Vakatekivu 22 - AI VOLA TABU

Sa vosa vei Eparaama ko Jiova me cabora na luvena, 1, 2. A sa vakabauta ko Eparaama; a sa tarova na Kalou; a sa qai cabora na sipi mei sosomi ni luvena, 3-14. Sa vosavakalougatataki Eparaama na Kalou, 15-19. A kawa ni tuaka i Eparaama, 20-24.

¹ IA ni sa oti na ka o qori, sa qai vakatovolei Eparaama na Kalou, a sa kaya vua, I Eparaama. A sa kaya ko koya, Raica, koi au.

² A sa kaya, Mo kauta mada na luvemu, na luvemu e dua bauga, o koya ko Aisake ko sa lomana, ka lako ki na vanua mai Moria; ka cabori koya maikina mei soro kama e na dela ni dua na ulu-ni-vanua kaʼu na vakatakila vei iko.

³ A sa sou e na sabogibogi ko Eparaama, ka vauca na vodovodo ki na nona asa, ka kauta kaya e rua na nona cauravou, kei Aisake na luvena, ka tasea na buka ni soro kama, ka ia, ka lako kivaka ki na yasana ka vosa kina vua na Kalou.

⁴ Ia e na kenai katolu ni siga sa ta cake e na matana ko Eparaama, ka raica na yasana ni sa vakayawa tu.

⁵ A sa kaya ko Eparaama vei rau na nona cauravou, Drau tikotiko ga eke kei na asa; ia keirau na lako kei na gone ki na yasana ko ya me soro, ka lako tale mai vei kemudrau.

⁶ A sa kauta na buka ni soro kama ko Eparaama, ka tauca vei Aisake na luvena; a sa taura lako e ligana na buka sa waqa, kei nai sele: a rau a lako ruarua vata.

⁷ A sa vosa ko Aisake vei Eparaama na tamana, ka kaya, I tamaqu. A sa kaya, Raica, koi au, na luvequ. A sa kaya ko Aisake, Raica, na buka kei na buka sa waqa; ia sa evei mada na lami mei soro kama?

⁸ A sa kaya ko Eparaama, Na luvequ, ena vakarautaki na Kalou vei koya na lami mei soro kama. A rau a lako vata ruarua tiko.

⁹ A rau a yaco ki na yasana ka vosa kina vua na Kalou; a sa cakava maikina nai cabocabo-ni-soro ko Eparaama, a sa tuva na buka; a sa vauci Aisake na luvena, ka tauca ki nai cabocabo-ni-soro, ki na dela ni buka.

¹⁰ A sa dodoka na ligana ko Eparaama, ka taura nai sele, me vakamatea na luvena.

¹¹ A sa kaci vua mai lomalagi ko koya na Agilose i Jiova, a sa kaya, I Eparaama, i Eparaama! A sa kaya, Raica, koi au.

¹² A sa kaya ko koya, Mo kakua ni dodoka na ligamu vua na gone, ia mo kakua ni kitaka vua e dua na ka: niʼu sa qai kila ni ko sa rerevaka na Kalou, e na vuku ni ko sa tawa bureitaka vei au na luvemu, na luvemu e dua bauga.

¹³ A sa ta cake e na matana ko Eparaama, ka rai voli, ka, raica, sa tiko mai dakuna e dua na sipi tagane sa tacori e na kau na kena kaukamea; a sa laʼki taura mai na sipi tagane ko Eparaama, ka cabora mei soro kama mei sosomi ni luvena.

¹⁴ A sa kaciva na yaca ni yasana ko ya ko Eparaama ko Jiova-jaire [Ena vakarau-taka ko Jiova]: me vaka sa kainaki ka yacova na siga o qo, Mai na ulu-ni-vanua ena vakarautaka ko Jiova.

¹⁵ A sa kaci vakarua vei Eparaama mai lomalagi ko koya na Agilose i Jiova,

¹⁶ a sa kaya, Sa vaka ko Jiova, Au sa vosavavakini ki na yacaqu; e na vuku ni ko sa cakava na ka o qo, ka sa tawa bureitaka na luvemu, na luvemu e dua bauga;

¹⁷ au na vakalougatataki iko vakalevu, ka vakavu-qataka vakalevu na nomu kawa me ra vaka na kalokalo ni lomalagi, kei na nuku mai na matasawa; ia ena taukena na nomu kawa na matamata-ni-koro ni nodra meca:

¹⁸ ena kalougata talega na veimatanitu kecega e vuravura e na nomu kawa; e na vuku ni ko a vakarorogo ki domoqu.

¹⁹ A sa lesu tale vei rau na nona cauravou ko Eparaama; a ratou a tu cake ka lako vata ki Pieri-sepa: a sa tiko mai Pieri-sepa ko Eparaama.

²⁰ Ia ni sa oti na ka o qo sa tukuni vei Eparaama, ka vaka, Raica, ko Milika, sa vakasucu gone talega vei Neori na tuakamu;

²¹ ko Usa na nona ulumatua, kei Pusa na tacina, kei Kemueli na tama i Erama,

²² kei Kiseti, kei Eso, kei Pilitasa, kei Jetilafi, kei Pecueli:

²³ (ia ka sa sucu vei Pecueli ko Repeka:) o iratou na lewe walu o qo sa vakasucuma ko Milika vei Neori na tuaka i Eparaama.

²⁴ A watina lailai talega, na yacana ko Reuma, sa vakasucumi Tipa, kei Keama, kei Ceasi, kei Meeka.