Taniela 2 - AI VOLA TABU

Sa tadra ko Nipukatinesari, 1. Ni sa guilecava na nona tadra era sa tarogi kina na tamata ruku, a ra sa dredreta, 2-11. Era sa lewai me mate, kei iratou talega ko Tanieli kei na nonai tokani, 12, 13. Sa dara e na vakamamasu i Tanieli, a sa kune na tadra ni ratou sa masuta rua na Kalou, a sa vakavinavinaka kina rua ko Tanieli, 14-23. Sa tarova ko Tanieli na nodra vakamatei na tamata vuku, a sa kauti yani vua na tui, 24-26. Sa tukuna na tadra, 27-36, kei na kenai balebale, 37-45. Sa vakalevulevui kina ko Tanieli, 46-49.

¹ IA nai karua ni yabaki ni lewa i Nipukatinesari sa tadrataka na tadra ko Nipukatinesari, a sa kidroa kina na yalona, ia na nona moce sa takali vua.

² Sa qai vosa na tui me kacivi ira mai na tamata vuku, kei na rairai, kei na daucaka-mana, kei na kai Kalitea, me ra vakatakila vua na tui na nona tadra. A ra sa mai tu e na mata ni tui.

³ A sa kaya vei ira na tui, Au a tadrataka o dua na tadra, a sa kidroa kina na yaloqu meʼu kila na tadra.

⁴ Era sa qai vosa na kai Kalitea vua na tui e na vosa vaka-Siria, Mo bula, na tui, ka tawa mudu: mo tukuna mai na tadra ki na nomu tamata, keitou na qai vakatakila na kenai balebale.

⁵ A sa vosa na tui ka kaya vei ira na kai Kalitea, Na ka o qori sa takali vei au: kevaka dou na tawa vakatakila vei au na tadra, kei na kenai balebale, dou na tavai bulabula, ia na nomudou veivale ena cakavi mei benubenu.

⁶ Ia na tadra, kei na kenai balebale, kevaka dou na vakatakila, sai solisoli, kei nai yau, kei na vakarokoroko levu dou na rawata maivei au: o koya o qo, na tadra, kei na kenai balebale, dou vakatakila kina vei au.

⁷ Era sa baki vosa tale, ka kaya, O koya na tui, me tukuna mai na tadra ki na nona tamata, ia na kenai balebale keitou na vakatakila.

⁸ A sa vosa na tui ka kaya, E dina, au sa kila ni dou sa via vakabera, e na vuku ni dou sa raica ni sa takali vei au na ka o qori.

⁹ Ia na tadra, kevaka dou sa sega ni vakatakila vei au, sa dua bauga na kemudou vosa: ni sa vosa lasu ka ca dou sa vakarautaka me tukuna e mataqu, me dua tani mada kina na gauna: o koya o qo, na tadra mo dou tukuna kina vei au, kaʼu na qai kila ni sa kenai balebale dou na vakatakila rawa vei au.

¹⁰ Era vosa na kai Kalitea e na mata ni tui, ka kaya, Sa sega na tamata e na vanua mamaca me na vakatakila rawa na ka o qo nei koya na tui: a sa sega e dua na tui, se na turaga, se na dauveilewai, me na taroga na ka vakaoqo vua e dua na tamata vuku, se na daucaka-mana, se na kai Kalitea.

¹¹ Ia na ka sa taroga na tui sa dredre, a sa sega tale e vakatakila rawa e na mata ni tui, o ira ga na kalou, era tawa tiko vata kei na tamata.

¹² E na vuku ni ka o qo sa cudru kina na tui ka ninini vakalevu, ka vosa me vakarusai kece na tamata vuku e Papiloni.

¹³ A sa lako yani na vosa me ra vakamatei na tamata vuku; a ra qarai Tanieli kei iratou na nonai tokani me vakamatei.

¹⁴ Ia ko Tanieli sa qai tabana yani e na lewa vuku vei Erioki na turaga ni valu ni tui, o koya sa lako yani me vakamatei ira na tamata vuku e Papiloni:

¹⁵ sa vosa ko koya ka kaya vei Erioki nai talatala levu ni tui, A cava sa vakariri kina na vosa mai vua na tui? Sa qai vakatakila ko Erioki na ka o qori vei Tanieli.

¹⁶ Ia ko Tanieli sa qai curu yani, ka masuti koya na tui me yalobalavu mada vua, ena qai vakatakila vua na tui nai balebale ni tadra.

¹⁷ Sa qai lako ko Tanieli ki na nona vale, ka tukuna na ka o qo vei Eneniya, kei Misaeli, kei Asariya, na nonai tokani:

¹⁸ me ratou kere loloma vua na Kalou ni lomalagi e na vuku ni ka vuni o qo; me ratou kakua ni rusa vata ko Tanieli kei na nonai tokani, kei ira na tamata vuku e Papiloni.

¹⁹ A sa qai vakaraitaki na ka vuni o qo vei Tanieli e na raivotu ni bogi. Sa qai vakavinavinaka ko Tanieli vua na Kalou ni lomalagi.

²⁰ Sa vosa ko Tanieli, ka kaya, Na yacana na Kalou, me vakavinavinakataki tiko ka tawa mudu: ni sa nona ga na vuku kei na kaukauwa:

²¹ a sa vukica ko koya na yabaki kei na gauna: sa vakasivoi ira na tui, ka lesi ira na tui: sa solia na vuku vei ira na lomavuku, kei na kila-ka vei ira na yalomatua:

²² sa vakaraitaka ko koya na ka titobu ka vuni: sa kila ko koya na ka sa tiko e na butobuto, ia na rarama sa tiko ga vua.

²³ Sai iko na Kalou ni noqu qase, kaʼu sa vakacaucautaka, ka vosavakalougatataka, ni ko sa solia vei au na vuku kei na kaukauwa, a sa vakatakila vei au o qo na ka keitou a kerea vei iko: ni ko sa vakatakila vei keitou na ka o qo nei koya na tui.

²⁴ Ia ko Tanieli sa qai curu yani vei Erioki, o koya ka lesia na tui me vakamatei ira na tamata vuku e Papiloni: sa laʼki vosa vua, ka vaka; O ira na tamata vuku e Papiloni mo kakua ni vakamatea: mo kauti au yani ki matana na tui, ia nai balebale ni tadra kaʼu na vakatakila vua na tui.

²⁵ Ia ko Erioki sa qai kauti Tanieli vakasauri yani ki matana na tui, a sa vosa vakaoqo vua, Au sa kunea e dua na tamata vei ira na …bula ni Juta: ena vakatakila ko koya nai balebale ni tadra vua na tui.

²⁶ Sa vosa na tui ka kaya vei Tanieli, na yacana ko Pelitisasari, O sa rawata li me vakatakila vei au na tadra kaʼu a raica, kei na kenai balebale?

²⁷ Sa vosa ko Tanieli e na mata ni tui, ka kaya, Na ka vuni sa taroga na tui, o ira na tamata vuku, na rairai, na vuku, kei na daucaka-mana, sa ra tawa vakatakila rawa vua na tui;

²⁸ ia ka sa dua na Kalou mai lomalagi sa vakaraitaka na ka vuni, a sa vakatakila vua na tui ko Nipukatinesari na ka ena yaco e na gauna maimuri. A nomu tadra kei na raivotu ni ulumu e na nomui mocemoce, sa vakaoqo;

²⁹ O iko, na tui, a nanuma ni lomamu e na nomui mocemoce a cabe cake ki na ka ena yaco maimuri: ia ko koya sa vakaraitaka na ka vuni sa vakatakila vei iko na ka ena yaco mai.

³⁰ Ia koi au, sa sega e na vuku ni vuku e tiko vei au ka sega vei ira kecega sa bula, ni sa vakaraitaki kina vei au na ka vuni o qo, na kenai balebale ga me ratou vakatakila vua na tui, kei na nanuma ni lomamu mo sa kila rawa.

³¹ O iko, na tui, ko a vakasarava, ka raica e dua na matakau levu. A matakau levu o qori, na kenai serau e uasivi cake, sa wavu tu mai e matamu; ia na kenai rairai sa ka rerevaki.

³² A uluna na matakau o qori sa koula dina, a serena kei na ligana sa siliva, a ketena kei na sagana sa parasa,

³³ a temo ni yavana sa aironi, ta na yavana, sa so na tikina e aironi ka so na tikina e tete.

³⁴ O a vakasarava tiko, ka kavida mai e dua na vatu ka tawa viritaki e na liga, a sa lidika na yava ni matakau, e aironi ka tete, ka vurumemea.

³⁵ Sa qai vorolaki vata na aironi, na tete, na parasa, na siliva, kei na koula, a sa yaco me tautauvata kei na qa ni sila e na rara ni sila e na vula i matua; a sa dui cagina tani yani, me tawa kune tale na kena yasana: ia na vatu ka lidika na matakau, sa tubu me ulu-ni-vanua levu, ka roboti vuravura kecega.

³⁶ O qo na tadra; ia na kenai balebale keitou na tukuna e na mata ni tui.

³⁷ Sai iko, na tui, na nodra tui na tui: ni sai koya na Kalou ni lomalagi sa solia vei iko na matanitu, kei na kaukauwa, kei na gumatua, kei nai ukuuku.

³⁸ Ia na vanua kecega era tiko kina na luve ni tamata, kei na manumanu ni vanua, kei na manumanu ni lomalagi, sa solia ko koya ki na ligamu, a sa lesi iko mo lewai ira kecega. Sai iko na ulu koula o qori.

³⁹ Ka veitaravi kei iko, sa na tubu mai e dua tale na matanitu e lailai sobu vei iko, ka dua tani tale, nai katolu ni matanitu, e parasa, o koya ena lewai vuravura kecega.

⁴⁰ Ia nai kava ni matanitu ena kaukauwa ga me vaka na aironi: ka ni sa aironi sa vurumemea ka butuvorota na ka kecega: ka vaka sa aironi e vorolaka na ka kece o qori, sa ka ko ya ena vurumemea vakakina ka vorolaka.

⁴¹ Ia ni ko a raica na yavana kei nai qaqalo ni yavana, ni sa tete e so na tikina, ka aironi e so na tikina, ena veisei na matanitu ko ya; ia na kaukauwa ni aironi ena tu ga kina, ka ni ko sa raica na aironi ni sa waki vata kei na tete lolobo.

⁴² Ia ka vaka nai qaqalo ni yavana ni sa aironi e so na tikina, ka tete e so na tikina, sa dua na tiki ni matanitu ko ya ena kaukauwa, ka dua na tikina ena vuru rawarawa.

⁴³ Ia ni ko sa raica na aironi ni sa waki vata kei na tete lolobo, era na veiwaki vata kei na kawa kaisi: ia era na sega ga ni veikabiti, me vaka na aironi ni sa tawa waki vata rawa kei na tete.

⁴⁴ Ia e na nodra gauna na tui ko ya ena qai vakatura na Kalou ni lomalagi e dua na matanitu, ena sega sara ni ca rawa: ia na matanitu ko ya ena sega ni vakalaivi vei ira na tamata tani, ena vurumemea ga ka vakaotia na veimatanitu o qori, ena tu talega ka tawa mudu.

⁴⁵ Ia ni ko a raica na vatu ni sa kavida mai na ulu-ni-vanua ka tawa viritaki e na liga, ka sa vurumemea na aironi, na parasa, na tete, na siliva, kei na koula: o koya na Kalou levu sa vakatakila kina vua na tui na ka ena yaco maimuri: a sa mana na tadra, ka dina na kenai balebale.

⁴⁶ Sa qai bale vakatobocu ko Nipukatinesari na tui, ka soro vei Tanieli, ia nai madrali kei na ka boi vinaka sa vakarota ko koya me ra cabora vua.

⁴⁷ A sa vosa na tui vei Tanieli, ka kaya, Sa dina ni sa nomu Kalou sa nodra Kalou na kalou, kei na nodra Turaga na tui, kei koya sa vakaraitaka na ka vuni, ni ko sa vakaraitaka rawa mai na ka vuni o qo.

⁴⁸ Ia na tui sa qai vakalevutaki Tanieli, nai loloma levu e vuqa talega sa solia vua, a sa lesi koya me lewa taucoko na yasayasa vaka-Papiloni, me liu talega vei ira na turaga ni tamata vuku kecega e Papiloni.

⁴⁹ Ia ko Tanieli sa masuta vua na tui, a sa lesia na cakacaka ni yasayasa vaka-Papiloni vei Seteraki, kei Meseki, kei Apeti-niko, me ratou lewa: ia ko Tanieli sa tiko ga e na matamata-ni-koro ni tui.