Vakatekivu 21 - AI VOLA TABU

Sa sucu ko Aisake, 1-8. Sa vakatalai tani ko Ekari kei Isimeeli, a sa kolai mate e na via-gunu, a sa vakarautaki na wai, 9-21. Sa ia na veiyalayalati kei Eparaama ko Apimeleki, 22-34.

¹ A SA talevi Sera ko Jiova me vaka ka kaya eliu, a sa cakacaka vei Sera ko Jiova me vaka na nona vosa eliu.

² A sa kunekune ko Sera, ka vakasucuma vei Eparaama e dua na luvena tagane ni sa qase mai ko koya, e na gauna ka loku, a ya ka vosa kina vua na Kalou.

³ A sa vakatoka ko Eparaama na yaca ni luvena ka sucu vua, a ya ka vakasucuma vua ko Sera, ko Aisake.

⁴ A sa cilivi Aisake na luvena ko Eparaama, ni sa walu na nona bogi, me vaka ka vakarota oti vua na Kalou.

⁵ A sa dua na drau na yabaki i Eparaama, ni sa sucu vua na luvena ko Aisake.

⁶ A sa kaya ko Sera, Sa vakadredretaki au na Kalou; era na dredre kece kei au ko ira era rogoca.

⁷ Sa kaya talega ko koya, O cei me kaya vei Eparaama eliu, ni na vakasucu gone ko Sera? niʼu sa vakasucuma e dua na luvena tagane ni sa qase mai ko koya.

⁸ A sa tubu na gone, a sa kali: a sa cakava e dua na magiti levu ko Eparaama e na siga ka kali kina ko Aisake.

⁹ Ia ko Sera sa raica na luve i Ekari na kai Ijipita, a ya na gone ka vakasucuma vei Eparaama, ni sa ia na veivakalialiai.

¹⁰ A sa kaya kina ko koya vei Eparaama, Mo vakatala yani na alewa bobula o qo kei na luvena: ni na sega ni taukei vata na luvena na alewa bobula o qo kei na luvequ, io kei Aisake.

¹¹ A sa ca vakalevu vei Eparaama na ka o qori, ka e na vuku ni luvena.

¹² A sa kaya vei Eparaama na Kalou, Me kakua ni ca vei iko e na vuku ni gone, kei na vukuna na nomui alewa bobula: na ka kecega sa kainaka vei iko ko Sera, mo vakarorogo ki domona; ni na vakayacani me nomu na kawa i Aisake ga:

¹³ ia kaʼu na cakavi koya na luvena na alewa bobula talega me matanitu, e na vuku ni sa nomu kawa.

¹⁴ A sa sou e na sabogibogi ko Eparaama, ka kauta na kakana, kei na saqa wai, ka solia vei Ekari, ka tauca ki na usouso ni domona, kei na gone, ka tala yani: a sa lako yani ko koya, a sa lako sese voli mai na lekutu mai Pieri-sepa.

¹⁵ A sa oti na wai e na saqa, a sa biuta ko koya na gone ki na ruku ni dua na kau:

¹⁶ a sa laʼki tiko me donuya, a kena yawa sa vaka beka na gasau ni sa vanataki: ni sa kaya ko koya, Meʼu kakua mada ni raica ni sa ciba na gone. A sa tiko sa donuya, a sa tabalaka na domona, ka tagi.

¹⁷ A sa rogoca na domo ni gone na Kalou; a sa kaci vei Ekari na agilose ni Kalou mai lomalagi, a sa kaya vua, Ko sa vakaevei, Ekari? kakua ni rere; ni sa rogoca na Kalou na domona na gone e na tikina sa tu kina:

¹⁸ mo tu cake, mo laveta cake na gone, ka taura e ligamu; niʼu na cakavi koya me matanitu levu.

¹⁹ A sa vakayadrata na matana na Kalou, a sa kunea e dua nai keli ni wai; a sa lako ko koya, ka vakasinaita na saqa e na wai, ka vagunuva na gone.

²⁰ A sa tiko kei na gone na Kalou; a sa tubu ko koya, ka tiko mai na lekutu, ka yaco me tamata dauvanavana.

²¹ A sa tiko mai na lekutu mai Perana: a sa kauta vua e dua me watina mai na vanua ko Ijipita ko tinana.

²² Ia e na gauna ko ya, erau a vosa kina vei Eparaama ko Apimeleki, kei Fikoli na turaga ni nonai valu, ka rau kaya, Sa tiko kei iko na Kalou e na ka kecega ko sa cakava:

²³ mo ia mada eke na vosa vavakini ki na Kalou vei au ni ko na sega ni cakacaka vakailasu vei au, se vua na luvequ, se na luve ni luvequ: mo cakacaka ga vei au, kei na vanua ko sa tiko vulagi kina, me vaka na loloma kaʼu sa cakava vei iko.

²⁴ A sa kaya ko Eparaama, Au na vosavavakini.

²⁵ A sa vunauci Apimeleki ko Eparaama e na vuku ni keli ni wai, ka ra kovea na tamata i Apimeleki.

²⁶ A sa kaya ko Apimeleki, Au sa sega ni kila se ko cei sa cakava na ka o qo: ia ko iko talega ko a tawa tukuna vei au, ia kaʼu a sega talega ni rogoca koi au, ka edaidai ga.

²⁷ A sa kauta na sipi kei na karavau ko Eparaama, ka solia vei Apimeleki; a rau a veiyalayalati koi rau.

²⁸ A sa tura e vitu na lami alewa ko Eparaama me tu vakai iratou.

²⁹ A sa kaya vei Eparaama ko Apimeleki, Sa vakaevei na lami alewa e vitu o qo, ko sa tura me tu vakai iratou?

³⁰ A sa kaya, Mo kauta mada vei au na lami alewa e vitu, me ratou noqui vakatakilakila, ni kaʼu sa kelia nai keli-wai o qo.

³¹ O koya sa vakatokai kina na tikina ko ya ko Pieri-sepa [Ai keli-wai ni vosa vavakini]; e na vuku ni rau a vosavavakini ruarua.

³² A rau sa ia na veiyalayalati mai Pieri-sepa: sa qai tu cake ko Apimeleki, kei Fikoli na turaga ni nonai valu, a rau a lesu tale ki na vanua ko Filisitia.

³³ A sa tea mai Pieri-sepa e dua na veikau ko Eparaama, ka masuta maikina na yaca i Jiova, na Kalou e tawa mudu.

³⁴ A sa vuqa na siga sa tiko kina ko Eparaama e na vanua ko Filisitia.