Taniela 3 - AI VOLA TABU

O Nipukatinesari, sa bulia e dua na matakau a koula mai Tura, 1-7. Sa beitaki ko Seteraki, kei Meseki, kei Apeti-niko e na nodratou tawa sorova na matakau, 8-12. Ni sa vosa vakacudrucudruya na tui vei iratou, eratou sa vakatusa vinaka na Kalou dina, 13-18. Eratou sa biu ki loma ni buka, 19-23. Sa vakabulai iratou na Kalou, ia ko Nipukatinesari, ni sa raica na cakacaka ni Kalou, sa vakavinavinaka vua, 24-30.

¹ O NIPUKATINESARI na tui sa cakava e dua na matakau koula, na kena cecere sa caga dua na drau ka ruasagavulu, na kena rabailevu sa caga tinikava: sa vakaduria ko koya e na buca ko Tura, e na yasayasa vaka-Papiloni.

² Sa qai talaki ko Nipukatinesari na tui me vakasoqoni ira vata na turaga levu, kei na turaga lailai, kei na turaga ni veiqali, kei na dauveilewai, kei na turaga ni yau, kei na turaga ni lewa, kei na vu-ni-vunau, kei ira kece na turaga ni veimataqali, me ra lako mai ki na kena veibuli na matakau sa vakaduria ko Nipukatinesari na tui.

³ Sa ra qai soqoni vata na turaga levu, kei na turaga lailai, kei na turaga ni veiqali, kei na dauveilewai, kei na turaga ni yau, kei na turaga ni lewa, kei na vu-ni-vunau, kei ira kece na turaga ni veimataqali, ki na kena veibuli na matakau sa vakaduria ko Nipukatinesari na tui; a ra sa mai tu e na mata ni matakau sa vakaduria ko Nipukatinesari na tui.

⁴ Sa qai dua na matanivanua sa kacivaka vakadomoilevu, Sa vakaroti vei kemudou, na veimataqali, na lewe ni veivanua, kei na dui vosavosa,

⁵ ni dou sa rogoca na domo ni davui, na bitu-ni-vakatagi, na api, na lali o vakawa, nai qiriqiri, na lali, kei na ka domo vinaka kecega, mo dou qai bale sobu ka soro ki na matakau koula sa vakaduria ko Nipukatinesari na tui:

⁶ ia ko koya sa sega ni bale sobu ka soro ena biu ga e na tiki-ni-siga ko ya ki na loma ni lovo ni buka waqa.

⁷ O koya o qo e na tiki-ni-siga ko ya, ni ra rogoca kece na veimataqali na domo ni davui, na bitu-ni-vakatagi, na api, na lali e vakawa, nai qiriqiri, kei na ka domo vinaka kecega, sa ra qai bale sobu kece na veimataqali, na lewe ni veivanua, kei na dui vosavosa, ka sorova na matakau koula sa vakaduria ko Nipukatinesari na tui.

⁸ E na tiki-ni-siga ko ya sa ra qai toro mai e so na kai Kalitea, ka beitaki ira na kai Jutia.

⁹ Era vosa ka kaya vua na tui ko Nipukatinesari, Mo bula, na tui, ka tawa mudu.

¹⁰ O iko, na tui, ko sa vakatura e dua na vosa, me sai ira kece na tamata era rogoca na domo ni davui, na bitu-ni-vakatagi, na api, na lali e vakawa, nai qiriqiri, kei na lali, kei na ka domo vinaka kecega, me ra bale sobu ga ka sorova na matakau koula:

¹¹ ia ko koya sa tawa bale sobu ka soro, me biu ga ki na loma ni lovo ni buka waqa.

¹² Sa so na kai Jutia ko sa lesia kina na cakacaka ni yasayasa vaka-Papiloni, me ratou lewa, ko Seteraki, kei Meseki, kei Apeti-niko; o iratou na tamata o qo sa tawa vakarorogo vei iko, na tui: a nomu kalou eratou sa tawa qarava, kei na matakau koula ko sa vakaduria eratou sa tawa sorova.

¹³ O Nipukatinesari, ni sa qai cudru ka nene sa vakarota me kauti iratou mai ko Seteraki, kei Meseki, kei Apeti-niko. Sa ra qai kauti iratou mai na tamata o qori ki na mata ni tui.

¹⁴ Sa vosa ko Nipukatinesari ka kaya vei iratou, Sa ka nakiti, Seteraki, kei Meseki, kei Apeti-niko, ni sa noqu kalou dou a tawa qarava, kei na mataka koula kaʼu sa vakaduria dou a tawa sorova?

¹⁵ O qo, kevaka dou na vakarau tu e na tiki-ni-siga dou na rogoca kina na domo ni davui, na bitu-ni-vakatagi, na api, na lali e vakawa, nai qiriqiri, na lali, kei na ka domo vinaka kecega, mo dou bale sobu ga ka sorova na matakau kaʼu sa cakava; ena vinaka: ia, kevaka dou na bese ni sorova, o na tiki-ni-siga ko ya dou na biu ga ki na loma ni lovo ni buka waqa; ia ko cei na kalou ko ya me na vakabulai kemudou mai na ligaqu?

¹⁶ Sa ratou vosa ko Seteraki, kei Meseki, kei Apeti-niko, ka kaya vua na tui, Nipukatinesari, sa tawa yaga vei keitou e na ka o qo, me vosa vei iko.

¹⁷ Ke vakaoqori, ke sai koya na neitou Kalou keitou sa qarava ena vakabulai keitou rawa mai na lovo ni buka waqa, ia mai na ligamu, na tui, ena vakabulai keitou ga.

¹⁸ Ia ke sega, mo kila ga, ko iko na tui, ni sa nomu kalou keitou sa bese ni qarava, kei na matakau koula ko sa vakaduria, keitou sa bese ni sorova.

¹⁹ Sa qai cudru vakalevu sara ko Nipukatinesari, ia nai tovo ni matana sa dua tani mai vei Seteraki, kei Meseki, kei Apeti-niko: sa vosa ko koya, ka vakarota me vakatakatataki na lovo me vakavitu cake e na ka e dauraici ni vakatakatataki.

²⁰ Ia vei ira e so era tamata qaqa sara e na nonai valu sa vosa kina ko koya me vesuki Seteraki, kei Meseki, kei Apeti-niko, ka biuta ki na lovo ni buka waqa.

²¹ Sa ra qai vauci vata na tamata o qo kei na nodratoui curucuru, kei na nodratoui sulu eloma, kei na nodratoui sala, kei na nodratoui sulu e so, a ratou sa biu ki loma ni lovo ni buka waqa.

²² Ia e na vuku ni vosa ni tui ni sa kaukauwa, kei na lovo ni sa katakata vakalevu sara, o ira na tamata era laveti iratou cake ko Seteraki, kei Meseki, kei Apeti-niko, sa ra vakamatei e na yameyame ni buka waqa.

²³ Ja na tamata o qo e lewe tolu, ko Seteraki, kei Meseki, kei Apeti-niko, sa lutu sobu ki na loma ni lovo ni buka waqa ka vesuki tu.

²⁴ Ia ko Nipukatinesari na tui, sa qai kidacala, ka tu cake vakasauri mai, sa vosa ko koya, ka kaya vei ira na nona daubose, Sa tamata e lewe tolu eda a biuta ki na loma ni buka waqa ka vesuki, se segai? Era vosa ka kaya vua na tui, E dina, na tui.

²⁵ Sa vosa ko koya ka kaya, Raica, au sa raica na tamata e lewe va sa sereki, sa ratou lako voli tu e na loma ni buka waqa, a sa sega na ca e tauvi iratou; ia nai tovo ni kenai kava sa vaka na luve ni Kalou.

²⁶ Sa qai toro mai ko Nipukatinesari ki na gusu ni lovo ni buka waqa, sa vosa ko koya ka kaya, I Seteraki, kei Meseki, kei Apeti-niko, oi kemudou na tamata ni Kalou cecere, dou curu mai kituba ka lako mai. Sa qai curu mai ko Seteraki, kei Meseki, kei Apeti-niko mai na loma ni buka waqa.

²⁷ Ni sa soqoni mai ko ira na turaga levu, na turaga lailai, kei na turaga ni veiqali, kei ira na nona daubose na tui, era sa vakaraici iratou na tamata o qo, sa tawa kaukauwa kina na buka waqa ki na yagodratou, se dua na drau ni uludratou sa cori, se nodratoui curucuru sa dua tani mai, se na boi ni buka waqa sa yacovi iratou.

²⁸ Sa qai vosa ko Nipukatinesari, ka kaya, Me vakavinavinakataki ko koya na Kalou i Seteraki, kei Meseki, kei Apeti-niko, o koya sa tala mai na nona agilose, ka vakabulai iratou na nona tamata sa vakararavi vua, kei na vosa ni tui sa vakatanitaka, a sa solia na yagodratou, me ratou kakua ni qarava se sorova e dua tale na kalou, na nodratou Kalou ga.

²⁹ O koya o qo sa dua kina na vosa kaʼu sa vakatura, ka vaka, Na mataqali, na vanua, kei na vosa kecega, sa na vosavakacacataka na Kalou nei Seteraki, kei Meseki, kei Apeti-niko, era na tavai bulabula, ia na nodra veivale ena cakavi mei benubenu: ni sa sega tale na Kalou e veivakabulai rawa vakaoqo.

³⁰ Ia ko koya na tui sa qai vakayacori iratou ko Seteraki, kei Meseki, kei Apeti-niko e na yasayasa vaka-Papiloni.