Vakatekivu 18 - AI VOLA TABU

E tolu na agilose sa lako vei Eparaama, a sa caka kedratou ko koya, 1-8. Sa vakatitiqa ko Sera ni na dua na luvena, 9-15. Sa tukuni vei Eparaama na ka ena yacovi Sotoma, 16-22. Sa vakamamasu ko Eparaama, 23-33.

¹ ASA rairai vua ko Jiova e na kau e so mai Mamire: a sa tiko ko koya e na katuba ni vale gatu ni sa katakata na siga:

² a sa ta cake e na matana ka rai voli, ka, raica, sa tu voleka vua e lewe tolu na tamata: ia ni sa raici iratou, sa cici mai na katuba ni vale gatu me laʼki tavaki iratou, a sa cuva kivaka ki na qele,

³ a sa kaya, Noqu Turaga, kevaka kaʼu sa kune loloma e matamu, mo kakua mada ni lako tani vua na nomu tamata:

⁴ me kauti mada mai e dua na wai lailai, mo dou vuya mada na yavamudou, ka vakacegu e na ruku ni kau:

⁵ ia kaʼu na kauta mai e dua na tiki ni madrai, ia dou vakalecataka mada na lomamu-dou; sa oti dou na qai lako yani: ni dou sa lako mai vua na nomudou tamata me vakakina. A ratou a kaya, Mo kitaka mada me vaka ko sa kaya.

⁶ A sa lako vakasauri ki loma ni vale gatu kivei Sera ko Eparaama, a sa kaya, Mo kusarawa mo cakava e tolu nai vaka-rau madrai droka; natuka, ka tavuna e na matadravu.

⁷ A sa ciciva na karavau ko Eparaama, ka kauta mai e dua na luve ni karavau sa malumalumu na lewena ka vinaka, a sa solia vua e dua na cauravou; a sa kusarawa ko koya ni cokonaka.

⁸ A sa kauta na uro ni wai-ni-sucu, kei na wai-ni-sucu, kei na luve ni karavau sa cokonaka oti, a sa viritu e matadratou; a sa tu voleka vei iratou e ruku ni kau, a ratou a kana.

⁹ A ratou a kaya vua, Sa evei ko Sera na watimu? A sa kaya ko koya, Raica, sa tiko mai vale.

¹⁰ A sa kaya ko koya, Au na lesu vakaidina mai vei iko me vaka na gauna ni bula; ka, raica, ena dua na luvena tagane ko Sera na watimu. A sa rogoca ko Sera mai na katuba ni vale gatu, a ya sa tu mai dakuna na agilose.

¹¹ A rau a qase mai ko Eparaama kei Sera, sa vuqa na nodrau yabaki; sa mudu vei Sera nai valavala vakaalewa.

¹² A sa dredre e lomana ko Sera, a sa kaya, Niʼu sa qase mai kaʼu na marau beka, ni sa qase talega na noqu turaga?

¹³ A sa kaya vei Eparaama ko Jiova, A cava sa; dredre kina ko Sera, ka vaka, Au na vakasucu vakaidina beka koi au, niʼu sa qase mai?

¹⁴ E dua beka na ka sa dredre vei Jiova? au na lesu mai vei iko e na gauna sa lokuci, me vaka na gauna ni bula, ia ena qai dua na luvena tagane ko Sera.

¹⁵ A sa caki ko Sera, ka kaya, Au a tawa dredre; ni sa rere ko koya. A sa kaya ko koya, E segai; ko a dredre ga.

¹⁶ A ratou a tu cake maikea na tamata, ka gole kivaka ki Sotoma: a sa lako vata kei iratou ko Eparaama me laʼki talatala.

¹⁷ A sa kaya ko Jiova, Au na vunia li vei Eparaama na ka kaʼu na cakava;

¹⁸ ni na yaco vakaidina ko Eparaama me matanitu levu ka kaukauwa, ena kalougata talega e na vukuna na veimatanitu kecega e vuravura?

¹⁹ niʼu sa kilai koya, ni na vakaroti ira na luvena kei na nona mataqali era na muri koya, era na vakabauta talega na sala i Jiova, me kitaka na ka dodonu, ka ia na lewa dodonu; me vakayacora kina ko Jiova vei Eparaama na ka ka vosa kina vua.

²⁰ Sa kaya talega ko Jiova, E na vuku ni sa ka levu nai tukutuku kei Sotoma kei Komora, a sa ka bibi sara na nodraui valavala ca;

²¹ au na lako sobu mada, ka raica se ra sa cakacaka me vaka sara na kenai tukutuku, a ya sa yacovi au; ia kevaka e segai, kaʼu na kila.

²² Ia koi rau na tamata, erau a gole tani maikea, ka lako kivaka ki Sotoma; ia ko Eparaama, sa tutu ga e na mata i Jiova.

²³ A sa laʼki toro vua ko Eparaama, ka kaya. O ni na vakarusa vata beka na yalododonu kei nai valavala ca?

²⁴ kevaka sa limasagavulu na yalododonu e loma ni koro ko ya: o na vakarusa beka ga, ka tawa vosota na koro ko ya e na vukudra na lewe limasagavulu era na kune kina?

²⁵ e yawa mada vei kemuni me cakacaka vakakoya, ka me vakamatea vata na yalododonu kei nai valavala ca: se me tautau-vata na yalododonu kei nai valavala ca, me yawa mada vei kemuni: ena tawa caka dodonu li Ko Koya sa lewai vuravura kecega?

²⁶ A sa kaya ko Jiova, Kevaka kaʼu sa kunea mai Sotoma e lewe limasagavulu na tamata yalododonu e loma ni koro, au na qai vosota na koro taucoko e na vukudra.

²⁷ A sa vosa ko Eparaama, ka kaya, Raica, kaʼu sa doudou mada ni vosa vua na noqu Turaga, oi au na kuvu ni soso kei na dravusa:

²⁸ Kevaka sa yali e lima vei ira na lewe limasagavulu na yalododonu: o na vakarusa beka na koro taucoko ni sa yali e lima? A sa kaya ko koya, Kevaka kaʼu sa kunea kina e lewe vasagavulu ka lima, kaʼu na tawa vakarusa.

²⁹ A sa vosa tale vua, ka kaya, Kevaka sa ra kune kina e lewe vasagavulu. A sa kaya, Au na sega ni kitaka e na vukudra na lewe vasagavulu.

³⁰ A sa kava, Me kakua mada ni cudru na noqu Turaga, ka meʼu vosa mada: Kevaka sa kune kina e lewe tolusagavulu. A sa kaya, Au na sega ni kitaka, kevaka kaʼu sa kunea kina e lewe tolusagavulu.

³¹ A sa kaya ko Eparaama, Raica, ka u sa doudou mada ni vosa vua na noqu Turaga: Kevaka sa kune kina e lewe ruasagavulu. A sa kaya, Au na sega ni vakarusa e na vukudra na lewe ruasagavulu.

³² A sa kaya, Me kakua mada ni cudru na noqu Turaga, ka meʼu vosa vakadua bulu tale: Kevaka sa kune kina e lewe tini. A sa kaya, Au na sega ni vakarusa e na vukudra na lewe tini.

³³ A sa lako yani ko Jiova, ni rau sa veivosaki oti kei Eparaama: a sa lesu tale ki na nona tikina ko Eparaama.