Taniela 5 - AI VOLA TABU

A solevu ca i Pelisasari, 1-4. Ai vola, era tawa wilika raica na tamata vuku, sa kidroa kina na tui, 5-9. Ni sa tukuni Tanieli na ranadi me tamata vuku sara, sa kauti mai ko koya, 10-16. Sa vunauca na tui e na ruku ni nona viavialevu, kei na nona kalou lasu, 17-24, a sa qai wilika ka vakamacalataka nai vola, 25-28. Sa vakalevulevui ko Tanieli, a sa yaco sara e na bogi ko ya na ka sa tukuna, 29-31.

¹ O PELISASARI na tui sa cakava na magiti levu vei ira na kena turaga e lewe udolu, a sa gunu waini ko koya e na matadra na lewe udolu.

² Sa kaya ko Pelisasari ni sa tovolea na waini, me kau mai na bilo koula ka siliva ka kauta ko Nipukatinesari ko tamana mai na vale tabu mai Jerusalemi; me ra gunu maikina na tui, kei na kena turaga, na watina dina, kei na watina lalai.

³ Era sa qai kauta mai na bilo koula ka kauti mai na vale tabu ni vale ni Kalou mai Jerusalemi; a ra sa gunu maikina na tui, kei na kena turaga, na watina dina, kei na watina lalai.

⁴ Era sa gunuva na waini, ka vakacaucautaki ira na kalou koula, ka siliva, na parasa, na aironi, na kau, kei na vatu.

⁵ E na tiki-ni-siga ko ya sa lako mai nai qaqalo ni liga ni tamata, ka volavola donuya nai tutu-ni-cina ki nai botani ni lalaga ni vale levu ni tui: ia na tui sa raica na qeteqete ni liga sa volavola.

⁶ Nai serau ni tui sa qai dua tani mai, kei na nanuma ni lomana sa vakidroataki koya, kei na uaua ni tolona sa qai tasere mai, kei na duruna sa dui veiyaviti.

⁷ Sa kaci vakadomoilevu mai na tui me kauti ira mai na rairai, na kai Kalitea, kei na daucaka-mana. Sa vosa na tui, ka kaya vei ira na tamata vuku ni Papiloni, O koya sa na wilika nai vola o qo, kei na kenai balebale sa na vakatakila vei au, e nai sulu damudamu ena vakaisulutaki kina, ka vakatau-beni e na koula na domona, ena yaco talega me lewe tolu kei keirau sa lewa na matanitu.

⁸ Sa ra qai curu kece mai na tamata vuku ni tui: a ra tawa wilika rawa nai vola, se na kenai balebale sa ra vakatakila vua na tui.

⁹ Sa qai taqaya vakalevu ko Pelisasari, ia na kenai serau sa qai dua tani vua, kei ira na kena turaga sa ra kidroa mai.

¹⁰ Ia ko koya na ranadi, e na vuku ni nodra vosa na tui kei na kena turaga, sa qai curu mai ki na vale ni solevu: a sa vosa na ranadi, ka kaya, Mo bula, na tui, ka tawa mudu: me kakua ni vakidroataki iko na nanuma ni lomamu, a nomui serau talega me kakua ni dua tani mai:

¹¹ sa dua na tamata e na nomu matanitu, sa yalodra na kalou tabu sa tiko kaya; ia e na gauna i tamamu, sa rarama kei na yalomatua kei na vuku me vaka na nodra vuku na kalou, sa kune vua; ia na tui ko Nipukatinesari na tamamu sa lesi koya me nodra turaga na tamata vuku, na rairai, na kai Kalitea, kei na daucaka-mana, io ko tamamu, na tui, ka lesi koya kina,

¹² e na vuku ni sa dua na yalo e uasivi cake, kei na vuku, kei na yalomatua, na vakamacalataka na tadra, kei na vakatakila na vosa dredre, kei na dausere ka bukubukuya, sa kune vei Tanieli ko ya, na yacana sa vakatoka vua na tui, ko Pelitisasari: me kacivi mada ko Tanieli, ia na kenai balebale ena vakatakila ko koya.

¹³ Sa qai kauti mai ko Tanieli ki na mata ni tui. A sa vosa na tui, ka kaya vei Tanieli, Sai iko li ko Tanieli, vei ira na luve i Juta ka bobulataki mai, o ira ka kauta mai na tui ko tamaqu mai Jutia?

¹⁴ Au sa rogoci iko, ni sa yalodra na kalou sa tiko vei iko, ni sa rarama, kei na yalomatua, kei na vuku e uasivi cake sa kune vei iko.

¹⁵ A ra sa qai kauti mai o qo ki mataqu na tamata vuku, na rairai, me ra wilika mai nai vola o qo, kei na kenai balebale me ra vakatakila vei au: a ra tawa rawa ni tukuna nai balebale ni ka o qo:

¹⁶ ia koi au kaʼu sa rogoci iko ni ko sa tukuna rawa nai balebale ni ka vuni kei na sere ka bukubukuya: ia kevaka ko rawata me wilika nai vola o qo, kei na kenai balebale mo sa vakatakila vei au, e nai sulu damudamu ko na qai vakaisulutaki kina, ka vakataubeni e na koula na domomu, ka yaco me lewe tolu kei keirau sa lewa na matanitu.

¹⁷ Sa qai vosa ko Tanieli ka kaya e na mata ni tui, A nomui solisoli me sa nomu ga, kei na nomui yau mo solia ga vua e dua tani; ia nai vola kaʼu na wilika ga vua na tui, kei na kenai balebale kaʼu na vakatakila vua.

¹⁸ O iko na tui, o koya na Kalou Cecere sara ka solia vei Nipukatinesari ko tamamu na matanitu, kei na ka vakaturaga, kei nai rogo, kei nai ukuuku:

¹⁹ ia e na vuku ni ka vakaturaga ka solia vua ko koya, o ira kece na veimataqali, kei na veivanua, kei na dui vosavosa sa ra sautaninini ka rere e matana: o ira sa lomana kina sa vakamatea; kei ira sa lomana kina sa Vakabula; kei ira sa lomana kina sa vueta; kei ira sa lomana kina sa vakasivoya.

²⁰ Ia ni sa laveti cake na lomana, kei na yalona ni sa vakaukauwataki o na viavialevu, sa qai vakasivoi ko koya mai na nonai tikotiko vakatui, na kenai rogo talega sa ra kauta tani vua:

²¹ ia maivei ira na luve ni tamata sa vakasavi tani ko koya; a lomana talega sa cakavi me vakamanumanu, ia kei ira na asa kila ka tiko ko koya: e na co, me vaka na karavau, sa ra vakani koya kina, e na tegu ni lomalagi talega sa suasua kina na yagona; a sa kila mada kina ko koya ni sa lewa na Kalou Cecere sara e na matanitu ni tamata, ni sai koya sa lomana kina ko koya sa lesia me lewa.

²² Ia ko iko na luvena, Pelisasari, ko a tawa vakamalumalumutaka na lomamu, ni ko sa kila ga na ka kece o qo;

²³ ia vua na Turaga ni lomalagi ko sa vakalevulevui iko ga; na bilo ni nona vale era sa kauta mai ki matamu, ia ko iko, kei na kemu turaga, na watimu dina, kei na watimu lalai, dou sa gunu waini maikina; ia na kalou siliva, ka koula, na parasa, na aironi, na kau, kei na vatu, sa sega ni rai, se rogo, se kila rawa, ko sa vakacaucautaka: ia na Kalou, sa nomu cegu e sa tiko e ligana, kei na nomui lakolako kece e sa nona, ko sa tawa vakarokorokotaka:

²⁴ ia maivei koya sa qai talai mai nai qeteqete ni liga; nai vola o qo talega sa qai volai.

²⁵ Ia o qo nai vola sa volai, Mini, Mini, Tekeli, Ufarisini.

²⁶ O qo na kenai balebale: Mini; Sa wilika na Kalou na nomu matanitu, a sa vakaotia.

²⁷ Tekeli; O sa vakatovolei e nai vakarau ni bibi, a sa kune me mamada,

²⁸ Peresi; sa tasei na nomu matanitu, ka soli ki na kai Metia kei na kai Perisia.

²⁹ Sa qai vakarota ko Pelisasari, a ra sa vakaisulutaki Tanieli e nai sulu damudamu, ka vakataubeni koya e na sinucodo koula, ka vunautaki koya, me sa lewe tolu kei rau sa lewa na matanitu.

³⁰ E na bogi ko ya sa vakamatei ko Pelisasari na tui ni kai Kalitea.

³¹ Ia ko Tario na kai Metia sa taura na matanitu, a sa onosagavulu ka rua na nona yabaki.