Taniela 12 - AI VOLA TABU

Ena vakabulai ira na Isireli ko Mikaeli mai na nodra rarawa, 1-4. Sa vakatakilai na veigauna e so vei Tanieli, 5-13.

¹ IA e na gauna ko ya ena tu cake ko Mikaeli, na turaga levu sa totaki ira na luvedra na kai nomu: ena qai yaco e dua na gauna ni rarawa, sa sega sara e vakakina mai nai vakatekivu ni matanitu ka yacova na gauna ko ya: ia e na gauna ko ya ena vakabulai na kai nomu, o ira kece sa na kune ni ra volai e nai vola.

² Ia ena lewe vuqa vei ira sa moce e na kuvu-ni-soso ena yadra, e so me ra bula tawa mudu, ka so me ra madua ka beci ka tawa mudu.

³ Ia ko ira sa vuku era na cila, me vaka na rarama kei lomalagi; kei ira sa saumaki ira na lewe vuqa me ra yalododonu, mo vaka na kalokalo ka tawa mudu.

⁴ Ia ko iko, Tanieli, mo tinia na vosa, ka dregata nai vola, me yaco mada na kenai vakataotioti: ena lewe vuqa era na veiciciyaki, ena vakalevutaki talega na vuku.

⁵ Ia kaʼu a vakaraica, koi au ko Tanieli, ka raica, sa lewe rua tale erau wavu tu, e dua e na bati ni uciwai o qo, ka dua e na bati ni uciwai ko ya.

⁶ A sa kaya e dua vua na tamata sa vakaisulu laino e dela ni wai ni uciwai, A cava na kena dede me qai yaco nai otioti ni veika o qo e veivakidacalataki?

⁷ Au a qai rogoca na tamata sa vakaisulu laino e dela ni wai ni uciwai, ni sa laveta ko koya na ligana i matau kei na ligana i mawi ki lomalagi, ka vosavavakini, a sa cavuti Koya sa bula ka tawa mudu, ni na dua mada na yabaki, ka so tale na yabaki, ka dua na tiki ni yabaki; ia ni sa qai rawa na nona musuka na nodra kaukauwa na mataqali tabu, ena qai vakayacori na ka kecega o qo.

⁸ Ia koi au kaʼu a rogoca, ka sega ni kaʼu kila: au a qai kaya, Noqu Turaga, a cava nai vakataotioti ni veika o qo?

⁹ A sa kaya ko koya, Mo lako yani, Tanieli: ni sa tini ka dregati na vosa me yaco mada na gauna ni otioti.

¹⁰ Ena vakasavasavataki, ka vakavulavulataki, ka vakatovolei na lewe vuqa; ia era na caka ca ga na tamata ca: a ra na sega sara ni kila rawa ko ira na tamata ca; ia ko ira sa vuku era na kila rawa.

¹¹ Ia mai na gauna ena vakatakali kina nai soro ni veisiga, ka vakaduri na ka vakasisila sa dauveivakarusai, ena bogi udolu ka rua na drau ka ciwasagavulu.

¹² Sa kalougata ko koya sa waraka, ka yacova na bogi e udolu ka tolu na drau ka tolusagavulu ka lima.

¹³ Ia ko iko, mo lako yani me yaco mada nai vakataotioti; ni ko na vakacegu, ka tu e na nomui votavota ni sa vakaoti na veibogi.