Vakatekivu 17 - AI VOLA TABU

Sa ia tale na veiyalayalati kei Eparama ko Jiova, ka me cilivi ko koya kei na nona kawa, 1-14. Sa vakayacani vou ko Eparama kei Serei, 5, 15. Sa yalataki ko Aisake, 15-22. Sa cilivi ko Eparaama kei ira na tagane e nona vale, 23-27.

¹ ASA ciwasagavulu ka ciwa na yabaki i Eparama, a sa qai rairai vei Eparama ko Jiova, a sa kaya vua, Oi au na Kalou Kaukauwa: mo lako voli e mataqu, ka mo tawa cala:

² ia kaʼu na vakayacora na noqu veiyalayalati kei iko, ka vakalevutaki iko vakalevu sara.

³ A sa bale vakatobocu ko Eparama: a sa vosa vua na Kalou, ka kaya,

⁴ Oi au, raica, sa tiko na noqu veiyalayalati kei iko, ia ko na tamadra na matanitu e vuqa:

⁵ ia ena tawa vakatokai tiko na yacamu ko Eparama, a yacamu ena ko Eparaama ga; niʼu sa cakavi iko me tamadra na matanitu e vuqa:

⁶ ia kaʼu na cakavi iko me levu sara na vuamu, ia kaʼu na cakavi iko me matanitu e so, a ra na tubu maivei iko na turaga lelevu:

⁷ ia kaʼu na vakataudeitaka na noqu veiyalayalati kei iko, kei ira na nomu kawa era na muri iko, e na nodrai tabatamata kecega, me veiyalayalati e tawa mudu, ka meʼu Kalou vei iko, vei ira talega na nomu kawa era na muri iko:

⁸ ia kaʼu na solia vei iko, kei ira na nomu kawa era na muri iko, na vanua ko sa tiko vulagi kina, a vanua kecega ko Kenani, ka me ra taukena ka tawa mudu; ia kaʼu na nodra Kalou.

⁹ Sa kaya talega na Kalou vei Eparaama, Mo vakabauta na noqu veiyalayalati, o iko, kei ira na nomu kawa era na muri iko, e na nodrai tabatamata kecega.

¹⁰ O qo na noqu veiyalayalati kei kemudou, kei na nomu kawa era na muri iko, mo dou vakabauta; Me cilivi mada na nomudou goneatagane kecega.

¹¹ Dou ciliva na kuli ni vusomudou; ia enai vakatakilakila, o qo ni noqu veiyalayalati kei kemudou:

¹² ia ko koya vei kemudou sa walu na nona bogi ena cilivi, na goneatagane kecega e na nomudoui tabatamata kecega; o koya sa sucu e na vale, se voli e nai lavo mai vua na kai tani kece, a ya sa sega ni nomu kawa:

¹³ me cili vakaidina, ko koya sa sucu e na nomu vale, kei koya sa voli e na nomui lavo: ia ena tu e na lewemudou nai vakatakilakila ni noqu veiyalayalati, me veiyalayalati e tawa mudu.

¹⁴ Ia na goneatagane sa tawa cilivi na kuli ni vusona, ena muduki laivi na tamata ko ya maivei ira na kai nona; sa vakacataka ko koya na noqu veiyalayalati.

¹⁵ Sa kaya talega na Kalou vei Eparaama, O Serei na watimu, mo kakua ni kaciva na yacana ko Serei, ni na ko Sera ga na yacana:

¹⁶ ia kaʼu na vakalougatataki koya, ka solia vei iko e dua na luvemu tagane mai vua; io, kaʼu na vakalougatataki koya, ena yaco talega ko koya me matanitu e so; a nodra turaga lelevu na veimataqali ena tubu mai vua.

¹⁷ A sa bale vakatobocu ko Eparaama, ka dredre, ni sa kaya e lomana, Ena sucu beka na gone vua sa dua na drau na nona yabaki? ia ena vakasucu beka ko Sera, ni sa ciwasagavulu na nona yabaki?

¹⁸ A sa kaya vua na Kalou ko Eparaama, Me bula mada e matamu ko Isimeeli!

¹⁹ A sa kaya na Kalou, Ena vakasucuma vakaidina vei iko e dua na goneatagane ko Sera na watimu; ia ko na vakatoka na yacana ko Aisake; ia kaʼu na vakataudeitaka vua na noqu veiyalayalati me veiyalayalati e tawa mudu, vei ira na nona kawa era na muri koya.

²⁰ O Isimeeli talega, kaʼu sa rogoci iko e na vukuna: Raica, kaʼu sa vakalougatataki koya, ka cakavi koya me vakaluveni, kaʼu na vakalevutaki koya vakalevu sara: e tinikarua na turaga ena sucu vua: ia kaʼu na cakavi koya me matanitu levu.

²¹ Ia kaʼu na vakataudeitaka na noqu veiyalayalati vei Aisake ga, o koya ena vakasucuma vei iko ko Sera e nai tabayabaki vakaoqo e na yabaki sa muri mai.

²² A sa cegu ni vosa tiko vua, a sa lako cake tani vei Eparaama na Kalou.

²³ A sa kauti Isimeeli na luvena ko Eparaama, kei ira kecega ka ra sucu e na nona vale, kei ira kecega ka ra voli e na nonai lavo, a tagane kecega vei ira na tamata e na lewe-ni-vale i Eparaama, a sa ciliva na kuli ni vusodra e na siga dina ko ya, me vaka ka vosa vua na Kalou.

²⁴ A sa ciwasagavulu ka ciwa na yabaki i Eparaama, ni sa cili na kuli ni vusona.

²⁵ A sa tinikatolu na yabaki i Isimeeli na luvena, ni sa cili na kuli ni vusona.

²⁶ Ia e na siga dina ko ya sa cili ko Eparaama kei Isimeeli na luvena;

²⁷ kei ira kece na tamata era nona lewe-ni-vale, era sucu e na vale, kei ira era voli e nai lavo mai vua na kai tani, era sa cili kaya.