Vakatekivu 38 - AI VOLA TABU

A luve i Juta, 1-5. Sai valavala ca ko Eri kei Onani, ka mate kina, 6-11. Sa ia na dauyalewa ko Juta, 12-26. Sa sucu vua na drua, 27-30.

¹ IA e na gauna ko ya sa lako sobu yani vei ira na veitacini ko Juta, ka laʼki tiko kei na dua na kai Etulama, a yacana ko Ira.

² A sa kunea maikea ko Juta na luvena alewa e dua na kai Kenani, a yacana ko Sua; a sa kauta ko koya, ka laʼki curu vua.

³ A sa kunekune ko koya, ka vakasucuma e dua na luvena tagane; ia na tagane sa vakatoka na yacana ko Eri.

⁴ A sa kunekune tale ko koya, ka vakasucuma na luvena tagane; ia na alewa sa vakatoka na yacana ko Onani.

⁵ A sa kuria tale, ka vakasucuma na luvena tagane; ia na alewa sa vakatoka na yacana ko Sela: ia, ni sa vakasucumi koya, sa tiko na tagane mai Kisipi.

⁶ A sa kauta ko Juta e dua, na yacana ko Tamari, me wati i Eri na nona ulumatua.

⁷ A sa tamata ca e na mata i Jiova ko Eri na ulumatua i Juta; a sa vakamatea ko Jiova.

⁸ A sa kaya ko Juta vei Onani, Mo curu vua na wati i tuakamu, ka veiwatini kaya, ka vakatubura na kawa vua na tuakamu.

⁹ A sa kila ko Onani ni na sega ni nona na kawa: a sa yaco ni sa curu vua na wati i tuakana, sa qai livia ki na qele, de solia na kawa vua na tuakana.

¹⁰ Ia na ka sa cakava ko koya sa ca e na mata i Jiova: a sa qai vakamatei koya talega.

¹¹ A sa kaya ko Juta vei Tamari na vugona, Mo tiko dawai ga e na vale i tamamu, ka me tubu mada ko Sela na luvequ: ni sa kaya ko koya, De mate ko koya talega, me vakai rau na tuakana. A sa lako ko Tamari ka tiko e na vale i tamana.

¹² Ia ni sa oti na gauna levu sa mate na luvena alewa ko Sua, o koya na wati i Juta; a sa vakalecataki ko Juta, a sa lako cake ki Timinaci vei ira na tamata era kotiva na nona sipi, ko koya kei na nonai tau ko Ira na kai Etulama.

¹³ A sa tukuni vei Tamari, ka vaka, Raica, sa lako cake ki Timinaci na vugomu me kotiva na nona sipi.

¹⁴ A sa luvata tani na nonai sulu vakadawai, ka puloutaki koya e nai sulu ni mata, ka vakaisulutaki koya, ka laʼki tiko e na yasana vakarairai, a ya mai na bati ni sala sa lako ki Timinaci; ni sa raica ko koya ni sa levu ko Sela, a sa sega ni musu vua me watina.

¹⁵ A sa kunea ko Juta, ka nanumi koya me alewa dauyatagane; e na vuku ni ka puloutaka na matana ko koya.

¹⁶ A sa lako vakatiki-tiki tani vua e na sala, ka kaya, Meʼu curu mada vei iko, ne; (ni sa tawa kila ni sa vugona). A sa kaya ko koya, A cava ko na solia vei au, mo curu mai vei au?

¹⁷ A sa kaya, Au na vakauta vei iko e dua na luve ni koti mai na qele ni koti. A sa kaya ko koya, O na solia beka na kenai vakadinadina, mo qai tala mai?

¹⁸ A sa kaya, A cava na ka me kenai vakadinadina meʼu solia vei iko? A sa kaya ko koya, A nomu mama, kei na nomu wa, kei nai titoko sa tiko e ligamu. A sa solia vua ko koya, a sa laʼki curu vua, a sa kunekune vua ko koya.

¹⁹ A sa tu cake ko koya, ka lako yani, a sa luvata tani vua na nona pulou, ka suluma na nonai sulu vakadawai.

²⁰ A sa tala na nonai tau na kai Etulama ko Juta me kauta na luve ni koti, me kau mai kina nai vakadinadina mai vua na alewa: ka sa sega ni kunei koya.

²¹ A sa tarogi ira na lewe ni koro ni alewa ko ya, ka kaya, Sa evei na alewa dauyatagane ka tiko vakarairai e na bati ni sala? A ra sa kaya; Sa sega na alewa dauyatagane eke.

²² A sa lesu vei Juta, ka kaya, Au sa sega ni kunei koya; a ra kaya talega na tamata e na yasana ko ya, Sa sega na alewa dauyatagane eke.

²³ A sa kaya ko Juta, Me kauta mada ko koya, de da madua: raica, kaʼu a vakauta na luve ni koti o qo, ia ko sa tawa kunei koya.

²⁴ A sa yaco ni sa oti na vula e tolu, sa qai tukuni vei Juta, ka vaka, Ko Tamari na vugomu sa ia na dauyatagane; ka, raica, sa bukete talega ko koya e na dauyatagane. A sa kaya ko Juta, Dou kauti koya mada mai kitautuba, me mai vaka-mai.

²⁵ Ia ni sa kauti mai kitautuba, sa talaki vua na vugona, ka kaya, Au sa bukete vua na tamata sa nona o qo: a sa kaya ko koya, Mo kila mada se sa nei cei na ka o qo, na mama, kei na wa, kei nai titoko.

²⁶ A sa kila ko Juta, ka kaya, Sa dodonu vei keirau ko koya; e na vuku niʼu a sega ni soli koya vei Sela na luvequ. A sa tawa kilai koya tale.

²⁷ A sa yaco e na siga sa vakasucu kina, raica, sa drua e ketena.

²⁸ Ia ni sa vakasucu tiko, sa dodoka yani na ligana e lewe dua: a sa taura na tina-ni-gone, ka viviraka na liga ko ya e na vulovulo damudamu, ka kaya,

⁰ qo sa lako mai eliu.

²⁹ Ia ni sa kauta tale na ligana kiloma, raica, sa lako mai na tacina: a sa kaya na tina-ni-gone, O sa basuka vakaevei? ena nomu na basubasu: o koya sa vakatokai kina na yacana ko Feresi [A basubasu].

³⁰ A sa oti, sa qai lako mai na tuakana, o koya ka vivi na ligana e na vulovulo damudamu: a sa vakatokai na yacana ko Sera.