Sefanaia 1 - AI VOLA TABU

A WASE I. —Ena cudruvi sara ko ira na Juta e na vuku ni nodrai valavala ca e vuqa, 1-18.

¹ A VOSA i Jiova ka yaco vei Sifaniya na luve i Kusi, na luve i Kitaliya, na luve i Emariya, na luve i Isikeya, e na gauna i Josaia na luve i Amoni, na tui Juta.

² Au na kauta laivi sara na ka kecega mai na dela ni vanua, sa kaya ko Jiova.

³ Au na kauta tani na tamata kei na manumanu; au na kauta tani na manumanu ni lomalagi, kei na ika ni waitui, kei na veika era tarabe kina, ko ya vata kei na tamata ca; ia kaʼu na muduka tani na tamata mai na vanua, sa kaya ko Jiova.

⁴ Au na dodoka talega na ligaqu me tauci Juta, kei ira kecega na kai Jerusalemi; ia kaʼu na kauta tani mai na yasana o qo na vo i Peali, kei na yacadra na bete dina era ca, o ira vata kei na bete lasu;

⁵ kei ira sa soro ki na kalokalo ni lomalagi e na dela ni veivale; kei ira sa soro ka vosavavakini vei Jiova, ka vosavavakini vei Malikami;

⁶ kei ira sa vuki tani vei Jiova, a ra tawa vakasaqarai Jiova, se tarogi koya.

⁷ Mo tiko lo e na mata ni Turaga ko Jiova: ni sa voleka mai na siga i Jiova: ni sa vakarautaka ko Jiova e dua nai madrali, a sa lesi ira sa sureta ko koya.

⁸ Ia ena yaco e na siga ni madrali i Jiova, au na cudruvi ira na turaga kei ira na gone vakaturaga, kei ira kecega era vakaisulu e nai sulu vakatani.

⁹ E na siga talega ko ya au na cudruvi ira kece era ladeva nai lago ni katuba, ka vakasinaita na veivale ni nodra turaga e nai yau ni veivakayanaki kei na veivakaisini.

¹⁰ Ia ena yaco e na siga ko ya, sa kaya ko Jiova, ena ia na domo ni tagi mai na matamata-ni-koro ni ika, kei na qoqolou mai na kenai karua, kei na veivakacacataki levu mai na veiulu-ni-koro.

¹¹ Dou qoqolou, na lewe i Makitesa, ni ra sa vakarusai kece na mataqali dauveivoli; sa ra muduki kece tani na daucola siliva.

¹² Ia ena yaco e na gauna ko ya, au na vakasaqaqara voli e Jerusalemi e na cina, ka cudruvi ira era vaka na waini sa cevata tu e na kena soko, era kaya e lomadra, Ena sega ni caka ka vinaka ko Jiova, ena sega talega ni caka ka ca.

¹³ Ia na nodrai yau ena yaco mei toki ni valu, kei na nodra veivale me rusa: a ra na tara vale, ka tawa tiko kina; a ra na tea na veivaini, ka tawa gunuva na kena waini.

¹⁴ Sa voleka mai na siga i Jiova e levu, sa voleka mai, ia sa kusakusa sara mai; a domona na siga i Jiova, sa ka rarawa na nona tagi kina na qaqa.

¹⁵ A siga ni cudru na siga ko ya, na siga ni ca kei na rarawa, na siga ni veivakacacani kei na veivakarusai, na siga butobuto ka loaloa, na siga ni o kei na butobuto levu,

¹⁶ na siga ni davui kei na kaila ni valu, na kedra na Veikoro kaukauwa, kei na kedra na veivale ni valu e cecere.

¹⁷ Ia kaʼu na vakararawataki ira na tamata, a ra na lako voli me vakai ira na mataboko, e na vuku ni sai Jiova erai valavala ca kina: ia na kedra dra ena sovaraki me vaka na kuvu-ni-soso, kei na lewedra me vaka na de-ni-manumanu.

¹⁸ Io, na nodra siliva kei na nodra koula ena tawa vakabulai ira rawa e na siga ni cudru i Jiova; ia e na buka ni nona vuvu ena kani kina na vanua taucoko: ni na vakidacala sara na nona vakaoti ira laivi na lewe ni vanua.