Vakatekivu 1 - AI VOLA TABU

A WASE I.

—Ai tukutuku ni ka bulia ka cakava na ka kecega na Kalou.

¹ ENAI vakatekivu sa bulia na lomalagi kei vuravura na Kalou.

² A SA sega ni vakarautaki ko vuravura, a sa lala tu; a sa tu na butobuto e na dela ni wasa titobu. A sa yavavala na Yalo ni Kalou e na dela ni wai.

³ Sa qai kaya na Kalou, Me rarama mai: a sa rarama mai.

⁴ A sa kunea na rarama na Kalou ni sa vinaka: a sa tawasea na rarama mai na butobuto na Kalou.

⁵ A sa vakatoka na rarama na Kalou me Siga, a sa vakatoka na butobuto me Bogi. Ia sa yakavi ka sa sabogibogi mai, nai matai ni siga ko ya.

⁶ A sa kaya na Kalou, Me dua na cagi-maliwa e na loma ni wai, me wasei kina na wai mai na wai.

⁷ A sa cakava na cagi-maliwa na Kalou, a sa wasea kina na wai e ruku ni cagi-maliwa mai na wai e dela ni cagi-maliwa: a sa vakakina.

⁸ A sa vakatoka na cagi-maliwa na Kalou me i Lomalagi. Ia sa yakavi ka sa sabogibogi mai, nai karua ni siga ko ya.

⁹ A sa kaya na Kalou, Me soqoni vata na wai e ruku ni lomalagi ki na yasana e dua, me rairai mai na vanua mamaca: a sa vaka-kina.

¹⁰ A sa vakatoka na vanua mamaca na Kalou me Vuravura, a sa vakatoka na yasana sa soqoni vata kina na wai me Wasawasa: a sa kunea na Kalou ni sa vinaka.

¹¹ A sa kaya na Kalou, Me tubura e vuravura na co na qele, na co sa vuataka na sorena, kei na kau dauvua me vuataka na vuana, e na kena mataqali, sa tu kina na sorena: a sa vakakina.

¹² A sa tubura na co na qele, na co sa vuataka na sorena, e na kena mataqali, kei na kau sa vuataka na vuana, ka tu kina na sorena, e na kena mataqali: a sa kunea na Kalou ni sa vinaka.

¹³ Ia sa yakavi ka sa sabogibogi mai, nai katolu ni siga ko ya.

¹⁴ A sa kaya na Kalou, Me tu na vu-ni-rarama e na cagi-maliwa kei lomalagi, me wasei rua kina na siga mai na bogi; mei vakatakilakila talega ni tabayabaki, kei na siga, kei na yabaki:

¹⁵ ia me ra vu-ni-rarama mai na cagi-maliwa kei lomalagi, me vakararamataki vuravura: a sa vakakina.

¹⁶ A sa cakavi rau na vu-ni-rarama lelevu na Kalou; na vu-ni-rarama sa levu cake me lewa na siga, kei na vu-ni-rarama sa lailai sobu me lewa na bogi: sa cakavi ira talega ko koya na kalokalo.

¹⁷ A sa viria na Kalou me tu mai na cagi-maliwa kei lomalagi, me vakararamataki vuravura,

¹⁸ ka me lewa na siga kei na bogi, me wasea talega na rarama mai na butobuto: a sa kunea na Kalou ni sa vinaka.

¹⁹ Ia sa yakavi ka sa sabogibogi mai, nai kava ni siga ko ya.

²⁰ A sa kaya na Kalou, Me vakatubura vakalevu sara ko na wai na ka sa lako voli ka bula rawa, ia me vuka voli na manumanu e dela i vuravura, e na cagi-maliwa kei lomalagi.

²¹ A sa bulia na tavuto lelevu na Kalou, kei na ka kecega sa bula ka yavavala rawa, a ya sa vakatubura vakalevu na wai, e na kedra yavusa, kei na manumanu vuka kecega, e na kedra yavusa: a sa kunea na Kalou ni sa vinaka.

²² A sa vosavaka-longatataki ira na Kalou, ka kaya, Dou luvea, ka tubu me vuqa mai, ka vakatawa na wai mai na wasawasa; me tubu me vuqa mai na manumanu talega e vuravura.

²³ Ia sa yakavi ka sa sabogibogi mai, nai kalima ni siga ko ya.

²⁴ A sa kaya na Kalou, Me vakatubura na ka bula na qele e na kedra yavusa, na manumanu e yavai va, kei na ka sa qasi, kei na manumanu tawa lasa ni vanua, e na kedra yavusa: a sa vakakina.

²⁵ A sa cakava na manumanu tawa lasa ni vanua na Kalou e na kedra yavusa, kei na manumanu e yavai va, me vaka na kedra yavusa, kei na ka kecega ni vanua sa qasi, e na kedra yavusa: a sa kunea na Kalou ni sa vinaka.

²⁶ A sa kaya na Kalou, Me datou cakava na tamata mei tovo vata kei kedatou, ia me ucui kedatou; ia me ra lewa na ika ni Wasawasa, kei na manumanu ni lomalagi? kei na manumanu e yavai va, kei vuravura kecega, kei na ka kecega sa qasi a ya sa dauqasi e dela i vuravura.

²⁷ A sa cakava na tamata na Kalou mei tovo vata kei koya; e nai tovo ni Kalou sa cakavi koya ko koya; na tagane kei na alewa sa cakavi rau ko koya.

²⁸ A sa vosavakalougatataki rau na Kalou, a sa kaya vei rau na Kalou, Drau luvea, ka tubu me lewe vuqa, ka vakatawai vuravura, ka vakamalumalumutaka; ka veita-liataka na ika ni waitui, kei na manumanu ni lomalagi, kei na ka bula kecega sa qasi e dela i vuravura.

²⁹ A sa kaya na Kalou, Raica, kaʼu sa solia vei kemudrau na co kecega sa vuataka na sorena, a ya sa tu e dela i vuravura kecega, kei na kau kecega sa tu kina na vua ni kau sa vakasorena; ko ya ena kemudou kakana.

³⁰ Ia na manumanu tawa lasa kecega ni vanua, kei na manumanu kecega ni lomalagi, kei na ka kecega sa qasi e dela i vuravura, sa tu kina na bula, au sa solia na co karakarawa kecega me kedra kakana: a sa vakakina.

³¹ A sa vakaraica na Kalou na ka kecega sa cakava ko koya, ka, raica, sa vinaka sara. Ia sa yakavi ka sa sabogibogi mai, nai kaono ni siga ko ya.