Vakatekivu 23 - AI VOLA TABU

A mate i Sera, 1, 2. Sa volia ko Eparaama e dua na tiki ni vanua mei bulubulu, a sa buluti Sera, 3-20.

¹ Ia ko Sera, sa dua na drau ka ruasagavulu ka vitu na nona yabaki: o qo na veiyabaki ni bula i Sera.

² Sa ciba ko Sera mai Kiriaci-aripa, ko ya ko Hepironi, e na vanua ko Kenani: a sa lako mai ko Eparaama me yasovaki Sera, ka tagicaki koya.

³ A sa tu cake ko Eparaama mai na mata ni nona mate, ka vosa vei ira na luve i Eci, a sa kaya,

⁴ Oi au na kai tani ka sa tiko vakavulagi vei kemudou: dou solia mai me noqu e dua na tiki ni vanua me mara vei kemudou, meʼu buluta kina na noqu mate me yali kina ki mataqu.

⁵ A ra sa vosa vei Eparaama na luve i Eci, a sa kaya vua,

⁶ Mo rogoci keitou mada, noqu turaga: o iko na turaga vaka na kalou e na keimami maliwa: e na nei-mami mara digitaki mo buluta nomu mate: sa sega e dua na tamata me bureitaka vei iko na nonai bulubulu, mo kakua kina ni buluta nomu mate.

⁷ A sa tu cake ko Eparaama, ka cuva vei ira na lewe ni vanua, io vei ira na luve i Eci;

⁸ a sa veivosaki kei ira, ka kaya, Kevaka sa lomamudou meʼu buluta na noqu mate me yali ki mataqu, dou rogoci au, ka vakamasuti Efironi na luve i Sobari e na vukuqu,

⁹ me solia vei au na qara-vatu mai Makipila, a ya sa nona, sa koto mai na yalayala ni nona veiwere: ia me solia mada me noqu, meʼu solia kina vua na kenai voli dodonu e nai lavo, ka me noqu tiki ni vanua me mara e na kemudou maliwa.

¹⁰ A sa tiko e na kedra maliwa na luve i Eci ko Efironi. A sa vosa vei Eparaama ko Efironi na luve i Eci, ni ra rogoca tiko na luve i Eci, io ko ira kecega ka ra curuma na matamata-ni-koro ni nona koro, a sa kaya,

¹¹ Me kakua, noqu turaga, mo rogoci au: a tiki ni vanua ko ya, kaʼu sa solia vei iko, kei na qara-vatu sa tiko kina, kaʼu sa solia vei iko; e na mata ni luvedra na noqu mataqali, kaʼu sa solia vei iko: buluta mada na nomu mate.

¹² A sa cuva sobu e matadra na lewe ni vanua ko Eparaama;

¹³ a sa vosa vei Efironi ni ra rogoca tiko na lewe ni vanua, a sa kaya, Kevaka sa vinaka vei iko, mo rogoci au mada: au na solia nai lavo mei voli ni tiki ni vanua; mo taura mada vei au, kaʼu na qai buluta maikina na noqu mate.

¹⁴ A sa vosa vei Eparaama ko Efironi, a sa kaya vua,

¹⁵ Mo rogoci au mada, noqu turaga: a tiki ni vanua ko ya, sa va na drau na sikeli siliva na kenai voli; a cava o qo vei kedaru? buluta ga na nomu mate.

¹⁶ A sa vakarorogo vei Efironi ko Eparaama: a sa vakarautaka na siliva ko Eparaama me nei Efironi, a ya ka cavuta ko koya ni ra rogoca na luve i Eci, e va na drau na sikeli siliva, nai lavo era dauveivoli kina ko ira na tamata dauveivoli.

¹⁷ Ia na tiki ni vanua nei Efironi a ya mai Makipila, sa donui Mamire, na tiki ni vanua, kei na qara-vatu sa koto kina, kei na kau kecega e na tiki ni vanua ko ya, a ya sa volita na kena veiyasana kecega, sa vaka-taudeitaki

¹⁸ vei Eparaama me nona, e matadra na luve i Eci, e nodra maliwa kecega ka ra curuma na matamata-ni-koro ni nona koro.

¹⁹ A sa oti na ka o qori, sa qai buluti Sera na watina ko Eparaama e na qara-vatu e na tiki ni vanua mai Makipila, sa donui Mamire: ko ya ko Hepironi mai na vanua ko Kenani.

²⁰ Ia na tiki ni vanua, kei na qara-vatu sa koto kina, sa vakataudeitaki vei Eparaama, me nona vanua ni mara, maivei ira na luve i Eci.