Taniela 4 - AI VOLA TABU

Sa tukuna ko Nipukatinesari na lewa ni Kalou, 1-3, kei na nona tadra sa ra dredreta ko ira na tamata vuku, 4-8. Sa rogoca na tadra ko Tanieli, 9-18, a sa vakamacalataka, 19-27. Sa yaco sara na tadra, 28-37.

¹ O NIPUKATINESARI na tui, vei ira na veimataqali, na lewe ni veivanua, kei na dui vosavosa, era tiko e vuravura kecega; Na vakacegu me vakalevutaki vei kemudou.

² Nai vakatakilakila kei na ka mana sa cakava vei au ko koya na Kalou cecere, kaʼu a vaka sa vinaka meʼu tukuna.

³ Na kena levu ni nonai vakatakilakila! na kena kaukauwa ni nona ka mana! a nona matanitu na matanitu tawa mudu, kei na nona lewa mai nai tabatamata ka yaco ki nai tabatamata.

⁴ Oi au ko Nipukatinesari kaʼu a tiko vakacegu e na noqu vale, ka kalougata e na noqui tikotiko vakatui:

⁵ e dua na tadra kaʼu a tadrataka e sa vakarerei au, ia na nanuma ni lomaqu e na noqui mocemoce kei na raivotu ni uluqu sa vakidroataki au.

⁶ O koya o qo sa dua kina na vosa kaʼu a vakatura me kauti ira mai ki mataqu na tamata vuku kecega e Papiloni, ia nai balebale ni tadra me ra vakatakila vei au.

⁷ Sa ra qai curu mai na vuku, na rairai, na kai Kalitea, kei na daucaka-mana: na tadra kaʼu a tukuna e matadra; ia na kenai balebale era sa tawa vakatakila vei au.

⁸ A sa curu mai emuri sara ki mataqu ko Tanieli, sa yacana ko Pelitisasari, me vaka na yaca ni noqu kalou, ia na yalodra na kalou tabu sa tiko vua: na tadra kaʼu a tukuna talega e matana, ka kaya,

⁹ I Pelitisasari, na nodra turaga na tamata vuku, niʼu sa kila ni sa yalodra na kalou tabu sa tiko vei iko, a sa sega e dua na ka vuni me dredre vei iko, na raivotu ni noqu tadra kaʼu a raica, kei na kenai balebale, mo tukuna mai vei au.

¹⁰ Ia na raivotu ni uluqu e na noqui mocemoce sa vakaoqo; au a vakasarava, ka raica, sa dua na kau ka tu e loma i vuravura, ia na kena cecere sa ka vakaidina.

¹¹ Sa tubu na kau o qori me kaukauwa, ia na kena cecere sa yala ki lomalagi, kei na kena raici ki nai yalayala kei vuravura:

¹² a tabana sa matavinaka, kei na vuana sa ka levu, a sa dui kedra kina na ka kece na kakana: e rukuna sa vakaruru kina na manumanu ni vanua, e na tabana talega sa ro kina na manumanu ni lomalagi, a sa vakani maikina na ka kecega sa bula.

¹³ Au a vakasarava e na raivotu ni uluqu, e na noqui mocemoce, ka raica, sa dua nai vakatawa ka yalosavasava sa lako sobu mai lomalagi;

¹⁴ sa kaci vakadomoilevu ko koya, ka vaka, Taya sobu na kau, ka muduka laivi na tabana, kurea na drauna, ka duibiubiuta na vuana: me se tani na manumanu mai na rukuna, kei na manumanu vuka mai na tabana:

¹⁵ na vu ni wakana ga me laivi tu ga e na qele, ia e na wa aironi ka parasa me sa vauci kina, ki na veico ni vanua; e na tegu ni lomalagi talega me sa suasua kina, ia kei ira na manumanu me sa votai vata ko koya e na co ni qele:

¹⁶ a lomana me dua tani mai me kakua ni vakatamata, io, na loma ni manumanu me soli ga vua; ka me vitu na yabaki me na oti yani vua.

¹⁷ Ni ra bose nai vakatawa, sa nodra lewa o qo; ni ra vosa na yalosavasava, sa ia na tarotaro: me kila kina ko ira sa bula ni sa lewa ko Koya sa Cecere sara e na matanitu ni tamata, vua talega sa lomana kina sa solia vua, ia na tamata e kaisi sara sa lesia ko koya me lewa.

¹⁸ A tadra o qo kaʼu a raica koi au, ko Nipukatinesari na tui. Ia ko iko, Pelitisasari, na kenai balebale mo tukuna mai, ni sai ira kece na tamata vuku e na noqu matanitu sa ra tawa rawata na kenai balebale me vakatakila vei au: ia ko sa rawata ga, ni sa yalodra na kalou tabu sa tiko vei iko.

¹⁹ Ia ko Tanieli, na yacana ko Pelitisasari, sa qai kidacala tiko ka dua na tiki-ni-siga, ia e na nanuma ni lomana sa kidroa kina ko koya. Sa vosa na tui, ka kaya, Pelitisasari, e na tadra, se na kenai balebale, mo kakua ni kidroa kina. Sa vosa ko Pelitisasari, ka kaya, Noqu turaga, na tadra o qo me yacovi ira sa cati iko, kei na kenai balebale, vei ira na nomu meca.

²⁰ Na kau ko a raica ni sa tubu me kaukauwa, kei na kena cecere ni sa yala ki lomalagi, kei na kena raici ki vuravura kecega;

²¹ kei na drauna ni sa matavinaka, kei na vuana ni sa levu, ka dui kedra kina na ka kece na kakana; e rukuna, ni sa tiko kina na manumanu ni vanua, e na tabana talega, ni sa ro kina na manumanu ni lomalagi:

²² sai iko o qori, na tui, sa tubu me kaukauwa mai: ni sa kemu levu sa tubu, ka yala ki lomalagi, kei na nomu lewa, ki nai yalayala kei vuravura.

²³ Ia ni ka raica na tui ni sa dua nai vakatawa ka yalosavasava sa lako sobu mai lomalagi, ka kaya, Taya sobu na kau, ka vakarusa; na vu ni wakana ga me laivi tu ga e na qele, ia e na wa aironi ka parasa me sa vauci kina, ki na veico ni vanua; e na tegu ni lomalagi talega me sa suasua kina, ia kei ira na manumanu ni vanua me sa votai vata ko koya e na co ni qele: ka me vitu na yabaki me na oti yani vua;

²⁴ sa vakaoqo, na tui, na kenai balebale, a sa vakaoqo na lewa i Koya sa Cecere sara, sa yacovi koya na noqu turaga na tui:

²⁵ Ia ko iko era na vakasava tani mai na tamata, ia kei ira na manumanu ni vanua dou na tiko kaya, kei na co, me vaka na karavau, era na vakani iko kina, e na tegu ni lomalagi talega era na vakasuasuataki iko, ka me vitu na yabaki me na oti yani vei iko, mo kila mada kina ni sa lewa ko Koya sa Cecere sara e na matanitu ni tamata, ka vua sa lomana kina sa solia vua.

²⁶ Ia ni ra a vakarota me laiva tu ga na vu ni waka ni kau; sa nomu matanitu ena vakataudeitaki vei iko, ni ko sa kila oti mada ni sa lewa ko lomalagi.

²⁷ O koya o qo, na tui, me vinaka kina vei iko na noqui vakavuvuli, ia na nomui valavala ca mo muduka e nai valavala dodonu, kei na nomu caka cala e na loloma vei ira na dravudravua; de vakabalavutaki beka kina na nomu tiko vinaka.

²⁸ Sa yaco kece na ka o qo vei Nipukatinesari na tui.

²⁹ Ni sa oti na vula e tinikarua sa lako voli ko koya e na vale levu ni matanitu vaka-Papiloni.

³⁰ Sa vosa na tui, ka kaya, Sa sega li ko Papiloni levu o qo, kaʼu sa tara koi au me vale ni matanitu e na noqu kaukauwa levu, me sa rogo kina na noqu lagilagi?

³¹ Ni sa tiko na vosa o qo e gusuna na tui, sa dua na domo sa lutu mai lomalagi, ka kaya, Sa tukuni vei iko, Nipukatinesari na tui, Na matanitu sa lako tani vei iko:

³² ia mai na tamata era na vakasavi iko tani, ia kei ira na manumanu ni vanua ko na tiko kaya: na co, me vaka na karavau, era na vakani iko kina, ka me vitu na yabaki me na oti yani vei iko, mo kila mada kina ni sa lewa ko Koya sa Cecere sara e na matanitu ni tamata, ka vua sa lomana kina sa solia vua.

³³ E na tiki-ni-siga ko ya sa yaco na ka o qori vei Nipukatinesari: ia mai na tamata sa vakasavi tani kina ko koya, kei na co, me vaka na karavau, sa kania, e na tegu talega ni lomalagi sa suasua kina na yagona, ia na drau ni uluna sa tubu mada me vaka na lawe ni ikeli, kei na nonai taukuku me vaka nai qaso ni manumanu.

³⁴ Ni sa oti na kena gauna, oi au ko Nipukatinesari, kaʼu a ta cake e na mataqu ki lomalagi, ia na lomaqu sa lesu tale mai vei au, o Koya sa Cecere sara kaʼu a qai vakavinavinakataki io ko koya sa bula ka tawa mudu kaʼu a vakacaucautaka ka vakarokorokotaka, ni sa lewa tawa mudu na nona lewa, kei na nona matanitu mai nai tabatamata ka yaco ki nai tabatamata:

³⁵ ia na kai vuravura kecega sa nanumi me ka e sega wale: ka vaka na nona veitalia sa cakacaka ko koya ki nai vavakoso vakalomalagi, kei na kai vuravura: a sa sega e dua e vakadaroya rawa na ligana, se kaya vua, A cava ko sa cakava?

³⁶ E na siga ko ya sa lesu tale mai vei au na lomaqu; ia me rogo kina na noqu matanitu, sa lesu mai vei au na kequi ukuuku kai serau; a ra sa mai qaravi au ko ira na noqu daubose, kei na qau turaga; ia e na noqu matanitu kaʼu a vakataudeitaki kina, kei na ka vakaturaga e uasivi cake sa vakaikuritaki vei au.

³⁷ Ia koi au ko Nipukatinesari kaʼu sa qai vakarokorokotaka na Tui kei lomalagi, ni sa dinadina kecega na nona cakacaka, ka dodonu na nonai valavala: ia ko ira era viavialevu lako sa rawa vua me vakamalumalumutaka.