Ruci 1 - AI VOLA TABU

A WASE I. —Sa lako ko Elimeleki me tiko mai Moapi e na vuku ni dausiga, 1, 2. A rau veiwatini na luvena kei rau na gonealewa ni Moapi, 3-5. Ai tukutuku kei Naomi kei na watidrau na luvena, 6-22.

¹ IA e na gauna era sa lewa kina ko ira na dauveilewai, sa dausiga na vanua. A sa lako e dua na kai Pecileema nei Juta me tiko vulagi e na veiyasana nei Moapi, ko koya, kei na watina, kei na luvena tagane e lewe rua.

² Ia na yaca ni tamata ko ya ko Elimeleki, kei na yaca i watina ko Naomi, kei na yaca ni luvena e rua, ko Maloni kei Kiliyoni, eratou kai Efiraca mai Pecileema nei Juta. A ratou sa lako mai ki na veiyasana nei Moapi, a ratou sa tiko kina.

³ A sa ciba ko Elimeleki, na wati i Naomi; a sa vo ga ko koya kei na luvena tagane e lewe rua.

⁴ A rau sa kauta me watidrau e rua na alewa ni Moapi; a yacana e dua ko Oripa, kei na yacana na kenai karua ko Ruci: a ratou sa tiko maikea ka yabaki tini beka.

⁵ A rau sa ciba ruarua talega, ko Maloni kei Kiliyoni; a sa vo na alewa ga, ka yali koi rau na luvena, kei na watina.

⁶ A sa ia ko koya kei rau na vugona, me lesu mai na veiyasana nei Moapi, e na vuku ni ka rogoca e na veiyasana nei Moapi ni ka talevi ira na nona tamata ko Jiova, ka solia vei ira na kakana.

⁷ A sa lako yani ko koya mai na tikina ka tiko kina, vata kei rau na vugona. Ia eratou sa lako e na sala me ratou lesu ki na vanua nei Juta.

⁸ A sa kaya ko Naomi vei rau na vugona, Drau lako, drau lesu yadua ki na vale i tinana: me caka vinaka vei kemudrau ko Jiova, me vaka drau a cakava vei rau sa mate tu, kei au talega:

⁹ me solia vei kemudrau ko Jiova, mo drau kunea yadua na vakacegu e na vale i watina. A sa reguci rau ko koya; a ratou sa tabalaka cake na domodratou, ka tagi.

¹⁰ A rau sa kaya vua, Keirau na lesu vakaidina kei iko kivei ira na kai nomu.

¹¹ A sa kaya ko Naomi, Drau lesu tani, na luvequ; e na vuku ni cava drau na lako kina kei au? sa vo tiko li na luvequ tagane e ketequ, me rau wati-mudrau?

¹² Drau lesu tale, na luvequ, drau lako yani ga, niʼu sa qase ka sa tarovi kina na noqu vakawati. Kevaka kaʼu na kaya, Au sa nakita; kevaka kaʼu sa vakawati e na bogi edaidai, ka vakasucuma talega e so na goneatagane,

¹³ drau na wawa li vei rau me rau levu? drau na wawa li vei rau mo drau kakua ni vakawati? me kakua, oi kemudrau na luvequ; niʼu sa rarawa vakalevu e na vukumudrau, ni sa tarai au na liga i Jiova.

¹⁴ A ratou sa tabalaka cake na domodratou, ka tagi tale: a sa reguca na vugona ko Oripa, a sa kabiti koya ko Ruci.

¹⁵ A sa kaya ko koya, Raica, na wekamu alewa sa lesu tale ki na kai nona, kei na nona veikalou; mo lesu yani mo muria na wekamu alewa.

¹⁶ A sa kaya ko Ruci, Mo kakua ni vakamamasu vei au me laivi iko, meʼu lesu ka kakua ni muri iko; niʼu na lako ki na vanua ko lako kina; ia na vanua ko tiko kina kaʼu na tiko kina: ena kai noqu na kai nomu, na nomu Kalou talega ena noqu Kalou:

¹⁷ ena vanua ko mate kina, kaʼu na mate kina, kaʼu na bulu talega kina: me caka vakaoqo vei au ko Jiova, ka vakalevu cake talega, ia sa na mate ga sa tawasei kedaru.

¹⁸ Ia ni sa raica ko koya ni sa dei na lomana me lako kaya, sa cegu ni vosa vua.

¹⁹ A rau sa lako yani ka yacovi Pecileema. Ia ni rau sa yaco ki Pecileema, sa yavala na koro taucoko e na vukudrau, a ra sa kaya, O qo ko Naomi, se segai?

²⁰ A sa kaya vei ira ko koya, Dou kakua ni vakatokai au ko Naomi [Marau]; dou vakatokai au ko Mara [Rarawa]: ni sa caka vakarara wa vei au ko Koya na kaukauwa:

²¹ au a sinai tu niʼu a lako yani; ia kaʼu sa lala tu ni sa vakalesui au ko Jiova: a cava dou sa vakatokai au kina ko Naomi, ni sa beitaki au oti ko Jiova, a sa vakararawataki au oti ko Koya na kaukauwa?

²² A sa lesu mai ko Naomi, ka sa lesu kaya mai ko Ruci na kai Moapi, na vugona, mai na veiyasana nei Moapi: a rau sa yaco mai ki Pecileema ni sa qai ia na tamusuki parile.