Vakatekivu 25 - AI VOLA TABU

A kawa i Eparaama ni sa watina ko Ketura, 1-4. Sa vota na nona yau, a sa mate, 5-10. A kawa i Isimeeli, 12-18. Sa sucu ko Jekope kei Iso, 19-26. Sa volitaka na nona ka ni ulumatua ko Iso, 29-34.

¹ A SA laʼki vakawati tale ko Eparaama, ia na yaca ni alewa ko Ketura:

² a sa vakasucumi Simirani, kei Jokisani, kei Metani, kei Mitiani, kei Isipaki, kei Sua, vei koya.

³ A sa sucu vei Jokisani ko Sipa, kei Titani. Ia na goneatagane i Titani, ko Asuri, kei Letusi, kei Leumi.

⁴ Ia na goneatagane i Mitiani, ko Ifa, kei Iferi, kei Enoke, kei Apaita, kei Elitea. O iratou kece o qo na luve i Ketura.

⁵ A sa solia ko Eparaama na nona ka kecega vei Aisake.

⁶ Ia vei ira na luvedratou na watina lalai i Eparaama, sa solia e so na ka ni loloma ko Eparaama, ka talai ira tani maivei Aisake na luvena, (ni sa bula tiko,) kivaka ki cake, ki na vanua e cake.

⁷ Ia sa vakaoqo na siga ni yabaki ni bula i Eparaama, a ya ka bula kina ko koya, e dua na drau ka vitusagavulu ka lima na yabaki.

⁸ Sa qai ciba ko Eparaama, ka mate yani, ni sa qase vinaka mai, ia sa tamata qase, ka mamau; a sa kumuni vei ira na kai nona.

⁹ Ia koi rau na luvena ko Aisake kei Isimeeli, erau a buluta e na qara-vatu mai Makipila, e nona tiki ni vanua ko Efironi na luve i Sobari na luve i Eci, a ya sa donui Mamire;

¹⁰ na tiki ni vanua ka volia ko Eparaama maivei ira na luve i Eci: sa buluti maikina ko Eparaama kei Sera na watina.

¹¹ Ia ni sa mate ko Eparaama, sa vakalougatataki Aisake na luvena na Kalou: a sa tiko ko Aisake mai nai keli-wai ko Leai-roi.

¹² Ia sa vakaoqo nai tukutuku ni kawa i Isimeeli, na luve i Eparaama, o koya sa vakasucuma vei Eparaama ko Ekari, na kai Ijipita, na vada i Sera:

¹³ ia sa vakaoqo na yacadra na luvena tagane ko Isimeeli, e na yacadra me vaka na nodra veimataqali: na ulumatua i Isimeeli, ko Nepeioci, kei Kitari, kei Atipieli, kei Mipisami,

¹⁴ kei Misima, kei Tuma, kei Masa,

¹⁵ ko Etari, kei Tema, ko Jeturi, ko Nefisi, kei Ketema:

¹⁶ o ira o qo na luve i Isimeeli, o qo talega na yacadra, me vaka na nodra veikoro kaukauwa, kei na nodra vale ni valu; e tinikarua na turaga me vaka na nodra veivanua.

¹⁷ Ia sa vakaoqo na yabaki ni bula i Isimeeli, e dua na drau ka tolusagavulu ka vitu na yabaki: a sa ciba ko koya, ka mate yani, a sa kumuni vei ira na kai nona.

¹⁸ A ra sa taukena na vanua mai Avila ka kauta ki Suri, a ya sa donui Ijipita, mai na sala vaka ki Asiria: sa yalani ko koya e donui ira na wekana kecega.

¹⁹ A SA vakaoqo nai tukutuku ni kawa kei Aisake, na luve i Eparaama: sa sucu vei Eparaama ko Aisake:

²⁰ ia sa vasagavulu na yabaki i Aisake, ni sa kauti Repeka me watina, a ya na luve i Pecueli na kai Siria mai Petani-erami, na gane i Lepani na kai Siria.

²¹ A sa vakamasuti Jiova ko Aisake e na vuku ni watina, ni sa yava: a sa vakarorogo vua ko Jiova, a sa kunekune ko Repeka na watina.

²² A rau sa veivala na gone e ketena: a sa kaya ko koya, Kevaka sai koya, a cava kaʼu sa vakaoqo kina? A sa laʼki tarogi Jiova.

²³ A sa kaya vua ko Jiova, E rua na matanitu sa tiko e ketemu, ia e rua na vanua mai na ketemu, erau na tawasei; ia ena kaukauwa na vanua e dua ka malumalumu na vanua e dua; ia ko koya sa qase ena qaravi koya sa gone.

²⁴ Ia ni sa yaco na siga me vakasucu kina, raica, sa drua e ketena.

²⁵ A sa sucu mai nai kadua ka sa damudamu taucoko, sa vaka e dua nai sulu vutivuti; a ra sa vakayacana ko Iso:

²⁶ a sa oti, sa qai lako mai na tacina, a sa taura tu na bukubuku-ni-yava i Iso na ligana; a sa vakayacani ko Jekope: a sa onosagavulu na yabaki i Aisake ni rau sa sucu.

²⁷ A rau sa tubu na gone: a sa yaco me tamata vuku e na tobo manumanu e yavai va ko Iso, a tamata ni veikau; ia ko Jekope na tamata vala malua, a sa tiko e na vale malo.

²⁸ A sa lomani Iso ko Aisake, e na vuku ni sa daukania na manumanu sa tobo; ia ko Repeka sa lomani Jekope.

²⁹ A sa vakasasaqa kakana ko Jekope: a sa lako mai na veikau ko Iso, a sa viakana:

³⁰ a sa kaya vei Jekope ko Iso, Mo vakani au mada e na damudamu ko ya; niʼu sa viakana: (o koya sa vakatokai kina na yacana ko Itomi [Damudamu].)

³¹ A sa kaya ko Jekope, Mo volitaka edaidai vei au na nomu ulumatua.

³² A sa kaya ko Iso, Raica, kaʼu sa laʼki mate; ka cava na kena yaga vei au na ulumatua?

³³ A sa kaya vua ko Jekope, Mo vosavavakini vei au edaidai: a sa vosavavakini vua; a sa volitaka na nona ulumatua vei Jekope.

³⁴ A sa solia vei Iso ko Jekope na madrai, kei na kakana pini; a sa kana ka gunu, ka tu cake, ka lako yani. Ia sa beca ko Iso na ulumatua.