka rairai vinaka ko Josefa.

⁷ A sa yaco ni sa oti na ka o qo, ka dau-raici Josefa na wati ni nona turaga; a sa kaya, Daru moce vata.

⁸ A sa bese ko koya, ka kaya ki na wati ni nona turaga, Raica, sa sega ni kila na noqu turaga na ka sa tu vei au e na vale, ka sa solia ki na ligaqu na nona ka kecega;

⁹ sa sega e dua e na vale o qo me levu cake vei au, a sa sega e dua na ka sa bureitaka vei au, o iko duaduaga, ni ko sa watina: au na qai cakava rawa vakaevei na ka ca vakaidina o qo, ka valavala ca vua na Kalou?

¹⁰ Ia ni sa vosa tikoga vei Josefa e na veisiga kecega, sa sega ga ni rogoci koya ko koya, me moce vata kaya, me rau dua kaya.

¹¹ A sa qai dua na siga o qori, sa curu ki vale ko Josefa me kitaka na nona cakacaka, ka sega e dua na tamata vei ira na lewe-ni-vale eloma.

¹² A sa tauri koya e na nonai sulu, ka kaya, Daru moce vata: a sa biuta na nonai sulu ki ligana ko Josefa, ka dro, ka curu yani kitautuba.

¹³ A sa yaco, ni sa raica ko koya ni sa biuta na nonai sulu ki ligana, ka dro tani,

¹⁴ sa qai kaci vei ira na tamata era nona lewe-ni-vale, a sa vosa vei ira, ka kaya, Raica, sa kauta mai vei keda ko koya e dua na Iperiu me vakalialiai keda; sa curu mai vei au me keirau moce, ia kaʼu a kaci vakadomoilevu:

¹⁵ ia ni sa rogoca ko koya niʼu a tabalaka na domoqu, ka kaci, sa qai laiva vei au na nonai sulu, ka dro, ka curu yani kitautuba.

¹⁶ A sa maroroya kaya na nonai sulu, ka me lako mada mai ki nona vale na nona turaga.

¹⁷ A sa vosa vua ko koya me vaka na vosa o qo, ka kaya, O koya na Iperiu, nai talatala ko a kauta mai vei keda, sa curu mai vei au me vakalialiai au:

¹⁸ a sa yaco niʼu a tabalaka na domoqu, ka kaci, sa qai laiva vei au na nonai sulu, ka dro kitautuba.

¹⁹ Ia ni sa rogoca na nona turaga na vosa ka vosataka vua na watina, ni sa kaya, Sa kitaki au vakaoqo na nomu tamata; sa qai waqa mai na nona cudru.

²⁰ A sa kauti koya na turaga i Josefa, ka vakacu-ruma ki na vale ni veivesu, na vale era vesuki tu kina na tamata ka vesuka na turaga levu: a sa tiko maikea e na vale ni veivesu.

²¹ Ia ka sa tiko vei Josefa ko Jiova, ka vakayacora vua na loloma, ka cakava me lomani koya nai vakatawa ni vale ni veivesu.

²² Ia ko koya nai vakatawa ni vale ni veivesu sa lesia me lewa ko Josefa na tamata kecega sa vesuki era tiko e na vale ni veivesu; kei na ka kecega era cakava maikina, sa cakava ko koya.

²³ Ai vakatawa ni vale ni veivesu sa tawa vakaraica e dua na ka sa lewa ko koya; e na vuku ni sa tiko kaya ko Jiova, ka sa vakayacora ko Jiova na ka sa cakava ko koya.