Vakatekivu 12 - AI VOLA TABU

Sa kacivi Eparama na Kalou, a sa vosavakalougalataki koya, 1-5. Sa lako voli mai Kenani, 6-9. Sa lako ki Ijipita e na ruku ni dausiga, 10-13. Sa oakitaki watina, 14-20.

¹ IA sa kaya oti eliu vei Eparama ko Jiova, Mo lako tani e na nomu vanua, ka biuti ira na wekamu, kei na vale i tamamu, ka lako ki na vanua kaʼu na vakatakila vei iko:

² ia kaʼu na cakavi iko me matanitu levu, ia kaʼu na vakalougatataki iko, ka vakalevu-levuya na yacamu; ia ko na vu ni veiva-kalougatataki:

³ ia kaʼu na vakalougatataki ira era vosavakalougatataki iko, ka cudruvi koya sa rukaki iko; ena kalougata talega e na vukumu na veimataqali kecega e vuravura.

⁴ A sa lako tani ko Eparama, me vaka, ka vosa vua ko Jiova; a sa lako kaya ko Loti: a sa vitusagavulu ka lima na yabaki i Eparama, ni sa lako tani mai Karana.

⁵ A sa kauti Serei na watina ko Eparama, kei Loti na luve i tuakana, kei na yau kecega eratou sa rawata, kei na tamata eratou sa rawata mai Karana: a ra sa lako tani me laʼki tiko e na vanua ko Kenani; a ra sa lako dina mai ki na vanua ko Kenani.

⁶ A sa lako basika na vanua ko Eparama, ka yaco ki na yasana mai Sikemi, ki na kau mai More. A ra sa tiko e na vanua na kai Kenani e na gauna ko ya.

⁷ A sa rairai vei Eparama ko Jiova, a sa kaya, Au na solia na vanua o qo vei ira na nomu kawa: a sa cakava maikea ko koya e dua nai cabocabo-ni-soro vei Jiova, o koya ka rairai vua.

⁸ A sa lako tani maikea ko koya ki na ulu-ni-vanua kivaka ki cake mai Peceli, a sa birika na nona vale gatu, a sa koto vaka ki ra ko Peceli, ka vaka ki cake ko Ai; a sa cakava maikea e dua nai cabocabo-ni-soro vei Jiova, a sa masuta na yaca i Jiova.

⁹ A sa lako tikani ko Eparama, ka lako vaka ki na ceva.

¹⁰ A sa dausiga na vanua: a sa lako sobu ki Ijipita ko Eparama me laʼki tiko vulagi maikina; ni sa levu na dausiga e na vanua.

¹¹ A sa yaco, ni sa laʼki voleka me curu ki Ijipita, sa qai kaya vei Serei na watina, Raica, kaʼu sa kila ni ko sa alewa mata-vinaka ni raici:

¹² ia ena yaco ni na raici iko ko ira na kai Ijipita, era na qai kaya, O qo na watina: era na qai vakamatei au, ka vakabulai iko:

¹³ mo kaya mada ko sa ganequ: mo ko ya kaʼu na vinaka kina, ia kaʼu na bula talega e na vukumu.

¹⁴ A sa yaco, ni ka yaco ki Ijipita ko Eparama, era sa raici koya na alewa ko ira na kai Ijipita ni sa mata-vinaka sara ko koya.

¹⁵ Sa ra raici koya talega na turaga kei Fero, ka vosavakavinavinakataki koya vei Fero; a sa kauti ki na vale i Fero na alewa.

¹⁶ A sa caka vinaka vei Eparama ko koya e na vukuna: a sa rawata ko koya na sipi, kei na karavau, kei na asa tagane, kei nai talatala, kei na vada, kei na asa alewa, kei na kameli.

¹⁷ A sa yaviti Fero kei ira e nona vale ko Jiova e na mate levu, e na vuku i Serei na wati i Eparama.

¹⁸ A sa kacivi Eparama ko Fero, a sa kaya, A cava na ka o qo ko sa mai cakava vei au? a cava ko a tawa tukuna kina, vei au ni sa watimu ko koya?

¹⁹ a cava ko a kaya kina, A ganequ ko koya? a sa rawarawa kina meʼu taura me watiqu: ia o qo, mo raica mada na watimu, mo kauta, ka lako.

²⁰ A sa vakarota e so na tamata ko Fero e na vukuna: a ra sa laʼki talatala vua, kei na watina, kei na nona ka kecega.