Ruci 3 - AI VOLA TABU

Sa vakavulici Ruci ko Naomi, 1-5. Sa lomani Ruci ko Poasi, a sa nanuma me watina, 6-18.

¹ SA qai kaya vua ko Naomi na vugona, Na luvequ, meʼu sega li ni qara vei iko na vakacegu, mo vinaka kina?

² Ia o qo, sa sega li ni wekadaru ko Poasi, ko a tiko kei ira na nona alewa? Raica, sa irivi parile ko koya e na bogi edaidai e na rara ni buturaki sila.

³ Mo sisili mada, ka lumuti iko, ka vakasulumi iko e na nomui sulu, ka lako sobu ki na rara; mo kakua ni vakatakilai iko vua na tamata, ka me kana ka gunu oti mada ko koya.

⁴ Ia ni sa laʼki davo ko koya, mo kila na tikina sa davo kina ko koya, ia mo lako kina, ka cereka nai tutuvi sa ubi kina na yavana, ia mo koto sobu; ia ena tukuna ko koya vei iko na ka mo cakava.

⁵ A sa kaya vua ko koya, A ka kecega ko sa kaya vei au kaʼu na kitaka.

⁶ A sa lako sobu ko koya ki na rara, a sa cakacaka me vaka na ka kecega ka rotaka vua ko na vugona.

⁷ Ia ni sa kana ka gunu oti ko Poasi, a sa marau na yalona, sa laʼki koto mai na mua ni binibini sila: a sa lako vakamalua ko koya, ka cereka nai tutuvi sa ubi kina na yavana, a sa koto sobu.

⁸ Ia ni sa lomaloma-ni-bogi, sa rere ko koya na tamata, a sa vuki, ka, raica, sa dua na alewa sa koto ki na yavana.

⁹ A sa kaya ko koya, O cei ko iko? A sa kaya ko koya, Oi au ko Ruci, na nomu vada: mo tevuka na nomui tutuvi me ubia na nomu vada: ni dara sa veiwekani.

¹⁰ A sa kaya ko koya, Mo kalougata maivei Jiova, na luvequ: sa levu na loloma ko sa cakava emuri o qo ka lailai eliu, e na vuku ni ko sa sega ni muri ira na tagane cauravou, se dravudravua se vutuniyau.

¹¹ Ia o qo, na luvequ, mo kakua ni rere; au na cakava vei iko na ka kecega ko sa kaya: ni ra sa kila ko ira kecega na kai noqu, era sa mai na matamata-ni-koro, ni ko sa alewa yalododonu.

¹² Ia o qo, sa dina niʼu sa wekamu dina; a sa dua ga na wekamu voleka ka yawa koi au.

¹³ Mo tikoga e na bogi o qo, ia e na mataka, kevaka ena cakava ko koya vei iko nai valavala ni veiwekani dina, sa vinaka; me cakava ko koya na cakacaka ni veiwekani: ia kevaka sa bese ni cakava vei iko na cakacaka ni veiwekani dina, me vaka sa bula ko Jiova, kaʼu na cakava vei iko na cakacaka ni veiwekani: mo koto me sabogibogi.

¹⁴ A sa koto ki na yavana ko koya ka mataka mai: a sa tu cake ko koya ni sa sega ni veikilaki rawa na tamata. A sa kaya ko koya, Me kakua mada ni kilai ni sa lako mai na alewa ki na rara.

¹⁵ Sa kaya tale ko koya, Mo kauta mai nai tutuvi ko sa vakaisulu kina, ka taura. Ia ni sa taura tiko ko koya, sa vakarauta ko koya e ono nai vakarau parile, a sa tauca vua: a sa lako ko koya ki na koro.

¹⁶ Ia sa lako mai ko koya ki na vugona, a sa kaya ko koya, O sa vakaevei, na luvequ? A sa tukuna vua ko koya na ka kecega ka cakava vua ko koya na tamata.

¹⁷ A sa kaya ko koya, Sa solia mai vei au ko koya nai vakarau parile o qo e ono; ni sa kaya vei au, Mo kakua ni lako lala ki na vugomu.

¹⁸ A sa kaya ko koya, Mo wa wa, na luvequ, mo kila mada se na vakaevei nai otioti ni ka o qo: ni na sega ni vakacegu na tamata, ka me vakaotia mada na ka edaidai.