Vakatekivu 27 - AI VOLA TABU

Sa vakaroti Iso ko Aisake, 1-5. Sa vakavulici Jekope ko tinana me vakaisini Aisake, 6-17. Sa kauta na kei Aisake ko Jekope, ka sa lasutaki tamana, ka sa vosavakalougatataki kina, 18-29. Sa qai lako ko Iso, a sa rarama vakalevu ni sa butakoca ko Jekope na vosa me vakalougatataki kina, 30-40. Sa cati Jekope ko Iso, 41. Sa talai tani ko Jekope, 42-46.

¹ A SA yaco, ni sa qase mai ko Aisake, a sa kabukabu na matana, me tawa rai rawa, sa qai kacivi Iso na luvena sa ulumatua, a sa kaya vua, Na luvequ. A sa kaya vua, Raica, koi au.

² A sa kaya vua ko Aisake, Raica, kaʼu sa qase mai, au sa sega ni kila na siga kaʼu na mate kina:

³ ia o qo, mo kauta mada na nomui yaragi, na nomu taga gasau kei na nomu dakai, ka lako yani ki na veikau, ka tobo manumanu vei au;

⁴ ka cakava vei au na kakana kamikamica kaʼu sa vinakata, ka kauta mai vei au meʼu kania; ka me vosavakalougatataki iko na yaloqu, meʼu qai mate.

⁵ Ia ko Repeka sa rogoca ni sa vosa ko Aisake kivei Iso na luvena. A sa lako yani ki na veikau ko Iso me tobo manumanu, ka me kauta mai.

⁶ A sa vosa vei Jekope na luvena ko Repeka, ka kaya, Raica, kaʼu a rogoca ni sa vosa ko tamamu vei Iso na tuakamu, ni sa kaya,

⁷ Mo kauta mai vei au na manumanu sa tobo, ka cakava vei au na kakana kamikamica, meʼu kana kina, ka vosavakalougatataki iko e na mata i Jiova, meʼu qai mate.

⁸ Ia o qo, na luvequ, mo vakarorogo ki domoqu e na ka kaʼu sa vakarota vei iko.

⁹ Mo lako mada ki na qele ni koti, ka kauta maikina vei au e rua na luve ni koti vinaka: ia kaʼu na cakavi rau me kakana kamikamica me kei tamamu, me vaka sa dauvinakata ko koya:

¹⁰ ia ko na qai kauta vei tamamu, me kania ko koya, ka me vosavakalougatataki iko ni sa bula tiko.

¹¹ A sa kaya ko Jekope kivei Repeka na tinana, Raica, ko Iso na tuakaqu, sa tamata vutuvutua, ia koi au, kaʼu sa tamata drulua:

¹² de yamoci au ko tamaqu, ia kaʼu na qai vaka na dauveivaka-calai vua, kaʼu na vakayacora vei au na cudru, ka sega na kalougata.

¹³ A sa kaya vua ko tinana, Me yacovi au na ka ko na cudruvi kina, na luvequ: mo vakarorogo ga ki domoqu, ka laʼki kauta mai vei au.

¹⁴ A sa laʼki taura, ka kauta vei tinana: a sa cakava na kakana kamikamica na tinana, me vaka na ka sa dauvinakata ko tamana.

¹⁵ A sa tara ko Repeka nai sulu vinaka ka tiko kaya e na vale, nei Iso na luvena ko koya sa qase, a sa vakaisulutaki Jekope na luvena sa gone:

¹⁶ a sa vakaisulu-taka na ligana, kei na tiki ni domona sa drulua, e na kulidrau na luve ni koti:

¹⁷ a sa solia ki na liga i Jekope na luvena na kakana kamikamica, kei na madrai, ka cokonaka oti ko koya.

¹⁸ Asa lako vei tamana, ka kaya, I tamaqu. A sa kaya ko koya, Raica, koi au; o cei ko iko, na luvequ?

¹⁹ A sa kaya vei tamana ko Jekope, Oi au ko Iso na nomu ulumatua; au sa cakava na ka ko a kaya vei au: mo duri mada, mo tiko ka kania na noqu manumanu sa tobo, ka me vosavakalougatataki au na yalomu.

²⁰ A sa kaya vei na luvena ko Aisake, E vakaevei ni ko sa kunea vakasauri vakaoqo, na luvequ? A sa kaya, E na vuku ni sa kauta mai ki mataqu ko Jiova na nomu Kalou.

²¹ A sa kaya vei Jekope ko Aisake, Toro mada mai, meʼu yamoci iko, na luvequ, se dina ni sa luvequ ko Iso ko iko, se segai.

²² A sa torovi Aisake na tamana ko Jekope; a sa yamoca, a sa kaya, A domona na domo i Jekope, ia na ligana na liga i Iso.

²³ A sa sega ni kilai koya, e na vuku ni sa vutuvutua na ligana me vaka na liga i Iso na tuakana: a sa vosavakalougatataka.

²⁴ A sa kaya, O iko dina na luvequ ko Iso, se segai? A sa kaya, Sai au ga.

²⁵ A sa kaya ko koya, Kauta mai vei au, kaʼu na kania na manumanu sa toboka na luvequ, ka me vosavakalougatataki iko na yaloqu. A sa kauta vua, a sa kana: a sa kauta vua na waini, a sa gunu.

²⁶ A sa kaya vua ko Aisake na tamana, Toro mada mai, ka reguci au, na luvequ.

²⁷ A sa toro, ka reguci koya: a sa boica nai boiboi ni nonai sulu, a sa vosavakalougatataki koya, ka kaya, Raica, nai boiboi kei luvequ sa vaka nai boiboi ni veiwere sa vakalougatataka ko Jiova:

²⁸ ia me solia ga vei iko na Kalou na tegu kei lomalagi, kei na uro kei vuravura, ka levu na sila, kei na waini:

²⁹ me qaravi iko na veimataqali, ka cuva vei iko na veimatanitu: mo turaga vei ira na wekamu, ia me ra cuva vei iko na luve i tinamu; me cudruvi ko ira era sa cudruvi iko, ka kalougata ko ira era vosavakalougatataki iko.

³⁰ A sa yaco, ni sa vosavakalougataki Jekope oti ko Aisake, a sa qai lako tani walega ko Jekope mai na mata i Aisake na tamana, sa qai lako ko Iso na tuakana mai na nona tobo manumanu.

³¹ A sa cakava oti talega ko koya na kakana kamikamica, ka kauta mai vei tamana, a sa kaya vei tamana, Me duri mada na tamaqu, ka kania na manumanu sa toboka na luvena, ka me vosavakalougatataki au na yalomu.

³² A sa kaya vua ko Aisake na tamana, O cei ko iko? A sa kaya ko koya, Oi au na luvemu, na nomu ulumatua, ko Iso.

³³ A sa sautaninini vakalevu sara ko Aisake, ka kaya, Ko cei? sa evei ko koya sa tobo manumanu, ka kauta mai vei au, kaʼu sa kana kece oti kina, ni ko a sega ni yaco mai, ia kaʼu sa vosavakalougatataki koya oti? io, ena kalougata ko koya.

³⁴ Ni sa rogoca na vosa i tamana ko Iso, sa tagi vakalevu e na qoqolou rarawa sara, a sa kaya vei tamana, Mo vosavakalougatataki au, io koi au talega, na tamaqu!

³⁵ A sa kaya, Sa lako vaqaseqase mai ko tacimu, a sa kauta tani na vosa mo vakalougatataki kina.

³⁶ A sa kaya ko Iso, Sa sega beka ni vakayacani ko koya ko Jekope [Qase-qase]? ni sa caka vaqaseqase vei au vakarua o qo: sa kauta tani na noqu ulumatua eliu; ka, raica, sa qai kauta tani o qo na vosa meʼu vakalougatataki kina. A sa kaya, O sa sega beka ni maninitaka e dua na vosa meʼu vakalougatataki kina?

³⁷ A sa vosa vei Iso ko Aisake, ka kaya, Raica, kaʼu sa cakavi koya me turaga vei iko, a sa soli ira kecega na wekana me qaravi koya; a sa vakaukauwataki koya e na sila kei na waini: ia na cava meʼu qai cakava vei iko, na luvequ?

³⁸ A sa kaya vei tamana ko Iso, Sa dua bau li na nomu vosa veivakalougatataki, na tamaqu? mo mani vosavakalougatataki au, io koi au talega, na tamaqu! A sa tabalaka na domona ko Iso, ka tagi.

³⁹ A sa vosa ko Aisake na tamana, a sa kaya vua, Raica, na nomui tikotiko ena yawa mai na uro kei vuravura, kei na tegu kei lomalagi maicake:

⁴⁰ ia ko na bula e na nomui seleiwau, ka qaravi koya na tacimu: ia ena yaco ni ko sa tadede, ko na qai musuka tani na nonai vau mai na domomu.

⁴¹ A SA cati Jekope ko Iso, e na vuku ni vosa ni veivakalougatataki sa vosavakalougatataki koya kina ko tamana: a sa kaya e lomana ko Iso, Sa voleka na veisiga eda tagicaki tamaqu kina, au na qai vakamatei Jekope na taciqu.

⁴² A sa tukuni vei Repeka na vosa o qo ni nona ulumatua ko Iso. A sa talaki ka kacivi Jekope na luvena sa gone, a sa kaya vua, Raica, ko tuakamu ko Iso, sa vakalecataki koya e na vukumu, ni sa nakita me vakamatei iko:

⁴³ ia o qo, mo vakarorogo mada ki domoqu, na luvequ; ka tu cake, mo dro vei Lepani na ganequ mai Karani:

⁴⁴ ka tiko kaya ka bogi vica walega, ka me saumaki tani mada na cudru katakata i tuakamu;

⁴⁵ ka me saumaki tani mada vei iko na cudru i tuakamu, a sa guilecava na ka ko sa cakava vua: au na qai talaki vei iko, ka kauti iko maikea: a cava mo drau yali ruarua kina vei au e na siga e dua?

⁴⁶ A sa kaya vei Aisake ko Repeka, Sa musuki na noqu bula e na vukudra na gonealewa i Eci: kevaka sa veiwatini ko Jekope kei na dua vei ira na gonealewa i Eci, sa vakai ira na gonealewa ni vanua o qo, a cava na kena yaga vei au na noqu bula?