Taniela 7 - AI VOLA TABU

Sa raica ko Tanieli na raivotu ni manumanu e va, 1-8, kei na matanitu ni Kalou, 9-14. A kenai vakamacala, 15-28.

¹ E NAI matai ni yabaki i Pelisasari na tui Papiloni sa tadra ko Tanieli ka raica e so na raivotu ni uluna e na nonai mocemoce: sa qai vola na tadra ko koya, ka tukuna e so na gauna.

² Sa vosa ko Tanieli ka kaya, Au a vakaraica no e na noqu raivotu kei na bogi, ka, raica, na cagi e va sa veivala mai e na waitui levu.

³ Ia na manumanu lelevu e va sa vude cake mai na waitui, sa duidui tovo.

⁴ A kenai matai sa vaka na laioni, a sa vakatabana vakaikeli: au a raica tiko ni sa vuti mai na lawe ni tabana, a sa laveti cake mai vuravura, ia e na yavana me vaka na tamata ka vakaduri kina, a loma ni tamata talega ka soli kina.

⁵ Ka raica, sa dua tale na manumanu, na kenai karua, a sa vaka na pera, ia e na dua na ligana ka duri tu kina, a sa tolu na sui ni sarisari sa katia tu e gusuna: a ra sa vosa vakaoqo vua, Tu cake, kania vakalevu na lewe ni ka.

⁶ Ka oti o qori, kaʼu a vakaraica no, ka raica, sa dua tani tale, e vaka na leparite, a sa va na tabana vakamanumanu e dakuna; a sa va na uluna na manumanu o qori; ia na kaukauwa ka soli kina.

⁷ Ka oti o qori, kaʼu a vakaraica no e na raivotu kei na bogi, ka raica e dua na manumanu, na kenai kava, sa ka rerevaki ka vakaidina, ka kaukauwa sara; a sa vakabatina lelevu e aironi: sa daukanakana ka musumusuka, ia na kena vo sa buturaka e na yavana: a sa dua tani o qo ka dua tani na manumanu kecega sa liutaka; a sa tini na kena kaukamea.

⁸ Niʼu a vakananuma tiko na kaukamea, raica, e dua na kaukamea lailai sa tubu cake mai e na kedra maliwa, ia e tolu na kenai matai ni kaukamea sa cavuivuvu mai e matana: ka, raica, sa so na matana na kaukamea o qo me vaka na mata ni tamata, ka dua na gusuna sa dauvosa ka levu.

⁹ Au a raica tiko ka so nai tikotiko vakaturaga sa qai viritaki sobu, ia ko Koya sa Mailiu sara na nona gauna sa tiko mai, a nonai sulu sa vulavula me vaka na uca-vulavula, kei na drau ni uluna sa vaka na vutika ni sipi e savasava: a nonai tikotiko na yameyame ni buka, na yavana na buka waqa.

¹⁰ A uciwai buka sa tubu ka dave mai na matana: e udolu vakaudolu sa qaravi koya, ka oba vakaoba sa wavu tu e matana: sa tiko na mataveilewai, a sa tevuki nai vola.

¹¹ Au a qai vakaraica no e na vuku ni domo ni vosa levu sa cavuta na kaukamea ko ya: au a raica tiko ni sa vakamatei na manumanu ko ya, ka vakarusai na yagona, ka soli ki na buka waqa.

¹² Ia na kedra vo ni manumanu, sa vakaseavutaki yani na nodratou lewa: ia sa vakabalavutaki ga na nodratou bula ka dua na yabaki kei na gauna.

¹³ Au a vakaraica no e na raivotu kei na bogi, ka, raica, e na o kei lomalagi sa dua sa vaka na Luve ni tamata sa lako mai, ia vei Koya sa Mailiu sara na nona gauna sa yaco kina ko koya, a ra sa kauti koya sara ki matana.

¹⁴ A sa mai soli vua na lewa, kei na vakarokoroko, kei na matanitu, ia na veimataqali kece, kei na veivanua, kei na dui vosavosa, era na qaravi koya: a nona lewa na lewa tawa mudu, ena sega ni takali, kei na nona matanitu ena sega ni vakarusai.

¹⁵ Sa qai rarawa mai na yaloqu koi au ko Tanieli e na loma ni yagoqu, ia na raivotu ni uluqu sa vakidroataki au.

¹⁶ Au a torova e dua vei ira sa wavu tu mai, ia na kena dina ni ka kecega o qo kaʼu sa taroga vua. A sa tukuna mai vei au ko koya, ia nai balebale ni veika o qo sa vakatakila vei au.

¹⁷ A manumanu lelevu o qo e va, sa va na tui, eratou na tubu cake mai vuravura.

¹⁸ A ra na rawata na matanitu ko ira na yalosavasava nei Koya sa Cecere sara, a ra na taukena na matanitu ka tawa mudu, io ka tawa mudu sara.

¹⁹ Au a qai via kila na kena dina e na vuku ni manumanu, na kenai kava, o koya ka dua tani ka dua tani ko iratou kecega, ka rerevaki sara, ka vakabatina aironi, ka vakaiqaso parasa; o koya ka daukanakana, ka musumusuka, na kena vo ka buturaka tu e na yavana,

²⁰ e na vuku talega ni kaukamea e tini ka tu e uluna, ka dua tale sa tubu cake mai, ka tolu sa bale e matana; io na kaukamea ko ya ka vakamatana, ka vakagusuna ka dauvosa ka levu sara, ka raici vakaukauwa vakalevu ka vakalailai na kenai tokani.

²¹ Au a raica na kaukamea ko ya, ni sa qai ia nai valu vei ira na yalosavasava, a sa gumatua vei ira;

²² a sa yacova na nona lako mai ko Koya sa Mailiu sara na nona gauna; kei na lewa, ni sa qai soli vei ira na yalosavasava nei Koya sa Cecere sara; kei na gauna, ni sa qai yaco me ra taukena na ma tanitu ko ira na yalosavasava.

²³ Sa qai vaka ko koya, A kenai kava ni manumanu nai kava ni matanitu sa na tubu mai e vuravura, ena dua tani o qori ka dua tani na veimatanitu kecega, ia ena daukania na vuravura kecega, ka buturaka, ka musumusuka.

²⁴ Ia na kaukamea e tini e na matanitu ko ya sa tini na tui ena tubu mai: ka dua talega ena tubu taravi ira; ena dua tani ko koya o qo ka tawa vakai ira eliu, ia na tui e tolu ena vakamalumalumutaka ko koya.

²⁵ Ia na vosa ca vei Koya sa Cecere sara ena daucavuta ko koya, kei ira na yalosavasava nei Koya sa Cecere sara ena dauvakacacana, ka vakananuma me vakatanitaka na gauna e so kei na vunau e so: ia ena soli ki na ligana ka me oti mada e dua na yabaki ka so tale na yabaki ka dua na tiki ni yabaki.

²⁶ Ia na mataveilewai ena tiko, kei na nona lewa era na qai vakaseavutaka, me vakacacana ka vakarusa, ka me vakaotia sara.

²⁷ Ia na matanitu kei na lewa, kei na kena levu ni veimatanitu e ruku i lomalagi taucoko, ena soli vei ira na yalosavasava nei Koya sa Cecere sara, a nona matanitu sa matanitu tawa mudu, ia na turaga kecega era na qaravi koya ka talairawarawa vua.

²⁸ Sa vaka tu o qo na kenai tinitini ni ka ko ya. Ia koi au ko Tanieli, sa ka levu sara na nanuma ni lomaqu sa vakidroataki au, kei na mataqu sa dua tani mai vei au: ia kaʼu a maroroya ga e lomaqu.