Roma 8 - AI VOLA TABU

A veika vinaka sa yaco vei ira sa vakabauti Jisu, 1-25. Sa vukei ira tiko na Yalo Tabu; sa veivuke na ka kecega me ra vinaka kina; ena sega e dua na ka me tawasei ira rawa mai na Kalou, 26-39.

¹ O KOYA o qo era sa sega kina ni lewai me cudruvi ko ira era sa tu vata kei Karisito Jisu, era sa sega ni muria lako nai tovo vakayago, era sa muria ga na Yalo.

² Ni sa sereki au mai na vunau ni yaloca kei na mate na vunau ni Yalo, a ya sa yaco kina na bula e na vuku i Karisito Jisu.

³ Ia ni sa sega ni rawarawa ki na vunau, ni sa malumalumu e na vuku ni tovo vakayago, sa qai lewa ko na Kalou na yaloca e na yago me mate, ni sa tala na Luvena e nai tovo ni yago sa tu kina na yaloca, ka mei soro ni valavala ca:

⁴ me da cakava rawa kina nai valavala dodonu ni vunau, ni da sa tawa muria lako nai tovo vakayago, a ya ga na Yalo:

⁵ ni sa gadreva na veika vakayago ko ira era sai tovo vakayago; ia na veika vakayalo ko ira era sai tovo vakayalo.

⁶ Ni sa vu ni mate na gadreva ni tovo vakayago; ia sa vu ni bula kei na vakacegu na gadreva ni tovo vakayalo.

⁷ Ni sa veimecaki nai tovo vakayago kei na Kalou: ni sa sega ni vakarogoca na vunau ni Kalou, ia sa dredre sara me vakakina.

⁸ Ia ko ira era sai tovo vakayago, era sa sega ni cakava rawa na ka e vinaka vua na Kalou.

⁹ Ia sa sega ni vakayago na nomudoui tovo, sa vakayalo ga, kevaka e dina ni sa tiko e na lomamudou na Yalo ni Kalou. Ia kevaka sa dua na tamata sa sega ni tiko e lomana na Yalo i Karisito, sa sega ni nona ko koya o qo.

¹⁰ Ia kevaka sa tiko e na lomamudou ko Karisito, sa dina ya ni sa mate na yago e na vuku ni valavala ca; ia na yalo sa bula e na vuku ni veivakadonui.

¹¹ Ia kevaka sa tiko vakadua e na lomamudou na Yalo i koya sa vakaturi Jisu cake tale mai na mate, o koya sa vakaturi Karisito tale mai na mate, ena Vakabula tale na yagomudou sa mate rawa, e na Yalona sa tiko vakadua e na lomamudou.

¹² O koya, oi kemudou na veiwekani, eda sa sega kina ni vauci ki nai tovo vakayago, me da muria nai tovo vakayago:

¹³ ni dou na mate kevaka dou sa muria nai tovo vakayago; ia kevaka sa veivuke kei kemudou na Yalo me vakaotia nai valavala vakayago, dou na bula kina.

¹⁴ Ia sai ira ga sa tuberi ira ko na Yalo ni Kalou era sa luve ni Kalou.

¹⁵ Ni dou sa sega ni rawata tale na yalo ni bobula mo dou rere; ia dou sa rawata na Yalo dou sa vakabauti kina me gone, o koya eda sa kaci kina, Apa, Tamada.

¹⁶ A Yalo o qo sa tukuna mai ki na yaloda, ni da sa luve ni Kalou:

¹⁷ ia kevaka eda sa gone, eda na qai taukei; eda na taukena na veika ni Kalou, eda sai taukei vata kei Karisito; kevaka eda sa vosota vata kaya na ca, eda na vakalougatataki vata kaya talega.

¹⁸ Niʼu sa vaka ni sa sega ni yaga me rau vakarauvatani na ka ca sa vosoti e na bula o qo kei na kalougata ena vakarairaitaki vei keda emuri.

¹⁹ Ni sa gadreva vakalevu ko vuravura ka wawa tikoga me ra vakarairaitaki ko ira na luve ni Kalou.

²⁰ Ni sa vakamalumalumutaki ko vuravura me ca, (a sa sega ni vinakata, a ya ga e na vuku i koya sa vakamalumalumutaka,) ni sa vakanuinui tiko,

²¹ ni na sereki talega ko vuravura mai na veivakabobulataki ki na rusa, me lalaga tu ka vakaiukuukutaki vata kei ira na luve ni Kalou.

²² Ni da sa kila, sa vutugu vata ko vuravura taucoko, ka sa yaluma e na rarawa, ka yacova na siga o qo.

²³ A sa sega ni koya walega, oi keda talega, eda sa rawata nai sevu ni Yalo, eda sa vutugu tiko e lomada, ni da sa namaka me da vakabauti me gone, ni na vakabulai na yagoda.

²⁴ Ni da sa bula e nai nuinui: ia nai nuinui sa bale e na ka sa qai raici, sa sega ni nuinui dina: ni sa vakanuinuitaka vakacava na tamata na ka sa qai raica?

²⁵ Ia kevaka eda sa vakanuinuitaka na ka eda sa sega ni raica, eda sa vosota ga me waraka tiko.

²⁶ Ia na Yalo talega sa vukea na noda malumalumu: ni da sa sega ni kila na ka e kilikili kei keda me da kerea: a sa masulaki keda ko na Yalo e na vutugu e sega ni cavuti rawa.

²⁷ Ia ko koya sa daudikeva na yaloda sa kila na loma ni Yalo, ni sa masulaki ira na tamata lotu me vaka na loma ni Kalou.

²⁸ Ni da sa kila sa veivuke na ka kecega me ra vinaka kina era sa lomana na Kalou, ko ira era sa kacivi me vaka na ka sa nakiti oti.

²⁹ Ia ko ira kece sa kilai ira eliu ko koya, sa lesi ira eliu me ra tautauvata kei na Luvena, me ulumatua kina ko koya vei ira na tacina era lewe vuqa:

³⁰ ia ko ira sa lesi ira eliu ko koya, sa qai kacivi ira: ia ko ira sa kacivi ira ko koya, sa vakadonui ira: ia ko ira sa vakadonui ira ko koya, sa vakaiukuukutaki ira.

³¹ A cava me da qai kaya e na veika o qo? Kevaka sa totaki keda na Kalou, o cei me noda meca?

³² Ena vakaevei ko koya sa sega ni maroroya na Luvena dina, a sa soli koya yani me kedai sosomi kecega, ena sega vakaevei ni solia walega vei keda na ka kecega vata kaya?

³³ O cei me beitaki ira sa digitaki ira ko na Kalou? Na Kalou sa vakadonuya.

³⁴ O cei me ia na lewa me ra cudruvi? O Karisito ga sa mate, io, a sa bula cake tale, a sa tiko talega e na liga i matau ni Kalou, a sa masulaki keda.

³⁵ O cei me na tawasei keda mai na loloma i Karisito? a ka rarawa li, se na yaluma, se na dauveivakacacani, se na dausiga, se na luvawale, se na dauveivakarerei, se nai seleiwau?

³⁶ Me vaka na ka sa volai, E na vukumu keitou sa vakamatei kina e na siga taucoko ka bogi: keitou sa vakatauvatani kei na sipi ena vakamatei.

³⁷ Ia na ka kecega o qori eda sa gumatua sara kina, e na vuku i koya sa lomani keda.

³⁸ Niʼu sa kila dina, ni na sega ni rawata na mate, se na bula, se ko ira na agilose, se ko ira sa liu, se ko ira sa kaukauwa, se na veika sa yaco edaidai, se na veika ena yaco emuri,

³⁹ se na ka cecere, se na ka titobu, se dua tani na ka, me tawasei keda mai na loloma ni Kalou, a ya sa yaco e na vuku i Karisito Jisu na noda Turaga.