Vakarua 4 - AI VOLA TABU

Sa vunauci ira ko Mosese me ra talairawarawa, 1-40. Sa lesia e tolu na koro me dro kina na ravuravu, 41-43.

¹ IA o qo, mo ni vakarorogo mada, na Isireli, ki na veilesilesi kei na lelewa, kaʼu sa vakavulica vei kemuni, mo ni cakava, mo ni bula kina, ka lako me taukena na vanua sa solia vei kemuni ko Jiova na Kalou ni nomudou qase.

² Mo ni kakua ni kuria na vosa kaʼu sa vunautaka vei kemuni, mo ni kakua talega ni vakalailaitaka, mo ni vakabauta kina na vunau i Jiova na nomuni Kalou, a ya kaʼu sa vunautaka vei kemuni.

³ Sa raica ga na matamuni na ka sa cakava ko Jiova e na vuku i Peali-piori: ni sa vakaoti ira kecega na tamata era muri Peali-piori, mai na kemuni maliwa, ko Jiova na nomuni Kalou.

⁴ Ia koi kemuni ka kabiti Jiova na nomuni Kalou, kemuni sa bula vakaaduaga e na si ga o qo.

⁵ Raica, kaʼu sa vakavulica vei kemuni e so nai lesilesi kei na lelewa, me vaka ka vunautaka vei au ko Jiova na noqu Kalou, mo ni kitaka vakakina e na vanua kemuni sa laʼki taukena.

⁶ Ia mo ni maroroya ka cakava; ni dou na vuku kina ka yalomatua kina e na matadra na veimatanitu, era na rogoca nai lesilesi kecega o qo, a ra na kaya, E dina era sa tamata vuku ka yalomatua na matanitu levu o qo.

⁷ Ia ko cei na matanitu levu, sa dua na nodra kalou sa tiko voleka vei ira, e vakai Jiova na noda Kalou e na ka kecega eda sa masuti koya kina?

⁸ Ia ko cei na matanitu levu, sa dodonu na kena veilesilesi kei na kena lelewa, e tautauvata kei na vunau kecega o qo, kaʼu sa tauca vei kemuni edaidai?

⁹ Ia mo qarauni iko ga, ka vakatawa vinaka na yalomu, do ko guilecava na ka sa raica na matamu, ka sa lako tani e na yalomu e na veisiga kecega ko sa bula kina: ia mo vakavulica ga vei ira na luvemu, kei na luvedra na luvemu;

¹⁰ io na siga ko a tu kina e na mata i Jiova na nomu Kalou mai Orepi, ni sa kaya vei au ko Jiova, Mo soqoni ira vata na tamata vei au, meʼu vakarogotaka vei ira na noqu vosa, me ra vuli kina me rerevaki au e na veisiga kecega era na bula kina e dela i vuravura, me ra vakavulica talega vei ira na luvedra.

¹¹ Ia dou a toro mai, ka tu e ruku ni ulu-ni-vanua; a sa waqa tu e na buka ki na loma ni lagi na ulu-ni-vanua, e na butobuto, e na o, kei na butobuto vavaku.

¹² A sa vosa vei kemuni ko Jiova mai loma ni buka waqa: ko ni a rogoca na domo ni vosa, ia ka sa sega ni raica e dua nai vakatakarakara; sa domo walega.

¹³ Ia sa cavuta vei kemuni ko koya na nona veiyalayalati, a ya sa vunautaka vei kemudou mo dou cakava, io na vunau e tini; a sa vola ko koya e na vatu raraba e rua.

¹⁴ Sa vakaroti au talega ko Jiova e na gauna ko ya meʼu vakavulica vei kemuni e so nai lesilesi kei na lelewa, mo dou cakava e na vanua dou sa lako yani kina mo dou taukena.

¹⁵ O koya mo ni qarauna vinaka kina na yalomudou; ni dou a tawa raica e dua nai vakatakarakara e na siga ka vosa kina vei kemuni ko Jiova mai Orepi mai na loma ni buka waqa:

¹⁶ do dou sa vakadukadukalitaki, ka cakava vei kemudou e dua na matakau ceuceu, nai vakatakarakara ni dua na kalou, nai vakatakarakara ni tagane se alewa,

¹⁷ nai vakatakarakara ni dua na manumanu e dela i vuravura, nai vakatakarakara ni manumanu vakatabana sa vuka voli e lagi,

¹⁸ nai vakatakarakara ni dua na ka sa yaqa e dela ni vanua, nai vakatakarakara ni dua na ika e na wai mai ruku ni vanua:

¹⁹ ia de ta cake na matamu ki lagi, ka ko raica na mata-ni-siga, kei na mata-ni-vula, kei na veikalokalo, nai vavakoso kecega mai lagi, ko na sa qai vecei tani me sorova, ka qarava, na veika o qori sa vota ko Jiova na nomu Kalou ki na veimatanitu kecega e ruku ni lomalagi kece:

²⁰ ia sa tauri kemuni ko Jiova, ka kauti kemuni tani mai loma ni kuro ni kaukamea vakawaicalataki, io mai Ijipita, mo ni matanitu me taukena ko koya, me vaka e na siga o qo.

²¹ A sa cudru vei au ko Jiova e na vukumudou, ka vosavavakini meʼu kakua ni lako-kosova na Joritani, ia meʼu kakua ni yacova na vanua vinaka ko ya, sa solia vei iko ko Jiova na nomu Kalou mo taukena:

²² ia kaʼu na mate ga e na vanua o qo, au na sa sega ni lako-kosova na Joritani: ia kemuni na lako-kosova, ka taukena na vanua vinaka o qori.

²³ Dou qarauni kemuni, de kemuni sa guilecava na veiyalayalati i Jiova na nomuni Kalou a ya sa kitaka kei kemuni, ka ni cakava vei kemuni e dua na matakau ceuceu, nai vakatakarakara ni dua na ka sa vakatabuya vei iko ko Jiova na nomu Kalou.

²⁴ Ni sa bukawaqa katikati ko Jiova na nomu Kalou, io sa Kalou vuvu.

²⁵ Ni sa sucu vei iko e so na gone, kei na luvedra na luvemu, io ni dou sa tiko vakadede e na vanua, a sa vakadukadukalitaki, ka sa cakava vei kemuni e dua na matakau ceuceu nai vakatakarakara ni dua na ka, ka sa caka ca e na mata i Jiova na nomu Kalou, me vakacudrui koya:

²⁶ au sa kacivi lomalagi kei vuravura edaidai me kila e na vukumudou, ni dou na kawayali vakusakusa mai na vanua kemuni sa lako-kosova na Joritani me taukena; ena tawa balavu na nomudou bula e delana, ia dou na kawayali vakaidina ga.

²⁷ Ia ena vakasevi kemuni voli ko Jiova e na veimatanitu, ia dou na vo ka vica walega e na kedra maliwa na veimatanitu sa kauti kemuni yani kina ko Jiova:

²⁸ ia kemuni na qarava maikea na kalou e so, na cakacaka ni liga ni tamata, na kau kei na vatu, era sega ni rai, se rogo, se kana, se boi rawa.

²⁹ Ia kevaka kemuni sa qarai Jiova na nomu Kalou maikina, ko na kunea, kevaka ko sa qarai koya e na lomamu taucoko kei na yalomu taucoko.

³⁰ Ni ko sa sarava, ka sa yacovi iko na ka kecega o qo, e na siga maimuri, kevaka ko sa lesu mai vei Jiova na nomu Kalou, a sa talairawarawa ki na domona;

³¹ (ni sa Kalou yalololoma ko Jiova na nomu Kalou;) ena sega ni gu ca vei iko, se vakarusai iko, se guilecava na veiyalayalati vei ira na nomu qase sa vosavavakini kina vei ira ko koya.

³² Ia mo taroga mada na gauna sa oti, ka liu vei iko, mai na gauna sa bulia kina na tamata e vuravura na Kalou, ia mai na vu ni lagi e dua ka yacova na vu ni lagi kadua, se sa cakavi me tautauvata kei na ka levu o qo, se sa rogoci me vakakina?

³³ Sa dua li na matanitu sa rogoca na domo ni Kalou ni sa vosa mai loma ni buka waqa, me vaka ko sa rogoca, ka sa bula ga?

³⁴ Se sa dua li na kalou sa vakatovolea eliu me laʼki kauta vua e dua na matanitu mai na loma ni matanitu kadua, e na veivakatovolei, e na vei vakatakilakila, kei na veika-mana, kei nai valu, kei na liga kaukauwa, kei na liga sa dodo yani, kei na ka rerevaki vakaidina, me vaka na ka kecega sa cakava ko Jiova na nomu Kalou e na matamuni mai Ijipita?

³⁵ Sa vakatakilai vei iko, mo kila kina ni sa Kalou ko Jiova; e sega tale e dua, ko koya ga.

³⁶ Sa rogo mai vei iko na domona mai lomalagi, me vakavulici iko kina ko koya: a sa vakaraitaka vei iko ko koya e vuravura na nona buka waqa levu; ia ko a rogoca na nona vosa mai loma ni buka waqa.

³⁷ Ia e na vuku ni ka lomani ira na nomu qase ko koya, sa digitaka kina na nodra kawa era sa muri ira, ka kauti iko tani mai Ijipita e matana, e nona kaukauwa levu;

³⁸ me vakaseva tani e matamu e so na matanitu sa levu ka kaukauwa, ka malumalumu ko iko, me kauti iko kina, me solia vei iko na nodra vanua mo taukena, me vaka e na siga edaidai.

³⁹ Mo kila mada e na siga o qo, ka vakanananu kina e lomamu ni sa Kalou mai lomalagi ecake ko Jiova, kei vuravura era: sa sega tale e dua.

⁴⁰ Ia mo vakabauta mada na nona veilesilesi, kei na nonai vakaro, a ya kaʼu sa rotaka vei iko e na siga o qo, me yaco kina vei iko na ka vinaka, vei ira talega na luvemu era na muri iko, ka me balavu kina na nomu bula e dela ni vanua, a ya sa solia vei iko ko Jiova na nomu Kalou, me tawa mudu.

⁴¹ SA qai wasea tani ko Mosese e tolu na koro e na tai mai o qo ni Joritani, vaka ki nai cadracadra ni mata-ni-siga;

⁴² ka me dro kina na ravuravu, ko koya sa vakamatea na kai nona ni sa tawa nakita, ka sa sega ni cati koya eliu; ka me bula kina ni sa dro ki na dua na koro o qori:

⁴³ ko Peseri mai na lekutu, mai na vanua bucabuca, a nodra na luve i Rupeni; kei Ramoci mai Kiliati, a nodra na luve i Kata; kei Kolani mai Pasani, a nodra na luve i Manase.

⁴⁴ IA o qo na vunau sa tauca ko Mosese vei ira na luve i Isireli:

⁴⁵ o qo nai vakaro, kei na veilesilesi, kei na lelewa, sa vosataka ko Mosese vei ira na luve i Isireli, ni ra sa lako tani mai Ijipita,

⁴⁶ e na tai mai o qo ni Joritani, e na cecelevu sa donui Peci-piori, e na vanua i Sioni na nodra tui na luve i Amori, ko koya ka tiko mai Esiponi, ko koya sa mokuta ko Mosese kei ira na luve i Isireli, ni ra sa lako tani oti mai Ijipita:

⁴⁷ a ra sa taukena na nona vanua, kei na vanua i Oki na tui Pasani, na tui e rua vei ira na luve i Amori, e na tai o qo ni Joritani, vaka ki nai cadracadra ni mata-ni-siga;

⁴⁸ mai Aroeri, ko ya mai na bati ni uciwai ko Arinoni, ka yaco ki na ulu-ni-vanua ko Sirioni, a ya ko Erimoni,

⁴⁹ kei na cecelevu kecega e na bati o qo ni Joritani vaka ki cake, ka yacova na Wasawasa mai na cecelevu, mai na veimata-ni-wai mai Pisika.