Roma 4 - AI VOLA TABU

Sa tukuna ko koya ni ka vakadonui ko Eparaama e na vuku ni nona vakabauta, 1-8. A sa vaka talega kina na tamata kecega, 9-25.

¹ A CAVA me da qai kaya sa kunea ko Eparaama na tamada, e nai valavala vakayago?

² Io, kevaka sa vakadonui ko Eparaama e na vuku ni cakacaka, sa qai dua na ka vua me dokai koya kina ko koya; ia ka sega ga e na mata ni Kalou:

³ ni sa cava e kaya nai Vola? Sa vakabauta na Kalou ko Eparaama, a sa okati vua mei valavala dodonu.

⁴ Ia nai sau ni tamata daucakacaka, sa sega ni okati me loloma, a ya ga sai voli.

⁵ Ia ko koya sa sega ni cakacaka, a sa vakabauti koya sa vakadonuya na tamata i valavala ca, sa okati vua na nona vakabauta mei valavala dodonu.

⁶ Sa vaka talega kina ko Tavita ni sa tukuna na kena kalougata na tamata, sa okata kina ko na Kalou nai valavala dodonu, ia ka sega e na vuku ni cakacaka:

⁷ Sa kalougata ko ira sa bokoci na nodrai valavala ca, a sa ubi na nodra caka cala:

⁸ sa kalougata na tamata sa sega ni okata vua ko Jiova nai valavala ca.

⁹ Era sa kalougata beka vakaoqo ko ira ga era sa cili, se ra vaka talega kina ko ira sa tawa cili? ni da sa kaya sa okati vei Eparaama na vakabauta mei valavala dodonu.

¹⁰ Sa qai okati beka ni sa vakaevei? ni sa cili oti ko koya, se ni sa tawa cili? Sa sega ga ni sa cili oti, a ya ga ni sa tawa cili.

¹¹ A sa soli vua na veicili mei vakatakilakila, me vakadinadinataka ni sa vakadonui ko koya e na vuku ni sa vakabauta, ni sa tawa cili tu: me yaco kina ko koya me tamadra kecega era sa vakabauta, ko tawa cili; me okati vei ira talega nai valavala dodonu:

¹² me tamadra talega era sa cili, vei ira era sa sega ni cili walega, era sa muria talega na we-ni-yava ni tamada ko Eparaama, a vakabauta ko ya sa nona ni sa tawa cili tu.

¹³ Ni sa sega ni vunau sa yalati kina vei Eparaama, se vei ira na nona kawa, me taukei ni vuravura, e na vuku ga ni veivakadonui sa yaco e na vakabauta:

¹⁴ ni sa mai vakatawayagataki na vakabauta, ia na ka wale talega na vosa ni yalayala, 165 kevaka sa taukena ko ira era sa muria na vunau:

¹⁵ ni sa vakavuna na cudruvi na vunau: ni sa sega nai valavala ca, kevaka sa sega na vunau.

¹⁶ E na vuku ni ka o qo sa ka ni vakabauta, me sa rawa kina me ka ni loloma: me tu dei kina na vosa ni yalayala vei ira kecega na kawa; e sega vei koya walega sa tu kina na vunau, ia vei koya talega sa tu kina na vakabauta i Eparaama: o koya sa tamada kecega,

¹⁷ (me vaka sa volai, Au sa qisi iko mo tamadra na veivanua e vuqa,) e na matana sa vakabauta ko koya, io, na Kalou, o koya sa vakabulai ira tale na mate, a sa kaciva na veika sa segai me vaka era sa tu:

¹⁸ ia ni sa sega nai nuinui, sa vakabauta ko koya, ka vakanuinui, me yaco me tamadra na veivanua e vuqa, me vaka sa tukuni, Ena vakakina na nomu kawa.

¹⁹ Ia ni sa sega ni malumalumu na nona vakabauta, sa sega ni vakasama kina na kena mate na yagona ka ni sa dua beka na drau na nona yabaki, se na kena mate na kete i Sera:

²⁰ a sa sega talega ni yatayata e na tawa-vakabauta na vosa ni yalayala ni Kalou; sa kaukauwa ga na nona vakabauta, a sa vakarokorokotaka kina na Kalou;

²¹ a sa vakadinata sara, ni sa rawarawa vei koya, me cakava na ka sa yalataka.

²² O koya ga sa okati kina o qo vei koya mei valavala dodonu.

²³ Ia ka sa sega ni vukuna duaduaga sa volai kina ni sa okati vua;

²⁴ ka e na vukuda talega, ni na okati vaka talega kina vei keda, kevaka eda sa vakabauti koya sa vakatura cake tale na noda Turaga ko Jisu mai na mate;

²⁵ o koya ka soli yani e na vuku ni nodai valavala ca, a sa vakaturi cake tale me da vakadonui kina.