Osea 9 - AI VOLA TABU

Era na vakararawataki ka vakabobulataki na Isireli e na vuku ni nodrai valavala ca kei na nodra dauqarava na kalou lasu, 1-17.

¹ DOU kakua ni marau, na Isireli, e na reki levu, me vakai ira na veimataqali: ni dou sa laʼki dauyatagane tani mai vua na nomudou Kalou, dou a vinakata nai soli e na rara ni sila kecega.

² A rara kei nai keli-ni-waini ena sega ni vakani ira, ia na waini vou ena lasutaki ira.

³ Era na tawa tiko e na vanua i Jiova; era na lesu ga na Ifireimi ki Ijipita, mai Asiria talega era na kania na ka dukadukali.

⁴ Era na tawa livia nai sevu waini vei Jiova, ena tawa vinakati vua: a nodrai soro ena tauvata vei ira kei na kedra madrai era ia na somate; o ira kece sa kania era na vakadukadukalitaki kina: ni na kedra ga na nodra madrai, ena tawa yaco ki na vale i Jiova.

⁵ A cava mo dou qai cakava e na siga ni so tabu, kei na siga ni solevu i Jiova?

⁶ Ni ra sa lako tani, rai ca, mai na veivakacacani: o Ijipita, ena kumuni ira; o Memifi, ena buluti ira: a nodrai yau domoni ni siliva, ena taukena na salato: enai taukei ni nodra vale malo na soni.

⁷ Sa yaco mai na siga ni veicudruvi, sa yaco mai na siga ni veisaumi; ena kila ga ko ira na Isireli: sa sesewa na parofita, sa kudru na tamata sa curumi, e na vuku ni levu ni nomudou caka cala, kei na veicati levu.

⁸ O ira na Ifireimi erai vakatawa e totani, ka tawa tovata kaya na noqu Kalou: sai koya na parofita na nonai cori na dauia na tudai e na nonai valavala kecega, na vu ni Veicati e na vale ni nona kalou.

⁹ Sa ra laʼki boroboro titobu e na ca, me vaka e na gauna i Kipia: ena nanuma ko koya na nodra caka cala, ena cudruva na nodrai valavala ca.

¹⁰ Me vaka na vua-ni-vaini mai veikau kaʼu a kunei ira na Isireli; me vaka nai semata ni lolo, ni sa vuai, kaʼu a raici ira na tamamudou: sa ra yaco ki Peali-piori, ka tawasei ira ki na ka e veivakamaduataki; a ra yaco me ka vakasisila me vaka na ka ko ya era domona.

¹¹ O ira na Ifireimi, ena vuka tani me vaka na manumanu na nodrai ukuuku, mai na sucu, kei na kete, kei na kunekune.

¹² Ni ra susuga na luvedra, kaʼu na vakayali ira, me kakua na tamata e vo; io, ena ca talega ko ira, niʼu sa lako tani vei ira!

¹³ O Ifireimi, me vaka niʼu a raici Teiri, sa tei e na yasana vinaka; ia na Ifireimi, era na vakasucuma na luvedra mo nona na daulaba.

¹⁴ Mo solia vei ira, Jiova! a cava beka mo na solia? solia vei ira na kete dauva-kalutu gone kei na sucu daudi.

¹⁵ Sa vu ga na nodra ca kece mai Kilikali; ni sa maikea kaʼu a cati ira: e na vuku ni ca ni nodra cakacaka kaʼu na vakasavi ira tani kina mai na noqu vale, kaʼu na sega ni lomani ira tale: o ira kece na nodra turaga sa ra dauvuki tani,

¹⁶ Sa yaviti ko ira na Ifireimi, sa malai na wakadra, sa na tawa vua tale: io, ke ra vakasucuma na gone, keʼu na vakamatea na ka domoni ni ketedra.

¹⁷ Ena biuti ira tani na noqu Kalou, e na vuku ni ra sa sega ni vakarorogo vua: a ra na dui veiseyaki ki na veivanua.