Taniela 10 - AI VOLA TABU

Ni sa vakamalumalumutaki koya oti ko Tanieli, sa qai raica e dua na raivotu, 1-9. Ni sa kidroa vakalevu ko koya, sa vakaukauwataki koya na agilose, 10-21.

¹ E NAI ka tolu ni yabaki i Koresi na tui Perisia sa dua na ka sa vakaraitaki vei Tanieli, na yacana sa vakatokai vua ko Pelitisasari; a sa ka dinadina, ia sa dua nai valu balavu: a sa kila na ka o qo ko koya, ni sa macala vua na raivotu.

² E na gauna ko ya, oi au ko Tanieli, kaʼu a tagi tikoga ka tolu sara na wiki.

³ Na kakana vinaka kaʼu a sega ni kania, kei na lewe ni manumanu kei na waini sa sega ga ni curu ki gusuqu, e nai lumu talega kaʼu a tawa lumu kina, a sa taucoko mada na wiki e tolu.

⁴ Ia e nai karuasagavulu ka va ni siga ni matai ni vula, niʼu a tiko e na bati ni uciwai levu, ko Etikeli;

⁵ au a qai ta cake e na mataqu, ka vakaraica, ka raica, sa dua na tamata sa vakaisulu e nai sulu laino, ia na tolona sa vauci e na koula dina ni Ufasi:

⁶ a yagona talega sa vaka na perili, kei na matana sa raici tautauvata kei na livaliva, kei na matana e rua sa vaka na cina caucaudre e rua, kei na ligana kei na yavana sa vaka na mata ni parasa matavinaka, kei na domo ni nona vosa sa vaka na domo ni lewe vuqa.

⁷ Ia kaʼu a raica, koi au duaduaga ko Tanieli, na raivotu: ia ko ira na tamata keitou tiko vata sa ra tawa raica na raivotu; ia na sautaninini levu sa tauvi ira, a ra sa dro me vunitaki ira.

⁸ Ia koi au kaʼu a laivi duaduaga mai, ka raica na raivotu levu o qo, a sa tawa vo vei au na kaukauwa: ia na kequ vinaka sa vuki me ca, a sa sega ni kaʼu rawata tiko na kaukauwa.

⁹ Ia kaʼu a rogoca ga na domo ni nona vosa: ia niʼu a rogoca na domo ni nona vosa, kaʼu sa moce lutu no e mataqu, ia na mataqu sa koto ga ki na qele.

¹⁰ Ka, raica, sa qai dua na liga sa tarai au, a sa vakaduri au e na duruqu kei na qeteqete ni ligaqu.

¹¹ A sa kaya vei au, O iko Tanieli, na tamata daulomani, mo kila na vosa kaʼu sa tukuna vei iko, ka tu cake e na yavamu: niʼu sa qai talai mai vei iko. Ia ni sa vosataka ko koya na vosa o qo vei au, kaʼu sa wavu ka sautaninini tu.

¹² Sa qai kaya vei au ko koya, Mo kakua ni rere, Tanieli: ni sa mai na kenai matai ni siga ko a vakasara kina na lomamu me kila, ka vakararawataki iko e na mata ni Kalou, ka rogoci ga na nomu vosa, ia koi au kaʼu sa lako mai e na vuku ni nomu vosa.

¹³ Ia na turaga ni matanitu ko Perisia sa vorati au ka ruasagavulu ka dua na bogi: ka raica, ko Mikaeli, nai matai ni turaga, sa lako mai me vukei au; kaʼu mani tiko ga yani maikea kei ira na tui Perisia.

¹⁴ Au sa qai lako mai me vakatakila vei iko na ka ena yacovi ira na kai nomu e na gauna maimuri: ni na vakabogi tautau na raivotu.

¹⁵ Ia ni sa vosa oti vakaoqo vei au ko koya, kaʼu sa vakacuva na mataqu ki na qele, ka galu toka.

¹⁶ Ka, raica, sa dua e raici tautauvata kei na luvedra na tamata sa qai tara mai na tebenigusuqu: kaʼu a qai dalaga na gusuqu, ka vosa, ka kaya vua sa wavu tu e mataqu, Noqu turaga, e navuku ni raivotu sa lesu mai kina vei au na noqu rarawa, ia kaʼu sa sega ni rawata tiko na kaukauwa.

¹⁷ Ni na rawa vakaevei vua na tamata ni noqu turaga o qo na veivosaki kaya na noqu turaga o qo? ia koi au, sa sega ga vei au na kaukauwa, na cegu talega sa tawa vo vei au.

¹⁸ Sa baki mai tarai au tale e dua sa vaka na tamata na kena raici, a sa vakaukauwataki au,

¹⁹ ka kaya, O iko, na tamata daulomani, kakua ni ko rere: mo vakacegu, mo kaukauwa ga, io, mo kaukauwa ga. Ia ni sa vosa oti vei au ko koya, kaʼu sa kaukauwa mai ka kaya, Me vosa mai, na noqu turaga; ni ko sa vakaukauwataki au.

²⁰ Sa qai kaya ko koya, O sa kila se vakaevei beka na kawana kaʼu sa lako mai kina vei iko? ia o qo, kaʼu na lesu tale mada me vala kaya na tui Perisia: ia niʼu sa lako yani, raica, ena qai lako mai na tui Javana.

²¹ Ia kaʼu na tukuna vei iko na ka sa volai e nai vola dina: a sa sega e dua sa veivuke kei au e na veika o qo, o Mikaeli ga na nomudou turaga.