Roma 2 - AI VOLA TABU

Sa tukuna ko koya, ni sa tamatai valavala ca ko ira na Jiu, a sa sega ni yaga me ra cakitaka, 1-16. Sa levu na ka sa solia vei ira ko na Kalou, a ra sa ca tikoga, a sa sega na nodra ulubale, 17-29.

¹ O KOYA o qo sa sega kina na nomu ulubale, o iko na tamata yadua sa daulewa: ni ko sa beitaki iko e na nomu lewa e dua tani; ni sa valavala tiko vakakina ko iko sa daulewa.

² Ia eda sa kila ni sa dina na lewa ni Kalou vei ira era sa kitaka na veika vakaoqo.

³ Ia ko iko na tamata, sa lewai ira era sa kitaka na veika vakaoqo, ka sa valavala vakakina, ko sa nanuma beka ni ko na dro rawa mai na lewa ni Kalou?

⁴ se ko sa beca beka na nona loloma levu, kei na nona vosota vakadede, kei na nona cudru vakamalua; ka ko sa sega ni vakasama ni sa tuberi iko ki na veivutuni na loloma ni Kalou?

⁵ Ia ko iko, me vaka na nomu yalokaukauwa kei na lomamu sa tawa veivutuni, ko sa binia tikoga vei iko na cudru ki na siga ni cudruvi, ena vakaraitaki kina na lewa dodonu ni Kalou;

⁶ o koya ena sauma na tamata yadua me vaka na nonai valavala:

⁷ na bula tawa mudu, vei ira era sa gumatua tiko e nai valavala vinaka ka vakasaqara nai ukuuku kei na vakarokoroko kei na tawa mate rawa:

⁸ ia na cudru kei na lesa vei ira era sa dauveileti, ka talaidredre ki nai vakavuvuli dina, ka talairawarawa ki nai vakavuvuli tawa-dodonu;

⁹ na rarawa kei na yaluma, vei ira na tamata kecega sa valavala ca tiko, sa liu vua na Jiu, vei koya talega sa matanitu kisau;

¹⁰ ia nai ukuuku, kei na vakarokoroko, kei na vakacegu, vei ira kecega sa valavala vinaka, sa liu vua na Jiu, vei koya talega sa matanitu kisau.

¹¹ Ni sa sega ni vinakati ira vakailoa na tamata ko na Kalou:

¹² ni na rusa e vaka sa sega na vunau ko ira kecega sa valavala ca ka sega vei ira na vunau: ia ena lewai e na vunau ko ira kecega sa valavala ca ka sa dua vei ira na vunau, (

¹³ ni sa sega ni ko ira era sa rogoca walega na vunau era sa dodonu e na mata ni Kalou, o ira ga era sa muria na vunau era na vakadonui:

¹⁴ ni ra sa nodra vunau vakai ira ga ko ira na veimatanitu, sa sega kina na vunau, kevaka era sa kitaka vakai ira na veika sa vaka na vunau, io, ko ira o qori, e dina ya ni sa sega vei ira na vunau:

¹⁵ o ira era sa vakatakila sara ni sa volai e na yalodra nai valavala ni vunau, ni sa vakadinadina tiko na nodra lewa-eloma talega, ka ra sa dui vakasama ni sa cala na nodrai valavala se sa dodonu:)

¹⁶ E na siga ena lesi Jisu Karisito kina ko na Kalou me lewa na nodra veika e vuni tu na tamata, me vaka na noqui tukutuku-vinaka.

¹⁷ Raica, o sa vakatokai me Jiu, ka ko sa vakararavi e na vunau, ka sa vakalevulevui iko e na vuku ni Kalou,

¹⁸ ka ko sa kila na lomana, ka daulewa na veika sa dua tani, ni ko sa vakatavulici mai na vunau;

¹⁹ o sa vakararavi talega vei iko mo tuberi ira na mataboko, mo nodra rarama era sa tiko e na butobuto,

²⁰ mo nodrai vakavuvuli era sa sesewa, mo nodrai vakavuvuli na gone lalai, ni sa nomu e na vunau nai vakatakarakara ni vuku dina.

²¹ Ia ko iko, ko sa dauvakatavulica e dua tani, o sa sega li ni vakatavulici iko? o iko, ko sa dauvunau me kakua na butako, o sa bau butako ko iko?

²² o iko, ko sa daukaya me kakua na dauyalewa, o sa bau dauyalewa ko iko? o iko, ko sa daucata na veimatakau, o sa bau butako mai na vale-ni-soro?

²³ o iko, ko sa dauvakalevulevui iko e na vuku ni vunau, o sa bau vakalialiai koya na Kalou ni ko sa talaidredre ki na vunau ko ya, ne?

²⁴ Ni sa dauvosavakacacataki na yaca ni Kalou vei ira na veimatanitu e na vukumudou, me vaka sa volai.

²⁵ Ni sa dina sa yaga na veicili, kevaka ko sa talairawarawa ki na vunau: ia kevaka ko sa talaidredre ki na vunau, sa yaco kina na nomu cili me tawa cili.

²⁶ Ia kevaka e dua sa tawa cili sa muria nai valavala dodonu ni vunau, ena sega li ni wili na nona tawa cili me cili?

²⁷ Ia ko koya sa tawa cili mai, ke sa muria na vunau, ena sega li ni lewai iko, o iko sa talaidredre ki na vunau, ka sa tu vei iko nai vola kei na vei cili?

²⁸ Ni sa sega ni Jiu ko koya sa vakarairai walega; ia sa sega ni veicili na ka sa vakarairai walega e na yago:

²⁹ ia sa Jiu ko koya sa nona na ka vuni; a sa vakayalo na veicili, e na yalo, sa sega ni ka ni vosa walega; a ya sa sega ni doka ko ira na tamata, o koya ga na Kalou.