Vakarua 1 - AI VOLA TABU

A WASE I. —Sa tukuna ko Mosese na cakacaka ni Kalou vei ira na luve i Isireli, ni ra sa tiko lako e na lekutu.

¹ O QO na vosa sa tukuna ko Mosese vei ira kecega na Isireli e na tai o qo ni Joritani, mai na lekutu, e na cecelevu sa donui Sufi, e na tadrua kei Perana, kei Tofeli, kei Lepani, kei Eseroci, kei Ti-saapi. (

² Sa bogi tinikadua nai lakolako mai Orepi e na sala ni ulu-ni-vanua ko Seira me yaco ki Ketesa-parinea.)

³ Ia e nai kavasagavulu ni yabaki, e nai katinikadua ni vula, e nai matai ni siga ni vula, sa qai vosa ko Mosese vei ira na luve i Isireli, me vaka na ka kecega sa vakarota vua ko Jiova me tukuna vei ira;

⁴ ni sa yaviti Sioni oti ko koya, na nodra tui na luve i Amori, ko koya ka tiko mai Esiponi, kei Oki na tui Pasani, ko koya ka tiko mai Aseteroci mai Etirei.

⁵ E na bati o qo ni Joritani e na vanua ko Moapi, sa vakatekivu ko Mosese me tukuna na vunau o qo, ka kaya:

⁶ Sa vosa vei keda ko Jiova na noda Kalou mai Orepi, ka kaya, Sa dede na nomuni tiko e na ulu-ni-vanua o qo:

⁷ mo ni gole tani ka lako, ka yacova na nodra ulu-ni-vanua na luve i Amori, kei na yasana kecega sa koto voleka kina, e na cecelevu, e na ulu-ni-vanua, kei na buca, kei na yasana ki na ceva, kei na baravi, na nodra vanua na kai Kenani, kei Lipanoni, me yacova na uciwai levu, io na uciwai ko Uferetisi.

⁸ Raica, kaʼu sa solia na vanua e na matamudou: dou lako kina mo dou taukena na vanua ka vosavavakini kina ko Jiova vei iratou na nomudou qase, kivei Eparaama, kei Aisake, kei Jekope, me solia vei iratou kei na nodratou kawa e muri iratou.

⁹ Ia kaʼu a vosa vei kemuni e na gauna ko ya, ka kaya, Au sa sega ni vosoti kemuni rawa vakai au ga:

¹⁰ sa vakavuqataki kemuni ko Jiova na nomuni Kalou, ka, raica, kemuni sa lewe vuqa edaidai me vaka na veikalokalo mai lomalagi. (

¹¹ Me va-kaikuritaki kemuni mada vakaudolu ko Jiova, na Kalou ni nomuni qase, ka vakalougatataki kemuni, me vaka sa vosataka vei kemudou!)

¹² Au na rawata vakaevei meʼu vosota duadua na nomuni veibeitaki, kei na kemuni bibi, kei na nomuni veileti?

¹³ Mo ni vakasaqara e so na tamata vuku, ka yalomatua, ka kilai; mai na nomuni veiyavusa, meʼu lesi ira me ra turaga vei kemuni.

¹⁴ Ia dou a vosa vei au, ka kaya, Sa vinaka me kitaka na ka ko sa kaya.

¹⁵ Ia kaʼu a kauti ira na tamata sa turaga e, na nomuni veiyavusa, na tamata sa vuku, ka kilai, ka lesi ira me ra liu vei kemuni, me ra turaga ni yaudolu, ka turaga ni ya-drau, ka turaga ni yalimasagavulu, ka turaga ni yatini, kei na turaga lalai e so e na nomuni veiyavusa.

¹⁶ Ia kaʼu a vakaroti ira na nomuni dauveilewai e na siga ko ya, ka kaya, Dou rogoca na ka e veiletitaki vei ira na wekamudou, ka lewa vakadodonu e na vuku ni tamata kei na kai nona, kei na vulagi sa tiko kaya:

¹⁷ dou kakua ni kila na tamata ni dou sa ia na lewa; dou rogoci koya na ka wale me vakai koya sa yaco; dou kakua ni rerevaka na mata ni tamata; ni dou sa lewa e na vuku ni Kalou: ia na ka sa dredre vei kemudou, dou kauta mai vei au, ia kaʼu na rogoca.

¹⁸ Ia kaʼu a vunautaka vei kemuni e na gauna ko ya na ka kecega mo dou cakava.

¹⁹ Ia eda a tiko mai Orepi, ka lako e loma ni lekutu levu ka rerevaki ko ya, a ya dou a raica e na sala ni nodra ulu-ni-vanua na luve i Amori, me vaka ka vakarota vei keda ko Jiova na noda Kalou; ia eda a yaco ki Ketesa-parinea.

²⁰ Ia kaʼu a qai kaya vei kemuni, O ni sa yaco ki na nodra ulu-ni-vanua na luve i Amori, a ya sa solia vei keda ko Jiova na noda Kalou:

²¹ raica, sa solia e na matamu na vanua ko Jiova na nomu Kalou: mo lako cake mo taukena, me vaka na vosa i Jiova na Kalou ni nomu qase vei iko; mo kakua ni rere, se yalolailai.

²² Dou a qai toro mai vei au koi kemudou kecega, ka kaya, Me da tala na tamata e so me liutaki keda, me ra laʼki raica vinaka na vanua e na vukuda, ka mai tukuna vei keda na sala me da lako cake kina, kei na veikoro eda na lako kina.

²³ A sa vinaka vei au na vosa ko ya: kaʼu a qai kauta e tinikarua na tamata maivei kemudou, e dua e na yavusa yadua:

²⁴ a ratou a gole yani, ka cabeta na ulu-ni-vanua, ka yaco ki na buca ko Esikoli, ka yamata.

²⁵ A ratou sa taura e ligadratou e so na vua ni vanua, ka kauta sobu mai vei keda, ka mai tukuna na vosa, ka kaya, Sa vinaka na vanua sa solia mai vei keda ko Jiova na noda Kalou.

²⁶ Ia dou a bese ga ni lako cake, ka sa talaidredre ga ki na vosa i Jiova na nomudou Kalou:

²⁷ ia dou a vosa kudruku-dru ga e na nomudou veivale gatu, ka kaya, E na vuku ni sa cati keda ko Jiova, sa kauti keda kina mai na vanua ko Ijipita, me soli keda ki na ligadra na luve i Amori, me vaka-wabokotaki keda:

²⁸ eda na lako cake kivei? eratou sa vakawaicalataka na yaloda na wekada, ni ratou kaya, Era sa tamata lelevu ka balabalavu, ka lailai koi keda; sa lelevu na Veikoro, a sa yala ki lomalagi na kedra bai; ia keitou a kunei ira talega maikina na luve i Anaki.

²⁹ Au a qai kaya vei kemuni, Mo ni kakua ni domobula, se rerevaki ira:

³⁰ o Jiova na nomuni Kalou o koya sa liutaki kemuni, ena vala ko koya e na vukumuni, me vaka na ka kecega sa kitaka e na vukumuni, e na matamuni mai Ijipita;

³¹ kei na lekutu, ko a raica maikina ni sa keveti iko ko Jiova na nomu Kalou, me vaka sa keveta na luvena ko na tamata, e na sala kece dou a lako kina, dou a yaco mada kina ki na yasana o qo.

³² Ia e na ka o qo, ko ni a tawa vakadi-nati Jiova kina na nomuni Kalou,

³³ ko koya ka liutaki kemuni e na sala, me qara na nomuni yasana mo ni tiko kina; e na buka waqa e na bogi, me vakaraitaka vei kemuni na sala mo ni lako kina; kei na o e na siga.

³⁴ A sa rogoca na domo ni nomuni vosa ko Jiova, a sa cudru mai, a sa vosavavakini, ka kaya,

³⁵ Sa sega dina e dua vei ira na tamata o qo, io e nai tabatamata ca o qo, ena raica na vanua vinaka ko ya, kaʼu a vosa vavakini kina me solia vei ira na nomuni qase,

³⁶ ko Kalepi duaduaga na luve i Yifune; ena raica ko koya, ia kaʼu na solia vua na vanua sa butuka ko koya, vei ira talega na luvena, e na vuku ni sa muri Jiova tikoga ko koya. (

³⁷ Sa cudru vei au talega ko Jiova e na vukumuni, a sa kaya, Ko iko talega, ko na sega ni yaco kina:

³⁸ ena Lako kina ko Josua, na luve i Nuni, ko koya sa dautu e matamu; mo vakaukauwataki koya: ni na kauti ira kina na Isireli ko koya, me ra taukena.)

³⁹ Kei ira talega na nomuni lalai, ko ira kemuni a kaya era na bobula, kei ira na luvemuni, era sa sega ni kila e na siga o qo na ka vinaka se na ka ca, era na lako kina, ia kaʼu na solia vei ira me ra taukena:

⁴⁰ ia koi kemuni, mo ni gole tani, ka lako ki na lekutu e na sala kivaka ki na Wasa Damudamu.

⁴¹ Dou a qai vosa, ka kaya vei au, Keimami sa valavala ca vei Jiova, keimami na lako cake ka vala, me vaka na ka kecega sa vunautaka vei keimami ko Jiova na noda Kalou. Ia kemuni a vauca na tamata yadua na nonai yaragi ni valu, ka sa vakarau me cabeta na ulu-ni-vanua.

⁴² A sa kaya vei au ko Jiova, Mo kaya vei ira, Dou kakua ni lako cake, se vala; niʼu sa sega ni tiko e na kemuni maliwa; do dou sa moku e na matadra na nomudou meca.

⁴³ Kaʼu a qai vosa vei kemuni; ia kemuni a bese ga ni vakarogoca, ka talaidredre ga ki na vunau i Jiova, ka cabe vakaqaqasodrosodro ki na ulu-ni-vanua.

⁴⁴ A ra sa mai laʼki tavaki kemuni na luve i Amori era tiko e na ulu-ni-vanua ko ya, ka vakasavi kemuni, me vaka sa kitaka na lagotavuivui daukata, ka mokuti kemuni mai Seira, ka yacovi Orima.

⁴⁵ Dou a qai lesu mai ka tagi e na mata i Jiova; ia ka sa sega ni rogoca na domomuni ko Jiova, se vakatu daliga vei kemuni.

⁴⁶ Dou a qai tiko mai Ketesa ka bogi vuqa, me vaka na veibogi dou a tiko mai kina.