Taniela 8 - AI VOLA TABU

Sa raica ko Tanieli na raivotu ni sipi tagane kei na koti tagane, a sa rogoca na kenai loku nai otioti ni ca sa lesi me yacova na vale tabu, 1-14. Si vakaukauwataki Tanieli ko Kepirieli, a sa vakamacalataka vua na raivotu, 15-27.

¹ E NAI katolu ni yabaki ni lewa i Pelisasari na tui sa dua na raivotu e rairai vei au, koi au ko Tanieli, a sa tarava na ka ka rairai vei au eliu.

² Ia kaʼu a raica na raivotu; a sa yaco, niʼu a raica, kaʼu sa tiko mai Susani na koro turaga, e na yasayasa vaka-Elama; ia niʼu a raica na raivotu, kaʼu a tiko e na bati ni uciwai ko Ulei.

³ Ia kaʼu a ta cake e na mataqu ka vakaraica, ka raica, sa dua na sipi tagane ka tu e na bati ni uciwai, a sa rua na kena kaukamea: ia na kaukamea o qori sa cecere; ka dua sa cecere vei rau, ia ko ya sa cecere, sa tubu cake emuri.

⁴ Au a raica na sipi tagane ni sa cula tu kivakaki ra, kei na tokalau, kei na ceva; a sa sega e so na manumanu sa tu rawa e matana, sa sega talega e sa ia rawa na veikaliraki mai na ligana; sa cakacaka ga ko koya me vaka na nona veitalia, a sa yaco me levu.

⁵ Ia niʼu a vakananuma tiko, raica, sa dua na koti tagane sa lako mai ra e dela i vuravura taucoko, a sa tawa tara na qele: ia na koti tagane o qo sa dua na kena kaukamea vakaidina e na maliwa ni matana.

⁶ A sa lako mai ko koya ki na sipi tagane sa rua na kena kaukamea, o koya kaʼu a raica ni sa tu e na bati ni uciwai, a sa ciciva mai e na nona cudru kaukauwa.

⁷ Ia kaʼu a raici koya ni sa toro mai ki na sipi tagane, a sa yaloca vua, ka yavita na sipi tagane, ka musuka ruarua na kena kaukamea: a sa sega na kaukauwa vua na sipi tagane me tu rawa e matana, a sa biuti koya sobu ki na qele, ka buturaka: a sa sega e dua sa kaliraka na sipi tagane mai na ligana.

⁸ Ia na koti tagane sa tubu kina me ka levu sara: ia ni sa kaukauwa ko koya, sa qai ramusu mai na kena kaukamea levu; a sa tubu cake mai e va na ka vakaidina me kenai sosomi, kivakaki na mata ni cagi e va kei lomalagi.

⁹ Ia mai na dua vei iratou sa tubu mai e dua na kaukamea lailai, a sa yaco me levu sara, kivakaki na mata ni ceva, ki cake talega, ka vakaki na vanua matalau.

¹⁰ A sa viavialevu mai, io vei ira nai vavakoso vakalomalagi; a sa biuta sobu ki na qele e so vei ira nai vavakoso kei na kalokalo, ka buturaka.

¹¹ Io vei koya talega na turaga ni vavakoso sa viavialevu kina ko koya, a sa kauta tani nai soro ni veisiga, a sa biu wale na tikina ni nona vale tabu.

¹² Ia nai vavakoso, sa soli vata yani kei nai soro ni veisiga e na vuku ni talaidredre, a sa biuta na ka dina ki na qele; a sa cakacaka tiko ka yaco.

¹³ Au a qai rogoca e dua na yalosavasava ni sa vosa, a sa vosa e dua tale na yalosavasava vua sa vosa, Me bogi vica tiko na raivotu ni soro ni veisiga, kei na talaidredre e veivakarusai, me soli vata kina na vale tabu kei nai vavakoso me buturaki sobu?

¹⁴ A sa kaya vei au ko koya, Me bogi rua na udolu ka tolu na drau; ena qai vakasavasavataki na vale tabu.

¹⁵ A sa yaco, niʼu sa raica oti, koi au ko Tanieli, na raivotu, ka sa vakasaqara tiko na kenai balebale, raica, sa qai tu mai e mataqu e dua sa raici vakatamata.

¹⁶ Ia kaʼu sa rogoca na domo vakatamata e na loma ni uciwai ko Ulei, a sa kaci, ka kaya, I Kepirieli, mo vakatakila vua o qo na raivotu.

¹⁷ A sa lako voleka mai ko koya ki na tikina kaʼu sa tu kina: ia ni sa lako mai ko koya, kaʼu sa rere, ka bale vakatobocu: a sa kaya vei au, Mo kila, na luve ni tamata: ni sa bale ga ki na gauna ni vakataotioti na raivotu.

¹⁸ Ia ni sa vosa mai vei au ko koya, kaʼu sa moce lotu, a sa kotora na qele na mataqu: a sa tarai au ko koya, ka vakaturi au e na yavaqu.

¹⁹ A sa kaya ko koya, Raica, au na vakatakila vei iko na ka ena yaco e nai otioti ni cudru: ni sa gauna sa loku ena yaco ga kina nai otioti.

²⁰ A sipi tagane ko a raica ka rua na kena kaukamea, sai rau na tui Metia kei na tui Perisia.

²¹ Ia na koti vutivuti, na tui Javana ko ya: kei na kaukamea levu e na maliwa ni matana, nai matai ni nodra tui.

²² Ia ni ka musuki o qori, ka tu mai e va me kenai sosomi, sa matanitu e va ena tubu mai na matanitu ko ya, ka sega ni kaukauwa vata kaya.

²³ Ia e na gauna kimuri ni nodratou matanitu, ni sa qai taucoko mai na nodra ca na dautalaidredre, ena qai tu cake mai e dua na tui e mata qaqa, ka daukila vere.

²⁴ Ia ena gumatua ko koya ni sa qaqa, ka sega ni sa nona dina na qaqa: ena ka vakaidina na nona ia na dauveivakacacani, ena yaco ko koya, ka cakacaka tiko, ka vakarusai ira sa kaukauwa, io na mataqali tabu.

²⁵ Ia ni sa qaseqase talega ko koya ena vakayacora na vere e na ligana; e lomana talega ena daudokai koya, ia ni sa sautu tiko ena vakarusai ira kina na lewe vuqa: ena bolei koya talega na nodra Turaga na turaga; ia ni sa sega na liga e tauca ena musuki ga ko koya.

²⁶ Ia na raivotu ni yakavi kei na mataka e sa tukuni, sa dina ga: ia ko iko, mo tinia nai vola ni raivotu; ni sa ka me bogi vuqa.

²⁷ Ia koi au ko Tanieli, kaʼu a ceguoca mai, ka tauvi mate e na bogi e so; ka oti, kaʼu sa tu cake mai, ka cakava na nona cakacaka na tui; ia kaʼu a kidacalataka na raivotu, a sa sega ga e kila kina.