Sakaraia 11 - AI VOLA TABU

Ena vakacacani ko Jerusalemi. E na vuku ni ra biuti koya na Mesaia, ena biuti ira ko koya, 1-17.

¹ DOLAVA, Lipanoni, na nomu katuba, me katia na nomu sitari na buka.

² Mo qoqolou, na paini, ni sa bale na sitari; ni sai ira e lagilagi era vakacacani: dou qoqolou, na oki ni Pasani; ni sa bale sobu na veikau kaukauwa.

³ Sa dua na domo ni nodra qoqolou nai vakatawa; ni sa vakacacani na nodra lagilagi: sa dua na domo ni nodra tagi na luve ni laioni: ni sa vakacacani na qaciqacia kei Joritani.

⁴ Sa vosa vakaoqo ko Jiova na noqu Kalou; Mo vakatawa na qele ni sipi dauvakamatei;

⁵ o ira sa nodrai taukei era vakamatei ira, ka ra sega ni cavuti me cala: o ira talega era volitaki ira era sa dui kaya, Me vakavinavinakataki ko Jiova; niʼu sa vutuniyau mai: ia na nodrai vakatawa era sa tawa loloma vei ira.

⁶ Niʼu na tawa lomani ira tale na lewe ni vanua, sa kaya ko Jiova, ia raica, kaʼu na dui soli ira na tamata yadua ki na liga ni kai nona, kei na liga ni dui nona tui: a ra na yavita na vanua, ia kaʼu na sega ni vakabulai ira mai na ligadra.

⁷ Ia kaʼu na vakania na qele ni sipi e dauvakamatei, na sipi e ka lomani sara. Ia kaʼu a taura e rua nai titoko; e dua kaʼu a vakatoka na Loloma, ka dua kaʼu a vakatoka nai Vau; au a qai vakatawa na qele ni sipi.

⁸ Ia kaʼu a muduki ira tani nai vakatawa e tolu e na vula e dua bau; ia na yaloqu sa rarawa vei ira, a yalodra talega sa cati au.

⁹ Au a qai kaya, Au na sega ni vakatawai kemudou: na ka sa mate, me mate ga; na ka talega sa muduki tani, me muduki tani ga; ia na kena vo me ra dui veikanikani vakai ira ga.

¹⁰ Au a qai taura na noqui titoko na Loloma, ka tamusuka rua, meʼu musuka na noqu veivalayalati kaʼu a cakava kei ira kece na veimataqali.

¹¹ A sa musuki e na siga ko ya: a ra sa qai kila kina ko ira na qele ni sipi e ka lomani ka sa qaravi au, ni sa vosa i Jiova o qori.

¹² Au a qai kaya vei ira, Ke vinaka e na matamudou, dou solia mai na kequi voli; ke segai, ke sa kakua ga. A ra sa vakarautaka na kequi voli e tolusagavulu na tiki ni siliva.

¹³ A sa kaya vei au ko Jiova, Mo biuta ga vua na dautuli kuro: nai voli talei kaʼu a vakatauvatani kaya vei ira. Au a qai taura na tiki ni siliva e tolusagavulu, ka biuta vua na dautuli kuro e na vale i Jiova.

¹⁴ Au a qai tamusuka rua na noqui titoko kadua, nai Vau, meʼu musuka na nodra veiwekani tiko na Juta kei na Isireli.

¹⁵ A sa kaya vei au ko Jiova, Mo ia tale, ka mani taura vei iko nai yaya ni vakatawa lialia.

¹⁶ Ia, raica, kaʼu na vakatubura e dua nai vakatawa e na vanua, na ka sa yali ena sega ni mai raica, na ka sa sese ena sega ni vakasaqara, na ka talega sa ramusu ena sega ni vauca, na ka sa tawa lako rawa ena sega ni vakania: ia na lewe ni sipi sa uro ena kania, kei na nodrai qaso ena dresulaka.

¹⁷ Ena ca nai vakatawa tawa yaga sa biuta na qele ni sipi! nai seleiwau ena tauca na ligana, kei na matana i matau: a ligana ena wamalai sara, kei na matana i matau ena vakabutobutotaki sara.