Vakatekivu 10 - AI VOLA TABU

A kawa ni luve i Noa: ka Jefeca, 2-5; ko Hami, 6-20; ko Semi, 21-32.

¹ ASA vakaoqo na veimataqali ni luve i Noa, ko Semi, ko Hami, kei Jefeca; a sa sucu vei iratou na luvedratou tagane, ni sa oti na waluvu.

² A luve i Jefeca; ko Komera, kei Mekoki, kei Metai, kei Javana, kei Tupali, kei Meseki, kei Tairasa.

³ Ia na luve i Komera; ko Asikenasa, kei Rifaca, kei Tokarama.

⁴ Ia na luve i Javana; ko Elaisa, kei Tarisisi, kei Kitimi, kei Totenimi.

⁵ Sa vota vei ira o qo na nodra veiyanuyanu na veimatanitu e na nodra veivanua; a tamata yadua me vaka na nona vosa, ka vaka na nodra veimataqali, e na nodra veimatanitu.

⁶ Ia na luve i Hami; ko Kusa, kei Misireimi, kei Futi, kei Kenani.

⁷ Ia na luve i Kusa; ko Sipa, kei Avila, kei Sapita, kei Reama, kei Sapiteka: ia na luve i Reama; ko Sipa, kei Titana.

⁸ A sa sucu vei Kusa ko Nimiroti; sa vakatekivu ko koya me tamata kaukauwa e vuravura:

⁹ sa yaco ko koya me tamata gumatua e na mata i Jiova e na dauvakasasa manumanu e yavai va: o koya o qo sa daukainaki kina, Sa vakataki Nimiroti, o koya na tamata gumatua e na mata i Jiova e na dauvakasasa manumanu e yavai va.

¹⁰ Ia nai tekivu ni nona matanitu ko Pepeli, kei Ireki, kei Akata, kei Kaline, e na vanua ko Sainari.

¹¹ Sa lako yani ko koya mai na vanua ko ya ki Asiria, a sa tarai Ninive, kei na koro ko Reopoci, kei Kela,

¹² kei Risini, e na tadrua kei Ninive kei Kela; ko ya na koro levu.

¹³ Ia ko Misireimi, sa sucu vua ko Lutimi, kei Anamimi, kei Leapimi, kei Nafituimi,

¹⁴ kei Pacirusimi, kei Kasiluimi, (a ra sa tubu mai vua na kai Filisitia,) kei Kapitorimi.

¹⁵ A sa sucu vei Kenani ko Saitoni, na nona ulumatua, kei Eci,

¹⁶ kei ira na kai Jepusa, kei ira na luve i Amori, kei ira na kai Kerekesa,

¹⁷ kei ira na luve i Evi, kei ira na kai Araka, kei ira na kai Sina,

¹⁸ kei ira na kai Arivati, kei ira na kai Semari, kei ira na kai Hemaci: io emuri era sa tete yani na veimataqali ni luve i Kenani.

¹⁹ Ia na nodra yalayala na luve i Kenani sa tekivu mai Saitoni, mai na sala sa lakovi kina ki Kirari, ka yaco ki Kesa: e na sala sa lakovi kina ki Sotoma, kei Komora, kei Atima, kei Sepoimi, ka yaco sara ki Lesa.

²⁰ O qo na luve i Hami, me vaka na nodra veimataqali, kei na nodra vosa, e na nodra veivanua, kei na nodra veimatanitu.

²¹ Ia vei Semi talega, na tamadra kecega na luve i Iperi, na taci i Jefeca na ulumatua, ia sa sucu vua na gone.

²² A luve i Semi; ko Ilami, kei Asuri, kei Arifakisati, kei Luti, kei Erami.

²³ Ia na luve i Erami; ko Usi, kei Uli, kei Keceri, kei Masi.

²⁴ A sa sucu vei Arifakisati ko Sela; a sa sucu vei Sela ko Iperi.

²⁵ A sa sucu vei Iperi e rua na luvena; a yacana e dua ko Peleki [Wasewase]; e na vuku ni sa wasewase ko vuravura e na nona gauna; ia na yaca i tacina ko Jokitani.

²⁶ A sa sucu vei Jokitani ko Alimotati, kei Selefi, kei Hesarimaveci, kei Jera,

²⁷ kei Atorami, kei Usali, kei Tikila,

²⁸ kei Opali, kei Apimeeli, kei Sipa,

²⁹ kei Oferi, kei Avila, kei Jopapa: o qo kecega na luve i Jokitani.

³⁰ Ia na nodrai tikotiko sa tekivu mai Mesa, mai na sala sa lakovi kina ki Sifari, e dua na ulu-ni-vanua mai cake.

³¹ O qo na luve i Semi, me vaka na nodra veimataqali, me vaka na nodra duivosa-vosa, e na nodra veivanua, me vaka na i nodra veimatanitu.

³² O qo na luve i Noa, me vaka na nodra veimataqali, e na nodra veimatanitu: a sa vota vei ira o qo na veimatanitu e vuravura, ni sa oti na waluvu.