Ruci 4 - AI VOLA TABU

Sa bose ko Poasi kei na lewe ni nona koro me volia na vanua i Naomi kei Ruci, me watina ko Ruci, 1-12. Sa kauti Ruci ko Poasi me watina, sa tubu vei rau ko Isei kei Tavita, 13-22.

¹ A SA lako cake ko Poasi ki na matamata-ni-koro, a sa tiko sobu maikina: ka, raica, sa lako voli na wekana ka vosataka ko Poasi, a sa kaya ko koya, Oi, ko kari! mo gole mai, mo mai tiko eke. A sa gole mai ko koya, ka tiko sobu.

² A sa kauta mai ko koya e tini na tamata maivei ira na qase e na koro ko ya, ka kaya, Dou tiko sobu eke. A ratou sa tiko sobu.

³ A sa kaya ko koya vua na wekana dina, O Naomi, o koya sa lako mai na veiyasana i Moapi, sa volitaka e dua na tiki ni vanua, a nei Elimeleki na wekadaru:

⁴ ia kaʼu a kaya meʼu tukuna vei iko, ka vaka, Mo volia e matadra na lewe ni koro, kei na matadra na qase ni kai noqu. Kevaka ko via volia, mo volia; ia kevaka ko na sega ni via volia, mo qai tukuna mai vei au, meʼu kila: ni sa sega e dua tale me volia, ko iko ga; ia kaʼu sa muri iko. A sa kaya ko koya, Kaʼu na volia.

⁵ A sa kaya ko Poasi, E na siga ko sa volia kina na tiki ni vanua mai na liga i Naomi, e dodonu mo volia maivei Ruci talega na kai Moapi, na wati i koya sa mate, ka vakatubura na yacana sa mate ki na nonai votavota.

⁶ A sa kaya ko koya na wekana, Au sa sega ni volia rawa me noqu, deʼu sa vakacacana na noqui votavota: o iko, mo volia vei iko na ka sa dodonu meʼu volia; niʼu sa sega ni volia rawa.

⁷ Ia sa dauvakaoqo nai valavala eliu e Isireli, ni sa ia na veivoli kei na veisau, me vakataudeitaka na ka kecega: sa luvata na nonai vava na tamata, ka solia vua na kai nona: ia o qo nai vakadinadina vei ira na Isireli.

⁸ A sa kaya kina vei Poasi ko koya na wekana, Mo volia me nomu. A sa qai luvata na nonai vava.

⁹ A sa kaya ko Poasi vei ira na qase, kei ira kecega na tamata, Dou sa kila edaidai ni kaʼu sa volia mai na liga i Naomi na ka kecega ka nei Elimeleki, kei na ka kecega ka nei Kiliyoni kei Maloni:

¹⁰ ia ko Ruci talega na kai Moapi, na wati i Maloni, kaʼu sa volia me watiqu, meʼu vakatubura na yacana sa mate ki na nonai votavota, ka me kakua ni mudu na yaca ni mate vei ira na wekana, kei na matamata-ni-koro ni nona tikina: dou sa kila e na siga o qo.

¹¹ Ia sa kaya ko ira na tamata kecega era sa tiko mai na matamata-ni-koro, kei ira na qase, Keimami sa kila. Me qisia ko Jiova na alewa o qo sa lako mai ki na nomu vale me tautauvata kei Rejili, ka tautauvata kei Lia, oi rau erau a tara na vale i Isireli: ia me talei na nomu cakacaka mai Efiraca, a me rogo na yacamu mai Pecileema:

¹² ia na nomu vale me vaka na vale i Feresi, o koya ka vakasucuma vei Juta ko Tamari, me vakakina na kawa ena solia vei iko ko Jiova mai na alewa o qo.

¹³ A sa kauti Ruci ko Poasi, a sa yaco ko koya me watina: a sa curu vua ko koya, a sa solia vua ko Jiova me kunekune, a sa vakasucuma e dua na luvena tagane.

¹⁴ A ra sa kaya na alewa vei Naomi, Me vakavinavinakataki ko Jiova, o koya sa sega ni biuti iko me kakua na wekamu e na siga edaidai, ia ena rogo na yacana e Isireli:

¹⁵ ia ena nomui vakavakacegu ko koya, kei koya ena vakani iko ni ko sa sika mai: ni sa vakasucumi koya na vugomu, o koya sa lomani iko, ka sa vinaka vei iko, ka ca ke sa vitu na luvemu tagane.

¹⁶ A sa kauta na gone ko Naomi, ka keveta e na lomaserena, ka sa susugi koya.

¹⁷ A sa vakayacani koya ko ira na alewa na kai nona, ka kaya, Sa sucu e dua na goneatagane vei Naomi; a ra sa vakatoka na yacana ko Opeti: o koya na tama i Isei, na tama i Tavita.

¹⁸ Ia o qo nai tabatamata nei Feresi: sa sucu vei Feresi ko Esironi,

¹⁹ a sa sucu vei Esironi ko Rami, a sa sucu vei Rami ko Aminatapi,

²⁰ a sa sucu vei Aminatapi ko Nasoni, a sa sucu vei Nasoni ko Salimoni,

²¹ a sa sucu vei Salimoni ko Poasi, a sa sucu vei Poasi ko Opeti,

²² a sa sucu vei Opeti ko Isei, a sa sucu vei Isei ko Tavita.