Vakatekivu 13 - AI VOLA TABU

Erau sa lesu mai Ijipita ko Eparama kei Loti, 1-4. Erau sa qai dui tikotiko ko Eparama kei Loti, 5-9. Sa laʼki tiko ki Sotoma ko Loti, 10-13. Sa vosavakalougatataki Eparama ko Jiova, 14-18.

¹ ASA lako cake tani mai Ijipita ko Eparama, o koya, kei na watina, kei na nona ka kecega, a sa lako kaya ko Loti, kivaka ki na vanua ceva.

² A sa vutuniyau sara ko Eparama, e na manumanu e yavai va, e na siliva, kei na koula.

³ A sa lako tiko ko koya e nonai lakolako mai na ceva ka yaco ki Peceli, ki na yasana ka tiko kina eliu na nona vale gatu, e na tadrua kei Peceli kei Ai;

⁴ ki na yasana sa tu kina nai cabocabo-ni-soro, ko ya ka cakava maikina eliu: a sa masuta maikea ko Eparama na yaca i Jiova.

⁵ Io ko Loti talega, o koya erau a lako kei Eparama, sa tiko vua na qele ni sipi, kei na qele ni karavau, kei na vale gatu.

⁶ A sa lailai na vanua me rau tiko vata: ni sa ka tani na nodrau ka, a sa dredre kina me rau tiko vata.

⁷ A ra sa dauveileti nai vakatawa ni manumanu e yavai va i Eparama, kei nai vakatawa ni manumanu e yavai va i Loti: (a ra sa tiko e na vanua na kai Kenani kei na lewe ni Veikoro lalai.)

⁸ A sa kaya vei Loti ko Eparama, Me kakua mada na veileti vei kedaru, se vei ira na noqui vakatawa ni manumanu kei ira na nomui vakatawa ni manumanu; ni daru sa veiwekani:

⁹ sa tiko e matamu na vanua kecega, ne? mo tawasei iko tani mada vei au: kevaka ko lako ki nai mawi, kaʼu na qai lako ki nai matau; se ko lako ki nai: matau, kaʼu na qai lako ki nai mawi.

¹⁰ A sa ta cake e na matana ko Loti, ka raica na buca kecega sa volita na Joritani, e na sala vaka ki Soeri, ni sa vuqa na kena wai e na veiyasana kecega, (ni ka tawa vakarusai Sotoma kei Komora ko Jiova,) io sa vaka na were i Jiova, sa vaka na vanua ko Ijipita.

¹¹ A sa digitaka me nona ko Loti na buca kecega sa volita na Joritani; a sa lako kivaka ki cake ko Loti: a rau a tawase e dua mai na dua.

¹² Sa tiko e na vanua ko Kenani ko Eparama, a sa tiko ko Loti e na veikoro mai na buca sa volita, a sa laʼki birika na nona vale gatu kivaka ki Sotoma.

¹³ A ra sa tamata ca na kai Sotoma, kai valavala ca sara e na mata i Jiova.

¹⁴ A sa kaya vei Eparama ko Jiova, ni sa tawase oti vua ko Loti, Mo ta cake mada e na matamu, ka rai yani e na tikina ko tu kina, ia mo rai vaka ki na tokalau, kei na ceva, kei na vanua ki cake, kei na vanua ki ra:

¹⁵ ia na vanua kecega ko sa raica kaʼu na solia vei iko, kei ira na nomu kawa me ra taukena ka tawa mudu.

¹⁶ Ia kaʼu na cakavi ira na nomu kawa me ra vaka na kuvu ni soso: ia kevaka sa wilika rawa na kuvu ni soso e dua na tamata, ena qai wili rawa na nomu kawa.

¹⁷ Mo tu cake, mo lako voli e na vanua, e na kena balavu, kei na kena raraba; niʼu na solia vei iko.

¹⁸ A sa laveta na nona vale gatu ko Eparama, ka laʼki tiko mai na kau e so mai Mamire, o koya mai Hepironi, a sa cakava maikea e dua nai cabocabo-ni-soro vei Jiova.