Roma 1 - AI VOLA TABU

A WASE I. —Sa tukuni koya ko Paula, ni sai talatala i Jisu, ka via raici ira na lewe ni soro mai Roma, 1-15. Sa qai tukuna ni sa ka ni Kalou nai tukutuku-vinaka sa vakatakilai kina ni sa vakadonui ira ko na Kalou era sa vakabauta, 16, 17. Sa cudru na Kalou vei ira kecega era sa valavala ca; a sa vuqa na nodrai valavala ca na tamata, 18-32.

¹ O PAULA, nai talatala i Jisu Karisito, nai apositolo sa kacivi, sa lesi ki nai tukutuku-vinaka ni Kalou, (

² A ya sa yalataka eliu ko koya e na vosa ni nona parofita e nai Vola Tabu,

³ a sa tukuna na Luvena ko Jisu Karisito na noda Turaga, o koya sa sucu mai na kawa i Tavita me vaka na yagona;

⁴ o koya sa vakatakilai vakaukauwa e na tu cake tale mai na mate, ni sa Luve ni Kalou, me vaka na yalona savasava:

⁵ o koya keitou sa rawata talega maikina na loloma kei na cakacaka vakaiapositolo, me vakabauta ka talairawarawa kina ko ira na lewe ni veivanua kecega, e na vuku ni yacana:

⁶ o ira dou sa coko vata kaya koi kemudou talega sa kacivi oti me nei Jisu Karisito:)

⁷ Vei kemudou kecega sa tiko mai Roma, oi kemudou sa daulomana ko na Kalou, oi kemudou sa kacivi tu ka sa yalosavasava mai: Me nomudou na loloma kei na vakacegu mai vua na Kalou ko Tamada, kei Jisu Karisito na Turaga.

⁸ Meʼu vakatekivu, ko Jisu Karisito kaʼu sa vakavinavinaka kina vua na noqu Kalou e na vukumudou kecega, ni sa tukuni e vuravura taucoko na nomudou vakabauta.

⁹ Ni sa vakadinadinataka rawa e na vukuqu ko na Kalou, o koya kaʼu sa qarava e na vu ni yaloqu e nai tukutuku-vinaka ni Luvena, niʼu sa tawa mudu ni cavuti kemudou e na veisiga e na noqu masu;

¹⁰ niʼu sa daumasu, me dua na gauna meʼu vakalougatataki kina e na veitalia ni Kalou meʼu yaco yani vei kemudou.

¹¹ Niʼu sa gadreva vakalevu meʼu raici kemudou, meʼu solia kina vei kemudou nai solisoli vakayalo e so, mo dou vakataudeitaki kina;

¹² a ya, me da dui vakacegui e na vuku ni nomudou vakabauta kei na noqu talega.

¹³ Ia, koi kemudou na veiwekani, kaʼu sa sega ni vinakata mo dou lecava, niʼu sa nakita vakavuqa meʼu lako yani vei kemudou, (ia kaʼu sa tarovi ga ka yacova na siga o qo,) me so na vuaqu e na kemudou maliwa, me vaka talega e na kedra na veimatanitu tani.

¹⁴ Sa dodonu meʼui talatala vei ira na kai Kirisi, vei ira talega na lewe ni veivanua kaisi: vei ira na vuku, vei ira talega era sa tawa vuku.

¹⁵ A sa vakakina, me vaka kaʼu sa rawata sa yaloqu sara meʼu vunautaka nai tukutuku-vinaka vei kemudou talega mai Roma.

¹⁶ Niʼu sa sega ni maduataka nai tukutuku-vinaka kei Karisito: ni sai koya o qo na kaukauwa ni Kalou me vakabulai ko ira yadua era sa vakabauta: sa liu ko na Jiu, ko koya talega sa matanitu kisau.

¹⁷ Ni sa vakatakilai kina me vakabauti, ni sa vakadonui ira ko na Kalou era sa vakabauta: me vaka na ka sa volai, Ena bula e na vakabauta ko koya sa yalododonu.

¹⁸ NI sa vakatakilai mai lomalagi na cudru ni Kalou ki na nodrai valavala ca kecega kei na nodra tawa-dodonu na tamata, era sa tarova nai vakavuvuli dina e nai valavala tawa-dodonu;

¹⁹ e na vuku ni sa rairai e na kedra maliwa na ka sa kilai rawa sa nona na Kalou; ni sa vakaraitaka vei ira ko na Kalou:

²⁰ ni sa kune na veika e vuni tu sa nona na Kalou, io, na nona kaukauwa tawa mudu kei na nona tu Vakalou, ni sa kilai oti e na veika sa buli, mai na gauna sa buli kina ko vuravura; o koya o qo sa sega kina na nodra ulubale.

²¹ Io, ni ra sa kila tiko na Kalou, era sa sega ni vakarokorokotaka me vaka na Kalou, se vakavinavinaka; a sa lialia mai na nodra nanuma, a sa butobuto mai na yalodra sesewa.

²² Ni ra sa vaka tiko era sa vuku, era sa lialia mai;

²³ a ra sa vakaisosomitaka na serau ni Kalou sa tawa mate rawa, e na matakau e vaka na tamata sa daumate wale, kei na manumanu vuka, kei na manumanu e yavai va, kei na veika sa dolo.

²⁴ O koya sa biuti ira kina na Kalou me ra qeleqelewa e na dodomo ni yalodra, me ra vakasisilataka kina na yagodra vakai ira:

²⁵ ia era sa vakaisosomitaka nai vakavuvuli dina ni Kalou, e na ka e lasu wale, a ra sa soro kina ka qarava vakalevu na ka sa buli ka vakalailai ko koya sa bulia, o koya sa nona na vakarokoroko ka tawa mudu. Emeni.

²⁶ O koya sa biuti ira kina ko na Kalou me ra muria na dodomo vakasisila: ni ra sa vakaisosomitaka ko ira na nodra yalewa nai valavala sa lesi e na dua tani e sega ni lesi:

²⁷ sa vaka talega kina ko ira na tagane, ni ra sa biuta nai valavala sa lesi vata kei na yalewa, era sa waqawaqa e na veidomoni vakai ira: a ra sa kitaka ko ira na tagane na ka velavela sara kei ira na tagane, a sa yaco kina vei ira nai sau dodonu ni nodra caka cala.

²⁸ Ia ni ra sa sega ni vinakata me ra kila tiko na Kalou, sa biuti ira ko na Kalou me kua ni vinaka na lomadra, me ra kitaka na veika e sega ni kili kei ira;

²⁹ me ra sinai e na ka kecega e ca, e na daudara, e na yaloca, e na daukocokoco, e na dauveivakacacani; me ra sinai e na vuvu, e na laba, e na veileti, e na dauveivakaisini, e na yalocudrucudru; me ra dauva-kasolokakana,

³⁰ me ra daukakase, me ra daucata na Kalou, me ra dauveivakalialiai, me ra qaciqacia, me ra daudokai ira, me ra dauvakatekivuna na ca, me ra dautalaidredre kivei ira na nodra qase,

³¹ me ra sega ni yalomatua, me ra veiyalayalati ka lasu tale, me ra sega ni veilomani vakatamata, me ra sega ni veivinakati rawa, me ra sega ni yalololoma:

³² ia ni ra sa kila tiko na lewa ni Kalou, ni sa dodonu me mate ko ira era sa kitaka na veika vakaoqo, era sa sega ni kitaka walega ko ira, era sa dauvinakati ira talega era sa daukitaka.