Vakarua 9 - AI VOLA TABU

Sa vunauci ira me ra kakua ni dokai ira e na yalododonu: a sa tukuna na nodra dautalaidredre.

¹ MO ni rogoca, na Isireli: Ko sa lako-kosova edaidai na Joritani, me laʼki taukena e so na matanitu sa levu ka kaukauwa, ka lailai ka malumalumu ko iko, na Veikoro lelevu ka sa yala ki lomalagi na kedra bai,

² a matanitu tamata lelevu ka balabalavu, na luve i Anaki, ko ira ko sa kila, ia ko sa rogoca ka vaka, O cei e tu rawa e na matadra na luve i Anaki!

³ Mo kila mada edaidai, ni sa liutaki iko yani ko Jiova na nomu Kalou, na buka katikati: ena vakaoti ira, ka vakamalumalumutaki ira e na matamu: ia ko na vakasevi ira kina, ka vakaoti ira vakusakusa, me vaka ka kaya vei iko ko Jiova.

⁴ Mo kakua ni vosa e lomamu, ni sa vakasevi ira tani e matamu ko Jiova na nomu Kalou, ka kaya, E na vuku ni noqui valavala dodonu sa kauti au mai ko Jiova me taukena na vanua o qo: e na vuku ga ni nodra tawa dodonu na veimatanitu o qori sa vakasevi ira kina e na matamu ko Jiova.

⁵ Sa sega e na vuku ni nomui valavala dodonu, se na dodonu ni lomamu, ko sa lako kina mo taukena na nodra vanua: e na vuku ga ni nodra tawa dodonu na veimatanitu o qori sa vakasevi ira kina e na matamu ko Jiova na nomu Kalou, ka me vakayacora ko koya na vosa ka vosavavakini kina ko Jiova vei iratou na nomu qase, kivei Eparaama, ko Aisake, kei Jekope.

⁶ Mo kila mada, ni sa sega ni solia vei iko na vanua vinaka o qo ko Jiova na nomu Kalou mo taukena, e na vuku ni nomu yalododonu; ni ko sa matanitu domoqa.

⁷ Mo nanuma, kakua ni guilecava, ni ko a dauvakacudrui Jiova na nomu Kalou mai na lekutu: mai na siga ko a lako tani mai na vanua ko Ijipita, ka yacova na siga kemuni a yaco ki na yasana o qo, kemuni sa talaidredre vei Jiova.

⁸ Mai Orepi talega kemuni a vakacudrui Jiova, a sa cudruvi kemuni ko Jiova me vakarusai kemuni.

⁹ Ni kaʼu a cabe ki na ulu-ni-vanua me taura na vatu raraba, io na ka raraba ni veiyalayalati sa cakava kei kemuni ko Jiova, au a qai tiko e na ulu-ni-vanua ka vasagavulu na siga ka vasagavulu na bogi; au a sega ni kana madrai, se gunu wai:

¹⁰ a sa solia vei au ko Jiova e rua na vatu raraba sa volai e nai qaqalo ni Kalou; a sa volai kina na vosa kecega sa vosataka vei kemuni ko Jiova mai na ulu-ni-vanua mai na loma ni buka waqa e na siga ni soqosoqo levu.

¹¹ Ia ni sa oti na siga e vasagavulu kei na bogi e vasagavulu, sa qai solia vei au ko Jiova na vatu raraba e rua ko ya, io na ka raraba ni veiyalayalati.

¹² A sa kaya vei au ko Jiova, Mo ia, mo lako sobu vakasauri eke; ni ra sa vakadukadukalitaki na nomu tamata ko a kauta tani mai Ijipita; era sa vuki tani vakasauri mai na sala kaʼu a vunautaka vei ira; era sa cakava vei ira e dua na ka vakawaicalataki.

¹³ Sa vosa talega vei au ko Jiova, ka kaya, Au sa raici ira oti na matanitu o qo, ka, raica, sa matanitu domoqa:

¹⁴ mo laivi au mada, meʼu vakarusai ira, ka bokoca na yacadra mai na ruku ni lomalagi: ia kaʼu na cakavi iko mo matanitu kaukauwa ka levu cake vei ira.

¹⁵ Au a qai lesu ka siro sobu mai na ulu-ni-vanua, a sa waqa tiko na ulu-ni-vanua e na buka: a sa lutuki e na ligaqu ruarua na ka raraba e rua ni veiyalayalati.

¹⁶ Kaʼu a qai rai yani, ka, raica, kemuni sa kitaka oti nai valavala ca vei Jiova na nomuni Kalou; kemuni sa bulia oti vei kemuni e dua na luve ni karavau sa vakawaicalataki: kemuni sa lesu tani oti vakasauri mai na sala sa vakarota vei kemuni ko Jiova.

¹⁷ Ia kaʼu a kauta na ka raraba e rua, ka viritaka yani mai na ligaqu ruarua, ka vorolaka e na matamuni.

¹⁸ Au a qai bale sobu e na mata i Jiova, me vaka eliu, e vasagavulu na siga ka vasagavulu na bogi; (au a sega ni kana madrai, se gunu wai;) e na vuku ni nomuni valavala ca kecega kemuni a valavala ca kina, ni kemuni a caka cala e na mata i Jiova, me vakacudrui koya.

¹⁹ Niʼu a rerevaka na lesa kei na cudru katakata sa cudru kina vei kemuni ko Jiova me vakarusai kemuni. A sa rogoci au ko Jiova e na gauna talega ko ya.

²⁰ Sa cudruvi Eroni vakalevu talega ko Jiova me vakamatei koya: ia kaʼu a masulaki Eroni talega e na gauna ko ya.

²¹ Kaʼu a qai taura na nomuni valavala ca, na luve ni karavau kemuni a bulia, ia kaʼu a vakama e na buka, ka buturaka, me vurumemea me matailalai sara, me vaka mada na kuvu ni soso: ia kaʼu a biuta na kena kuvu ki na uciwai sa lako sobu mai na ulu-ni-vanua. (

²² Mai Tapera talega, kei Masa, kei Kipiroci-ateeva, kemuni a vakacudrui Jiova.

²³ Ni sa talai kemuni talega ko Jiova mai Ketesa-parinea, ka kaya, Mo ni lako cake ka taukena na vanua kaʼu sa solia vei kemuni; kemuni a talaidredre ga ki na vunau i Jiova na nomuni Kalou, ka tawa vakabauti koya, se vakarorogo ki na domona.

²⁴ Mai na siga kaʼu a kilai kemuni kina, kemuni sa talaidredre ga vei Jiova.)

²⁵ Ia kaʼu a bale sobu e na mata i Jiova ka vasagavulu na siga ka vasagavulu na bogi, me vaka kaʼu a bale sobu eliu; e na vuku ni sa kaya ko Jiova ni na vakarusai kemuni.

²⁶ Au a masu kina kivei Jiova, ka kaya, I Turaga, Jiova, mo ni kakua mada ni vakarusai ira na nomuni tamata kei na nomuni votavota, ko ira kemuni a Vakabula e na kemuni levu, ko ira kemuni a kauta mai Ijipita e na liga kaukauwa:

²⁷ mo ni nanumi iratou na nomuni tamata, ko Eparaama, ko Aisake, kei Jekope; kakua ni raica na nodra yalokaukauwa na tamata o qo, se na nodra caka cala, se na nodrai valavala ca:

²⁸ de kainaki e na vanua kemuni a kauti keimami maikina, E na vuku ni sa sega ni vakayacori ira rawa ko Jiova ki na vanua ka yalataka vei ira, e na vuku talega ni sa cati ira, sa kauti ira tani mai ko koya me vakamatei ira e na lekutu.

²⁹ Ia era sa nomuni tamata ga kei na nomuni votavota, kemuni a kauta tani mai e na nomuni kaukauwa levu kei na ligamuni sa dodo yani.