Vakarua 8 - AI VOLA TABU

Sa vunauci ira ko Mosese me ra talairawarawa, e na vuku ni loloma ni Kalou vei ira.

¹ A VUNAU kecega kaʼu sa vunautaka vei iko edaidai mo ni vakabauta me cakava, mo ni bula kina, ka tubu me lewe vuqa, ka lako yani ka taukena na vanua sa vosavavakini kina ko Jiova vei ira na nomuni qase.

² Ia mo na nanuma na sala kecega sa kauti iko kina ko Jiova na nomu Kalou, e na yabaki e vasagavulu o qo, e na lekutu, me vakamalumalumutaki iko, me vakatovolei iko, me kila kina na ka sa tiko e lomamu, se ko na vakabauta na nona vunau, se segai.

³ A sa vakamalumalumutaki iko, a sa laivi iko mo viakana, a sa vakani iko e na mana, na ka ko a tawa kila eliu, sa sega talega ni kila ko ira na nomu qase; me vakatakila vei iko ni sa sega ni bula na tamata e na madrai duaduaga, a sa bula na tamata e na ka kecega sa lesia na vosa i Jiova.

⁴ A nomui sulu ko a vakaisulu kina, sa sega ni madra mai, a sa sega ni vucevuce na yavamu, e na yabaki e vasagavulu o qo.

⁵ Ia mo kila e na lomamu, ni sa vakanakuitataki iko ko Jiova na nomu Kalou me vaka sa vakanakuitataka na luvena ko na tamata.

⁶ Ia mo vakabauta kina na vunau i Jiova na nomu Kalou, mo lako e na nona sala, ka me rerevaki koya.

⁷ Ni sa kauti iko ko Jiova na nomu Kalou ki na vanua vinaka, na vanua uciwai, na mata-ni-wai kei na wai levu sa to vure mai na veiqakilo kei na veiulu-ni-vanua;

⁸ a vanua ni witi, kei na parile, kei na veivaini, kei na veilolo, kei na kau tani e vua; a vanua ni waiwai ni olive, kei na oni;

⁹ a vanua ko na kana madrai tiko kina ka mamau, ko na tawa dravudravua kina e na ka e dua; a vanua sa aironi na kena vatu, ia ko na kelia na uma ni parasa mai na kena veiulu-ni-vanua.

¹⁰ Ia ni ko sa kana ka mamau, mo qai vakavinavinaka vei Jiova na nomu Kalou e na vuku ni vanua vinaka sa solia vei iko ko koya.

¹¹ Mo qarauni iko mo kakua ni guilecavi Jiova na nomu Kalou, mo tawa vakabauta na nona vunau, kei na nona lelewa, kei na nona veilesilesi, a ya kaʼu sa vakarota vei iko edaidai:

¹² do ko sa kana ka mamau, ka tara e so na vale vinaka, ka tiko kina;

¹³ a sa tubu me levu na nomu karavau kei na nomu sipi, a sa levu mai na nomu siliva kei na nomu koula, a sa vakalevutaki na nomu ka kecega;

¹⁴ ena qai viavialevu mai na yalomu, ka ko na guilecavi Jiova na nomu Kalou, ko ya sa kauti iko tani mai na vanua ko Ijipita, mai na vale ni veivakabobulataki;

¹⁵ o koya ka kauti iko e loma ni lekutu levu ka rerevaki ko ya, sa tiko kina na gata katakata, kei na batibasaga, kei na vanua wai maca, sa sega maikina na wai; o koya ka kauta mai na memu wai mai na vatu qaqa;

¹⁶ o koya ka vakani iko e na mana e na lekutu, na ka ka ra tawa kila eliu na nomu qase, me vakamalumalumutaki iko kina, ka vakatovolei iko, me caka vinaka vei iko e na gauna maimuri;

¹⁷ ia do ko sa kaya e lomamu, A noqu qaqa kei na kaukauwa ni ligaqu sa cakava vei au na yau o qo.

¹⁸ Ia mo nanumi Jiova ga na nomu Kalou: ni sai koya sa solia vei iko na kaukauwa mo rawata kina na yau, me vakataudeitaka na nona veiyalayalati, sa vosavavakini kina ko koya vei ira na nomu qase, me vaka edaidai.

¹⁹ Ia kevaka ko sa guilecavi Jiova na nomu Kalou e na ka e dua, ka muria e so na kalou tani, ka qaravi ira, ka cuva vei ira, au sa tukuni kemuni e na siga o qo ni kemuni na rusa vakaidina.

²⁰ Me vaka na veimatanitu sa vakarusa ko Jiova e na matamuni, kemuni na rusa vakakina; e na vuku ni kemuni sa tawa vakarorogo ki na domo i Jiova na nomuni Kalou.