Vakatekivu 35 - AI VOLA TABU

Sa lako ki Peceli ko Jekope me soro, 1-7. Sa mate ko Tipora, 8. Sa vosavakalougatataki Jekope tale ko Jiova, 9-15. Sa mate ko Repeka, 16-20. O ira na luve i Jekope, 23-26. Sa mate ko Aisake, 27-29.

¹ A SA kaya na Kalou vei Jekope, Tu cake, mo lako cake ki Peceli, ka tiko maikea: ka cakava maikea e dua nai cabocabo-ni-soro vua na Kalou, o koya ka rairai vei iko ni ko a drotaka na mata i Iso na tuakamu.

² A sa kaya ko Jekope vei ira na nona lewe-ni-vale, kei ira kecega era tiko kaya, Dou biuta tani na kalou ni kai tani sa tiko kei kemudou, dou savasava talega, ka vakaisulu e nai sulu tani:

³ ia tou yavala mada, tou lako cake ki Peceli; kaʼu na cakava maikea e dua nai cabocabo-ni-soro vua na Kalou, o koya ka rogoci au e na siga kaʼu a rarawa kina, ka tiko kei au e na sala kaʼu a lako kina.

⁴ A ra sa solia vei Jekope na kalou kecega ni kai tani sa tu e ligadra, kei na sau sa tu e daligadra; a sa vunia ko Jekope e ruku ni oki a ya sa tu mai Sikemi.

⁵ A ra sa lako voli yani: a sa tauva na veikoro sa voliti ira na rere vua na Kalou, a ra sega kina ni vakasavi ira na luve i Jekope.

⁶ A sa lako mai ko Jekope ki Lusa, mai na vanua ko Kenani, ko ya ko Peceli, o koya kei ira kece na tamata era tiko kaya.

⁷ A sa cakava maikina e dua nai cabocabo-ni-soro, ka vakayacana na yasana ko ya ko Eli-Peceli: e na vuku ni sa rairai vua maikea na Kalou, ni sa drotaka ko koya na mata i tuakana.

⁸ A sa ciba ko Tipora na vada i Repeka, a sa buluti mai na ruku i Peceli, e na ruku ni dua na oki: a sa vakatokai na yacana ko Aloni-pakuci [A oki ni tagi].

⁹ A sa rairai tale na Kalou kivei Jekope, ni sa lako mai Petani-erama, a sa vosavakalougatataki koya.

¹⁰ A sa kaya vua na Kalou, Sai ko Jekope na yacamu; ia ena sega ni kacivi tiko na yacamu ko Jekope, ena ko Isireli ga na yacamu: a sa vakatoka na yacana ko Isireli.

¹¹ Sa kaya vua talega na Kalou, Oi au na Kalou Kaukauwa: mo luvea, ka lewe vuqa mai; a matanitu, ia na matanitu e vuqa, ena tubu maivei iko, ka na lako mai na tolomu na turaga lelevu;

¹² a vanua talega kaʼu a solia vei Eparaama kei Aisake, au na solia vei iko; vei ira talega na nomu kawa era muri iko, kaʼu na solia na vanua ko ya.

¹³ A sa lako cake tani vua na Kalou, mai na yasana ka vosa kina vua.

¹⁴ A sa vakaduria na duru ko Jekope e na tikina ka vosa kina vua ko koya, io na duru vata: a sa livia ki delana nai madrali liviraki, sa livia talega ki delana na waiwai:

¹⁵ a sa vakatoka ko Jekope na yaca ni yasana ka vosa kina vua na Kalou ko Peceli.

¹⁶ A ra sa lako voli yani mai Peceli; a sa lekaleka na sala me yaco ki Efiraca: a sa vakasucu ko Rejeli, a sa rarawa vakalevu ni vakasucu.

¹⁷ Ia ni sa taratara rarawa vakalevu, sa kaya vua ko koya na tina-ni-gone, Kakua ni rere; ena dua tale vei iko na goneatagane o qo.

¹⁸ A sa yaco ni sa lako na yalona, (ka ni sa ciba,) sa vakatoka na yacana ko Peni-oni [A gone kaʼu rarawa kina]: ia ko tamana sa vakatoka ko Penijamini [A gone ni liga i matau].

¹⁹ A sa ciba ko Rejeli, a sa buluti e na sala sa lako ki Efiraca, ko ya ko Pecileema.

²⁰ A sa vakaduria e dua na duru ko Jekope, e na dela ni nonai bulubulu: ko ya na duru ni bulubulu i Rejeli, ka yacova kaya na gauna o qo.

²¹ A sa lako voli yani ko Isireli, ka sa birika na nona vale gatu me sivia na vale cecere mai Eteri.

²² A sa yaco ni sa tiko ko Isireli e na vanua ko ya, sa lako ko Rupeni ka koto kei Pila na wati lailai i tamana: a sa rogoca ko Isireli. Ia ko ira na luvena tagane ko Jekope sa tinikarua:

²³ Na luve i Lia; ko Rupeni, na ulumatua i Jekope, kei Simioni, kei Levi, kei Juta, kei Isakari, kei Sepuloni:

²⁴ na luve i Rejeli; ko Josefa, kei Penijamini:

²⁵ kei na luve i Pila, na vada i Rejeli; ko Tani, kei Nafitali:

²⁶ kei na luve i Silipa, na vada i Lia; ko Kata, kei Aseri: o ira o qo na luve i Jekope sa sucu vua mai Petani-erama.

²⁷ A sa lako mai ko Jekope kivei Aisake na tamana mai Mamire, ki na koro i Aripa, ko ya ko Hepironi, ka dautiko vulagi kina ko Eparaama kei Aisake.

²⁸ Ia na siga i Aisake e dua na drau ka walusagavulu na yabaki.

²⁹ A sa ciba ko Aisake, ka mate yani, a sa kumuni vata vei ira na kai nona, ni sa qase ka mamau e na siga: a rau sa buluti koya na luvena ko Iso kei Jekope.