Taniela 6 - AI VOLA TABU

Sa lesi ko Tanieli me liu tei ira kece na turaga, 1-3. Era sa bukia na kena vere, 4-9. Sa beitaki ko Tanieli vua na tui, a sa biu ki na qara ni laioni, 10-18. Sa vakabulai ko Tanieli, 19-23, a sa kani ira na nona meca na laioni, 24. Sa vakarokorokotaki na Kalou e na vunau ni tui, a sa tamata dauyaco ko Tanieli, 25-28.

¹ SA vinakata ko Tario me lesia na turaga ni matanitu e lewe drau ka ruasagavulu, me ra lewa na matanitu taucoko;

² ka lewe tolu me nodra turaga levu; a sa kedratoui matai ko Tanieli: ia ko ira na turaga, me ra vakarorogo vei iratou, me kakua kina vua na tui e dua na ka e ca kina.

³ Ia ko Tanieli o qo sa uasivi cake vei iratou na turaga levu kei ira na turaga lailai, e na vuku ni sa dua na yalo e uasivi cake sa tiko vua; a sa nanuma na tui me lesi koya me lewa na matanitu taucoko.

⁴ Ia ko ira na turaga levu kei na turaga lailai era sa qai qaqara me ra kunea e dua na ka e vuna me ca kina ko Tanieli e na ka ni matanitu; ia e dua na ka e vuna se dua na ka ca, era sa tawa kunea rawa; ni sa daudina ko koya, a sa sega e dua na ka cala se ca me kune vua.

⁵ Era sa qai kaya na tamata o qori, Eda na sega ni kunea e dua na ka e vuna me ca kina ko Tanieli o qo, eda na kunea ga na ka me vu ni kena ca e na vunau ni nona Kalou.

⁶ Ia ko ira na turaga levu kei na turaga lailai era sa qai soqoni vata sara vua na tui, a ra kaya vakaoqo vua, I Tario na tui, mo bula ka tawa mudu.

⁷ Era sa bose vata kece na turaga levu ni matanitu, kei ira na turaga, kei na turaga lailai, kei na daubose, kei na turaga ni qali, me vakatura e dua na vosa vakatui, ka vakadreta e dua na sau tabu, ka vaka, O koya sa na masuta e dua na ka vua e dua na kalou se na tamata ka bogi tolusagavulu, vei iko duaduaga, na tui, me biu ki na qara ni laioni.

⁸ Ia ko iko na tui, mo vakatura mada na vosa o qo, ka volavola ki nai vola, me kakua ni vakatanitaka me vaka ga na noda vunau na kai Metia kei na kai Perisia, sa tawa takali rawa.

⁹ O koya o qo sa volavola kina ko Tario na tui ki nai vola kei na vunau.

¹⁰ Ia ko Tanieli ni sa kila ni sa volai nai vola, sa curu ki na nona vale; ia na nona katuba ni sa dola tu e nona loqi me donui Jerusalemi, sa vakatolu e na veisiga na nona vakatekiduru e duruna, me masu, ka vakavinavinaka e na mata ni nona Kalou, me vaka ni sa daucakava eliu.

¹¹ Ia ko ira na tamata o qori, era sa qai soqoni vata sara mai, ka kunei Tanieli ni sa masumasu ka kere loloma tiko e na mata ni nona Kalou.

¹² Era sa qai toro mai, ka vosa e na mata ni tui e na vuku ni vunau ni tui, ka kaya, Sa sega li e dua na vunau ko sa vola, ka vaka, O koya ena masuta e dua na ka vua e dua na kalou se na tamata ka bogi tolusagavulu, vei iko duaduaga, na tui, me biu ki na qara ni laioni? Sa vosa na tui ka kaya, Sa dina ga na ka o qori, me vaka na noda vunau na kai Metia kei na kai Perisia, sa sega ni takali rawa.

¹³ Sa ra qai vosa ka kaya e na mata ni tui, O Tanieli ya vei ira na luve i Juta ka bobulataki mai sa tawa vakarorogo vei iko, na tui, se ki na vunau ko sa volavola kina, ia sa vakatolu e na veisiga ni sa ia ko koya na nona masumasu.

¹⁴ Ia na tui, ni sa rogoca na vosa o qo, sa qai cati koya vakalevu vakai koya, a sa vakasara na lomana vei Tanieli me vakabulai koya: a sa yacova nai dromudromu ni siga ni sa gumatua tiko ko koya me vakabulai koya.

¹⁵ Ia na tamata o qori, era sa qai soqoni sara vata vua na tui, ka kaya vua na tui, Mo kila, na tui, na noda vunau na kai Metia kei na kai Perisia, ni sa sega e dua na vunau se na sau tabu e vakatura ko koya na tui me na vakatanitaki.

¹⁶ Sa qai vosa na tui, a ra sa kauti Tanieli mai, ka biuta ki na qara ni laioni. A sa vosa na tui ka kaya vei Tanieli, A nomu Kalou o koya ko sa qarava tikoga, ena vakabulai iko ko koya.

¹⁷ A sa kau mai e dua na vatu, ka virino ki na gusu ni qara; a sa tabaka ko koya na tui e na nona mama, e na nodra mama talega na kena turaga; me kakua ni vakatani taki na ka sa lewai me kei Tanieli.

¹⁸ Sa qai lako sara na tui ki na nona vale vakaturaga, a sa lolo e na bogi ko ya ka siga: ia na ka domo vinaka sa tawa kauti mai ki matana: a nona moce talega sa takali vua.

¹⁹ Ia e na sabogibogi sa sou sara na tui ni sa mataka caca, a sa vakasauri na nona lako ki na qara ni laioni.

²⁰ Ia ni sa torova na qara, sa kacivi Tanieli vakadomoi-loloma: a sa vosa na tui ka kaya vei Tanieli, I Tanieli, na tamata ni Kalou bula, a nomu Kalou, o koya ko sa qarava tikoga, sa rawata li me vakabulai iko maivei ira na laioni?

²¹ Sa qai kaya ko Tanieli vua na tui, Mo bula, na tui, ka tawa mudu.

²² A noqu Kalou sa tala mai na nona agilose, a sa sogota vakaruburubu na gusudra na laioni, a sa sega kina ni ra vakacacani au: e na vuku ni sa ka dodonu ga vua sa kune vei au: io, e matamu talega, na tui, sa sega na ka ca kaʼu cakava.

²³ Sa qai reki vakalevu na tui e na vukuna, a sa vosa me ra kauti Tanieli cake mai na qara. A sa qai kauti cake mai ko Tanieli mai na qara, a sa sega e dua na tikina ca sa kune vua, e na vuku ni sa vakabauta na nona Kalou.

²⁴ A sa vosa na tui, a ra sa kauti mai na tamata ko ya sa ra beitaki Tanieli, ia ki na qara ni laioni sa ra qai biu kina, ko ira, kei na luvedra kei na watidra; ka bera na nodra yaco ki na boto ni qara, ka rawai ira sara na laioni, ia na suidra kece sa ra musumusuka.

²⁵ Sa qai vola ko Tario na tui vei ira kece na veimataqali, kei na veivanua, kei na dui vosavosa, era tiko e vuravura kecega; Na vakacegu me vakalevutaki vei kemudou.

²⁶ E dua na vunau kaʼu sa vakatura, ka vaka, E na veiqali kece ni noqu matanitu, me ra sautaninini ka rere ga na tamata e na mata ni Kalou nei Tanieli: ni sa Kalou bula ko koya, ka dei na nona tiko ka tawa mudu, ia na nona matanitu ena sega ni ca rawa, kei na nona lewa ena yacova nai otioti.

²⁷ Sa dauia ko koya na veivakabulai kei na veikaliraki, a sa cakava nai vakatakilakila kei na cakacaka mana mai lomalagi kei vuravura, o koya sa vakabulai Tanieli mai na kaukauwa ni laioni.

²⁸ Ia ko Tanieli o qo sa cakacaka yaco ni sa lewa tiko ko Tario, ni sa lewa talega ko Koresi na kai Perisia.